Seuneu, Menhir, Dolmen, Mizpah ============================== Di daratan Eropa loba dipanggihan tihang batu anu disebut menhir. Ari diaranan menhir meureun lain ti dituna, tapi nya diaranan ku ilmuwan jaman modern. Kecap menhir cenah mah tina bahasa Prancis, ari 'men' artina batu, ari 'hir' artina panjang atawa jangkung. Jadi menhir teh artina batu panjang atawa batu jangkung.
Salain menhir oge loba dipanggihan wangunan batu anu diaranan dolmen, nyaeta wangunan tina batu anu disusun saperti meja. Sabenerna tepikeun ka ayeuna para ilmuwan teu nyaho pasti saha anu ngawangun eta dolmen jeung menhir teh. Oge teu apal pasti jangnaon tujuan eta dolmen jeung menhir diwangun. Tapi ngan ukur kira-kira para ilmuwan yen eta wangunan dolmen jeung menhir teh diwangun pikeun tujuan ritual, kaagamaan atawa sesembahan. Awalna menhir jeung dolmen teh diperkirakeun asalna ti jaman akhir neolitikum rek asup ka jaman perak. Tapi beh dieu para ilmuwan mastikeun yen menhir jeung dolmen teh loba anu asalna ti jaman megalitikum. Anu ahengna deui menhir jeung dolmen teh dipanggihan lain gan wungkul di daratan eropa, tapi oge di daerah lain saperti mesir, iran, india jeung tangtuna indonesia. Tah kumaha eta budaya ngawangun dolmen jeung menhir bisa nyebar ka sakuliah dunya? Na enya asalna ti hiji tempat geus aya budaya ngawangun dolmen jeung menhir terus jelema nyebar mawa eta budaya ka sakuliah dunya? Atawa memang jelema teh sacara religius boga 'ilham' anu sarua yen pikeun nandakeun pamujaan ka Gusti Anu Maha Suci teh ditandaan ku wangunan saperti menhir? Terus lamun nyieun sesembahan saperti meuncit domba/sapi atawa hasil panen dilakukeun di hareupeun dolmen? Naha mungkin eta ilham anu sarua 'diilhamkeun' atawa 'diwahyukeun' ka sakumna jelema di dunya anu tempatda beda-beda? Sim kuring pernah nonton pilem dokumenter ngeunaan dipanggihana kagunaan seuneu ku jelema saencan homo sapiens. Pan awal na mah primata jiga monyet teh meureun can bisa ngagunakeun seuneu pikeun ngaasakan kadaharan atawa pikeun ngahaneutkeun sakuriling nyieun hawu/api unggun. Tah anu aheng teh, para ilmuwan manggihan yen titinggalan sajarah ayana kagunaan seuneue dina kahirupan primata saencan homo sapiens teh di wilayah dunya anu beda-beda teh tapina jamana dareukeut (dina jarak waktu/jaman anu sarua). Jadi jiga aya gejala 'ilham' pikeun nundukeun seuneu jeung ngagunakeun pikeun kaperluan sapopoe ka makhluk hirup jiga jelema (saencan moho sapiens) di sawilayah dunya dina jarak waktu deukeut/sarua. Kuring jadi mikir dina Al-Quran teh sababaraha kali disebut yen ka tiap kaum di dunya teh pasti pernah diutus nabi/rasul anu mawa pituduh ti Gusti nu Maha Suci. Tah meureun nyebarna kagunaan seuneu, wangunan menhir jeung dolmen, oge ditarima ku manusa (atawa manusa saencan homo sapiens) di tiap-tiap tempat di sakumna wilayah dunya ieu. Ari mizpah naon tah? Eta sim kuring basa keur kuliah resep pisan debat jeung pendeta. Jadi sim kuring rajin macaan kitab perjanjian lama jeung perjanjian baru. Oge sumber-sumber lian ngeunaan agama ibrahim (yahudi, kristen, islam). Disebutkeun yen Ibrahim teh kapala suku nomaden. Diperkirakeun yen Ibrahim teh mimpin kaumna pipindahan (nomaden) ti hiji tempat ka tempat lain, neangan tempat anu hade pikeun ternak domba jeung nu lianna. Kaum Ibrahim jumlahna bisa ratusan, jadi sakali pindah teh ngadangdaleut kabayang terus lamun manggih tempat anyar marasang tenda. Disebutkeun oge yen Ibrahim sok ngajalin kerja sama jeung pangawasa satempat samisal raja-raja atawa tuan tanah anu deukeut lokasina jeung pamukinan kaum Ibrahim. Tah, oge kasebut, kulantaran sok pipindahan, di tiap tempat anyar Ibrahim sok nyieun tempat pamujaan atawa tempat ibadah anu dicirian ku batu nangtung. Eta batu teh sok diminyakan. Lamun pindah tempat kadang sok dibawa pindah, ditempatkeun di tempat anyar. Eta batu teh kulantaran diminyakan mangtaun-taun bisa nepikeun ka hideung warnana. Tah ceuk ahli sajarah taurat mah eta batu teh disebut mispa, atawa mizpah/mizpeh ceuk bahasa ibrani yahudi mah. Ari harti kecap mizpeh dina bahasa ibrani teh nyaeta 'iketan janji'. Bisa artina iketan janji manusa jeung Gusti nu Maha Suci. Tapi oge sok dipake dina iketan janji/sumpah manusa anu hirup ka jelema anu geus maot, misalnya luluhurna. Basa Ibrahim ngalongok Ismail anu geus mukim di daerah arab, oge Ibrahim ngawangun tempat ibadah bareng jeung Ismail. Eta tempat ibadah oge diwangun tina batu. Eta tempat pamujaan teh ayeuna disebut Ka'bah. Wangunan segi opat tina batu. Ari baheula na mah cenah teu persis jiga wangunan Ka'bah ayeuna. Meureun geus direstorasi sababara kali jadi jiga anu ayeuna. Ieu tema teh menarik pisan pikeun sim kuring, yen dina sajarah manusa teh aya ciri religius. Manusa yakin aya pangawasa dunya (jeung akherat) anu nangtukeun bagja jeung cilaka kahirupan manusa. Pikeun ngajalin hubungan jeung pangawasa eta, manusa sok ngawangun tembat ibadah. Budaya jiga kieu teh meureun nyebar ka sakumna manusa di dunya ku cara-cara anu teu persis sarua tapi oge loba saruana. Anu dibewarakeun dina Al-Quran ampir kabeh yen nabi jeung rasul teh tina katurunan Ibrahim. Tapi ceuk Al-Quran oge yen kabeh kaum geus kungsi dikirim utusan (rasul) ti Gusti nu Maha Suci. Jadi pastina oge di india, di tatar sunda kuno, oge teu mustahil geus loba utusan anu dikirim ku Gusti nu Maha Suci. Nya ngarana moal nabi atawa rasul meureun da eta mah kecap tina bahasa arab. Pastina oge aya ngaran lainna. Atawa oge teu perlu diaranan. Ngan hanyakal masalah nu kieu teh sok digampangkeun dina pangajaran agama teh. Kulantaran urang geus ngagem agama Islam misalna, sok aya kacenderungan ngajejeleh budaya agama lian. Sok nyeungseurikeun budaya agama kuno. Padahal dina jamana aya rasulna masing-masing, artina aya syareat masing-masing anu teu bisa dihakiman ku pamikiran atawa cara pandang urang ayeuna. Urang kudu neuleman ku cara pandang dina jamana masing-masing (sewang-sewangan?). Tah pikeun muka wawasan anak incu urang, perlu pisan urang ngabogaan guru-guru agama anu wawasana lega, jero batinna. Lain ngan saukur guru agama anu geus tamat diajar agama sacara tekstual terus teu ngahargaan budaya lian. Padahal urang kudu ningali sakabeh budaya teh saperti citra-na gusti nu maha suci. Wallahu'alam Febi Ahmad Hazairin ===================
