Tapi barang rek diresmikeun ieu pangangkatan murid anyar. Model dibaiat, jol teh Nini Anti bari seuri anu has tea; menta Nyi Epon supaya dipasrahkeun; lantaran cenah eta mah geus boga dadasar Ilmu Silat ti Nini Anti. Atuh Mawar Hideung teh asa aya jalan komo meuntas; asa mobok manggih gorowong; ti na sakitu lilana manehna hayang panggih jeung Nini Anti aya tanyakeuneun; ayeuna aya hareupeun bari seuri nu has tea; bari peupeuleukeuk menta Nyi Epon; atuh Mawar Hideung langsung we nolak, bari satengah nyentak :”Eh Ibu ! kamana wae ? Kuring hayang panggih jeung ibu ? ditungguan di lembur nepi ka tilu poe teu embol2, ka mana wae atuh?” “Hihihihi ! tong loba carita ! sok kadieukeun eta Nyi Epon …!” Murid2 Walet Hideung teu waranieun pipilueun, da kapan Walet Hideung oge guruna nyebutna IBU. Jadi caricing we di tukang. Mawar Hideung kaciri siga beurat mikir; tapi terus we nyarita:”Ke ibu, ari ibu teh ti iraha apal yen kuring mawa ieu dua budak awewe ?” Nini Anti kaciri rada keuheuleun, terus seuri mani pikasieuneun :”Hehehehehe; yeuh Mawar Hideung tong sok cucungah maneh; kapan maneh teh anak; naha kahayang indung kitu2 wae teu nurut… hah !?” Mawar Hideung hayang apal oge saha sabenerna Eta Nini Anti teh ; teu kanyahoan Mawar Hideung nyerang ngan sakilat ku jurus Walet nyamber lauk; tapi bari seuseurian Nini anti nyingcet ti na tilu serangan Walet Hideung. Lantaran serangan Walet Hideung teh lain ngan ukur sajalan tapi aya tilu jalan; mun gagal nu hiji bakal disusul ku nu kadua jeung katilu; tapi sakabehna dilawan ku Nini Anti mani gampang pisan. Ku ayana eta kagagalan, teg we Mawar Hideung ka hiji sosok pendekar; tapi ku sabab can yakin nya manehna terus ngagencer ku serangan2 nu araneh jeung kilat supaya Nini Anti ngaluarkeun Elmu andelanana; tapi satiap lengkah jeung jurus Mawar Hideung geus kabaca ku Nini Anti; malah siga nu ngajak ulin. Ahirna Mawar Hideung yakin saha eta Nini Anti teh; terus we nyerang hebat pisan; nu dilayanan ku Nini anti; tapi barang keur nyerang kitu gebluk teh Mawar Hideung ngajengkang; mani ngagebluk sorana; dibarengan ku sora aduh ! Mawar Hideung kapaehan. Para Murid Walet Hideung karaget; tapi nu leuwih kaget Nini Anti; lantaran eta ngageblukna Mawar Hideung lain bobodoan atawa api2; estu enyaan ngagebluk mani tarik; gancang wae Nini anti muru …. Bari siga nu bingung jeung rawah riwih.HANCA
