http://m.vijaykarnataka.com/edit-oped/columns/net-nota-sudhindra-haldodderi/articleshow/53827378.cms
*ನೆಟ್ ನೋಟ: ತಟ್ಟೆ, ಚಮಚೆ, ತಿಂಡಿ ಪೊಟ್ಟಣವನ್ನೂ ಮೆಲ್ಲಬಹುದು!* Aug 24, 2016, 04.00 AM IST Whatsapp <javascript:void(0);>Facebook <javascript:void(0);>Google Plus <javascript:void(0);>Twitter <javascript:void(0);>Email <javascript:void(0);>SMS <javascript:void(0);> bng-2308-2-2-food AAA ನೆಟ್ ನೋಟ: ಸುಧೀಂದ್ರ ಹಾಲ್ದೊಡ್ಡೇರಿ ಮೊನ್ನೆ ಮದುವೆ ಮನೆಯೊಂದರಲ್ಲಿ ಊಟ ಮಾಡುತ್ತಿದ್ದಾಗ, ಬದನೆಕಾಯಿಯ ದಪ್ಪನೆಯ ಹೋಳೊಂದನ್ನು ಪ್ಲಾಸ್ಟಿಕ್ ಚಮಚೆಯಿಂದ ನಾನು ತುಂಡರಿಸುವಷ್ಟರಲ್ಲಿ ಅದು ಮುರಿದುಬಿತ್ತು. ತಟ್ಟೆಯಲ್ಲಿಯೇ ಗಟ್ಟಿಯಾಗಿದ್ದ ಹಲಸಿನ ಹಪ್ಪಳದ ಚೂರುಗಳೆರಡು ನನ್ನ ಊಟಕ್ಕೆ ಚಮಚೆಯ ನೆರವು ನೀಡಿತು. ಪಕ್ಕದಲ್ಲಿದ್ದ ಭೌತವಿಜ್ಞಾನ ಪ್ರಾಧ್ಯಾಪಕರು ಇನ್ನು ಮುಂದೆ ಊಟದ ಜತೆಗೆ ತಿಂದು ಮುಗಿಸಬಲ್ಲ ಚಮಚೆಗಳು ಬಳಕೆಗೆ ಬರಬೇಕೆಂದರು. ಕಳೆದ ವಾರವಷ್ಟೇ ಔತಣಕೂಟವೊಂದರಲ್ಲಿ ತಟ್ಟೆಯೊಂದಿಗೆ ಸಿಕ್ಕ ಸ್ಟೇನ್ಲೆಸ್ ಸ್ಟೀಲ್ ಲೇಪನವಿದ್ದ ಪ್ಲಾಸ್ಟಿಕ್ ಚಮಚ ನನ್ನನ್ನು ಬೇಸ್ತು ಬೀಳಿಸಿತ್ತು. ಸಮೋಸ ತಿಂದು ಮುಗಿಸುವಷ್ಟರಲ್ಲಿ ಚಮಚೆಯ ಮೇಲಿನ ಬಣ್ಣದ ಲೇಪನದ ಅರ್ಧ ಭಾಗ ನನ್ನ ಹೊಟ್ಟೆಯನ್ನು ಸೇರಿತ್ತು. ಪರಿಸರ ಕಾಳಜಿಯ ಊಟದ ಮನೆಗಳಲ್ಲಿ ಇದೀಗ ಅಡಿಕೆ ಹಾಳೆಯ ತಟ್ಟೆ ಮತ್ತು ದೊನ್ನೆಗಳು ಪ್ರವೇಶ ಮಾಡಿವೆ. ಆದರೆ ಪ್ಲಾಸ್ಟಿಕ್ ಚಮಚೆಯ ಸ್ಥಾನವನ್ನು ಪಲ್ಲಟಗೊಳಿಸಲು ಸಾಧ್ಯವಾಗಿಲ್ಲ. ದಿನಸಿ ಮಳಿಗೆಗೆ ನೀವು ಭೇಟಿ ಕೊಟ್ಟಾಗ ಗಮನಿಸಿರಬಹುದು. ಬೆಣ್ಣೆ, ಗಿಣ್ಣು, ಚೀಸ್, ಮಾಂಸ, ಬ್ರೆಡ್, ಕತ್ತರಿಸಿದ ಹಣ್ಣು, ಚಾಕೊಲೇಟ್ ಸೇರಿದಂತೆ ಬಹುತೇಕ ಆಹಾರ ಸಾಮಗ್ರಿಗಳನ್ನು ತೆಳುವಾದ ಪಾರದರ್ಶಕ ಪ್ಲಾಸ್ಟಿಕ್ ಹಾಳೆಗಳಿಂದ ಸುತ್ತಿರಲಾಗುತ್ತದೆ. ಮರುಬಳಸಲಾಗದ ಈ ತೆಳು ಪ್ಲಾಸ್ಟಿಕ್ ಹಾಳೆಗಳು ಎಂದಿಗೂ ಕೊಳೆಯದ ಕಸದ ರಾಶಿಗಳಲ್ಲಿ ಸೇರ್ಪಡೆಯಾಗುತ್ತವೆ. ಹಾಗೆಯೇ ತೀರಾ ತೆಳುವಾದ ಇದರ ಮೇಲ್ಮೈಗೆ ಮೆತ್ತಿಕೊಳ್ಳುವ ಆಹಾರ ಪದಾರ್ಥಗಳು ಬಳಕೆಯಾಗದೆಯೇ ವ್ಯರ್ಥವಾಗುತ್ತವೆ. ಕರ್ನಾಟಕದಲ್ಲಿ ಈ ಹಿಂದೆ ನಲವತ್ತು ಮೈಕ್ರಾನ್ಗಿಂತಲೂ ಕಡಿಮೆ ದಪ್ಪದ ಪ್ಲಾಸ್ಟಿಕ್ ಬಳಸುವಂತಿರಲಿಲ್ಲ. ಇದೀಗ ಕರ್ನಾಟಕವು ಪ್ಲಾಸ್ಟಿಕ್ ಮುಕ್ತ ರಾಜ್ಯವಾಗುವತ್ತ ಹೆಜ್ಜೆ ಹಾಕುತ್ತಿದೆ. ಅತ್ಯಾಧುನಿಕ ತಂತ್ರಜ್ಞಾನದ ತೆಳು ಪ್ಲಾಸ್ಟಿಕ್ ಹಾಳೆಗಳು ಸಹಾ ಕೆಲವೊಮ್ಮೆ ತಮ್ಮೊಡಲೊಳಗಿನ ವಿಷ ಪದಾರ್ಥಗಳನ್ನು ಆಹಾರಕ್ಕೆ ನಿಧಾನಗತಿಯಲ್ಲಿ ರವಾನಿಸುತ್ತಿರುತ್ತವೆ. ಇದು ಕೇವಲ ಭಾರತಕ್ಕಷ್ಟೇ ಸೀಮಿತವಾದ ಸಮಸ್ಯೆಯಲ್ಲ. ಜನಸಂಖ್ಯೆ ಕಡಿಮೆಯಿದ್ದರೂ ತಲಾ ಪ್ಲಾಸ್ಟಿಕ್ ಬಳಕೆ ಹೆಚ್ಚಿರುವ ಅಮೆರಿಕ ಹಾಗೂ ಯುರೋಪ್ ದೇಶಗಳಲ್ಲಿ ಇದು ಉಲ್ಬಣಗೊಳ್ಳುತ್ತಿರುವ ತೊಂದರೆಯಾಗಿದೆ. ಆಹಾರ ಪದಾರ್ಥಗಳು ಕೆಡಲು ಮುಖ್ಯ ಕಾರಣ ವಾತಾವರಣದ ಆಮ್ಲಜನಕೊಂದಿಗಿನ ಅವುಗಳ ಸಂಯೋಗ. ಗಾಳಿ ಅದರಲ್ಲೂ ವಿಶೇಷವಾಗಿ ಆಮ್ಲಜನಕದೊಂದಿಗಿನ ಸಂಪರ್ಕ ತಪ್ಪಿಸಲೆಂದೇ ಪ್ಲಾಸ್ಟಿಕ್ ಹಾಳೆ ಸೇರಿದಂತೆ ಅನೇಕ ಸಾಮಗ್ರಿಗಳ ಕವಚಗಳನ್ನು ಆಹಾರದ ಮೇಲೆ ಹೊದಿಸಲಾಗುತ್ತದೆ. ಇವುಗಳ ಬದಲಾಗಿ ನಿರ್ಮಾಣಗೊಳ್ಳುವ ಯಾವುದೇ ಕವಚವು ಆಹಾರವನ್ನು ಕೆಡದಂತೆ ಕಾಪಾಡಬೇಕು, ಕಾಲಾಂತರದಲ್ಲಿ ಪರಿಸರಕ್ಕೆ ತ್ಯಾಜ್ಯದ ಹೊರೆಯಾಗಬಾರದು, ಬಳಸಲು ಸುಲಭ ಹಾಗೂ ತಯಾರಿಸಲು ಅಗ್ಗವಾಗಿರಬೇಕು. ಅಮೆರಿಕದ ಕೃಷಿ ಇಲಾಖೆಯ ವಿಜ್ಞಾನಿಗಳು ಆಹಾರ ಬಳಕೆಯ ನಂತರ ಅದಕ್ಕೆ ಹೊದಿಸಿದ ಹಾಳೆಯನ್ನು ವೈಜ್ಞಾನಿಕವಾಗಿ ಸಂಸ್ಕರಿಸುವ ಕುರಿತು ಅನೇಕ ಸಂಶೋಧನೆಗಳನ್ನು ನಡೆಸಿದ್ದಾರೆ. ಕಳೆದ ಗುರುವಾರ 'ಅಮೆರಿಕನ್ ಕೆಮಿಕಲ್ ಸೊಸೈಟಿ'ಯ ವಾರ್ಷಿಕ ವಿಜ್ಞಾನ ಮೇಳದಲ್ಲಿ ಆ ವಿಜ್ಞಾನಿಗಳು ಮಂಡಿಸಿರುವ ಪ್ರೌಢ ಪ್ರಬಂಧ ಆಹಾರ ತಜ್ಞರ ಗಮನ ಸೆಳೆದಿದೆ. ಅವರ ಸಂಶೋಧನೆಗಳ ಪ್ರಕಾರ ಪ್ರೊಟೀನ್-ಆಧರಿತ ತೆಳು ಹಾಳೆಗಳು ಆಮ್ಲಜನಕದ ಪ್ರವೇಶವನ್ನು ಸಮರ್ಥವಾಗಿ ತಡೆಗಟ್ಟಬಲ್ಲವು. ಇದರಿಂದಾಗಿ ಪ್ರೊಟೀನ್-ಆಧರಿತ ಹಾಳೆಗಳೊಳಗೆ ಅಡಕವಾಗಿರುವ ಆಹಾರ ಪದಾರ್ಥಗಳು ಹೆಚ್ಚು ಕಾಲ ಕೆಡಲಾರವು. ಈ ಸಂಶೋಧನಾ ತಂಡದ ನೇತೃತ್ವ ವಹಿಸಿರುವ ಡಾ. ಪೆಗ್ಗಿ ಟೊಮಸುಲ ಅವರ ಪ್ರಕಾರ ಇಂಥ ತೆಳು ಹಾಳೆಗಳ ಬಳಕೆಯಿಂದ ಆಹಾರ ಸಂರಕ್ಷ ಣೆಯಾಗುವುದರ ಜತೆಗೆ ಪೆಟ್ರೋಲಿಯಂ-ಆಧರಿತ ಪ್ಲಾಸ್ಟಿಕ್ ಬಳಕೆಗೆ ಕಡಿವಾಣ ಹಾಕಿದಂತಾಗುತ್ತದೆ. ಬಹುತೇಕ ಸ್ತನಿಗಳ ಹಾಲಿನಲ್ಲಿ ಲಭ್ಯವಿರುವ ಕೆಸೀನ್ ಎಂಬ ಪ್ರಮುಖ ಪ್ರೊಟೀನ್ ಬಗ್ಗೆ ನೀವು ಕೇಳಿರಬಹುದು. ಆಕಳ ಹಾಲಿನ ಪ್ರತಿಶತ ಎಂಬತ್ತರಷ್ಟು ಭಾಗ ಈ ಪ್ರೊಟೀನ್ ಅಂಶವಿರುತ್ತದೆ. ಮೊಲೆಯೂಡಿಸುವ ತಾಯಂದಿರ ಹಾಲಿನಲ್ಲಿ ಇದರ ಪ್ರಮಾಣ ಇಪ್ಪತ್ತರಿಂದ ನಲವತ್ತೈದು ಪ್ರತಿಶತವಿರುತ್ತದೆ. ಆಕಳ ಹಾಲಿನ ಕೆಸೀನ್ ಅನ್ನು 'ಚೀಸ್' ತಯಾರಿಕೆಯಲ್ಲಿ ಹೆಚ್ಚು ಬಳಸಲಾಗುತ್ತದೆ. ಕೆಲವೊಂದು ಆಹಾರಗಳಲ್ಲಿ ಪೌಷ್ಠಿಕಾಂಶದ ಸೇರ್ಪಡೆಗೂ ಇದೇ ಪ್ರೊಟೀನ್ ಉಪಯುಕ್ತವಾಗಿದೆ. ಈ ಪ್ರೊಟೀನಿನ ಮುಖ್ಯ ಅಂಶಗಳೆಂದರೆ ಅಮೈನೊ ಆಮ್ಲಗಳು, ಕಾರ್ಬೊಹೈಡ್ರೇಟ್ಗಳು, ಕ್ಯಾಲ್ಶಿಯಂ ಮತ್ತು ಪೊಟಾಶಿಯಂ. ಹೀಗಾಗಿ ಮಕ್ಕಳ ಬೆಳವಣಿಗೆಯಲ್ಲಿ ಈ ಪ್ರೊಟೀನಿನ ಪಾತ್ರ ಮಹತ್ವದ್ದು. ವಿಶೇಷ ಸಂಗತಿಯೆಂದರೆ ಬಣ್ಣ ಮತ್ತು ಅಂಟುಗಳ ತಯಾರಿಕೆಯಲ್ಲಿ ಯೂ ಈ ಪ್ರೊಟೀನನ್ನು ಬಹಳ ಬಳಸಲಾಗುತ್ತಿದೆ. ಕಲಾವಿದರು ಬಳಸುವ ನೀರಿನಲ್ಲಿ ಕರಗುವ ಬಣ್ಣಗಳಲ್ಲಿ ಕೆಸೀನ್ ಸೇರಿಸಿದಲ್ಲಿ, ಬಣ್ಣದ ಬರಹ ಅಥವಾ ಲೇಪನ ಅತ್ಯಂತ ಶೀಘ್ರವಾಗಿ ಒಣಗುತ್ತದೆ. ಅಕ್ರಿಲಿಕ್ ಹೊಳಪಿನ ಬಣ್ಣಗಳು ಬಳಕೆಗೆ ಬಂದಂತೆ ಕೆಸೀನ್ ಮಿಶ್ರಣದ ಬಣ್ಣಗಳ ಉಪಯೋಗ ಕಡಿಮೆಯಾಯಿತು. ಆದರೆ ಮರಗೆಲಸದಲ್ಲಿ ಬಳಸುವ ಅಂಟಿನಲ್ಲಿ, ವಿಶೇಷವಾಗಿ ಪ್ರಯೋಗಾಲಯಗಳಲ್ಲಿ ನಿರ್ಮಿಸುವ ವಿಮಾನ ಮಾದರಿಗಳ ಬಿಡಿಭಾಗಗಳ ಜೋಡಣೆಯ ಗೋಂದಿನಲ್ಲಿ ಕೇಸಿನ್ ಪ್ರೊಟೀನಿನ ಉಪಯೋಗ ಹೆಚ್ಚು. ಅಷ್ಟೇಕೆ, ನಮ್ಮ ನಿತ್ಯ ಬಳಕೆಯ ಬೆಂಕಿ ಕಡ್ಡಿಗಳಲ್ಲಿ ಮದ್ದಿನಂಶವನ್ನು ಕೂರಿಸುವಲ್ಲಿಯೂ ಕೇಸಿನ್ ನೆರವಾಗುತ್ತದೆ. ಬಹಳ ಹಿಂದೆ ಹಲ್ಲಿನ ರಿಪೇರಿ ಕಾರ್ಯದಲ್ಲಿಯೂ ಇದೇ ಪ್ರೊಟೀನ್ ಅನ್ನು ಬಳಸಲಾಗುತ್ತಿತ್ತು. ಆರಂಭದ ದಿನಗಳ ಪ್ಲಾಸ್ಟಿಕ್ ನೂಲುಗಳು ಮತ್ತು ಹಾಳೆಗಳ ತಯಾರಿಕೆಯಲ್ಲಿಯೂ ಇದರ ಉಪಯೋಗವಿತ್ತು. ಮತ್ತೆ, ನಮ್ಮ ಆಹಾರ ಹೊದಿಕೆಯ ವಿಷಯಕ್ಕೆ ಬರುವುದಾದರೆ, ಡಾ. ಟೊಮಸುಲ ಅವರ ನೇತೃತ್ವದ ತಂಡವು ಹಾಲಿನ ಕೇಸಿನ್ ಅನ್ನು ಬಳಸಿಕೊಂಡ ತೆಳು ಹಾಳೆಗಳ ಮೇಲೆ ಸುದೀರ್ಘ ಕಾಲದ ಪ್ರಯೋಗಗಳನ್ನು ನಡೆಸಿದೆ. ಸಾಮಾನ್ಯ ಬಳಕೆಯ ಪ್ಲಾಸ್ಟಿಕ್ ತೆಳು ಹಾಳೆಗೊಳೊಂದಿಗಿನ ತುಲನಾತ್ಮಕ ಅಧ್ಯಯನದಲ್ಲಿ ಅದು ಕಂಡುಕೊಂಡ ವಿಷಯವೇನೆಂದರೆ, ಆಮ್ಲಜನಕವನ್ನು ತಡೆಗಟ್ಟುವ ಸಾಮರ್ಥ್ಯದಲ್ಲಿ ಕೇಸಿನ್ ಹಾಳೆಗಳು ಐದು ನೂರು ಪಟ್ಟು ಹೆಚ್ಚು ಉತ್ತಮ. ಹಾಲು ಮೂಲ ದ್ರವ್ಯವಾಗಿರುವುದರಿಂದ ಈ ಹಾಳೆಗಳು ಪರಿಸರದಲ್ಲಿ ಸುಲಭವಾಗಿ ಲೀನವಾಗಬಲ್ಲವು. ಎಲ್ಲಕ್ಕೂ ಮಿಗಿಲಾಗಿ ಇವು ಖಾದ್ಯ ಪದಾರ್ಥಗಳಾಗಿರುವುದರಿಂದ, ಬಿಸುಡುವ ಬದಲು ಇವನ್ನು ನೇರವಾಗಿ ತಿನ್ನಲೂಬಹುದು. ಸದ್ಯಕ್ಕೆ ಬಳಕೆಯಲ್ಲಿರುವ ತಿನ್ನಬಹುದಾದ ಹೊದಿಕೆಗಳನ್ನು ಪಿಷ್ಟದಿಂದ ನಿರ್ಮಿಸಲಾಗುತ್ತಿದೆ. ಕೇಸಿನ್ಗೆ ಹೋಲಿಸಿದರೆ ಪಿಷ್ಟವು ಹೆಚ್ಚು ಜಾಳು ಜಾಳಾಗಿರುತ್ತದೆ. ಅಂದರೆ ಪಿಷ್ಟದಿಂದ ತಯಾರಿಸಿದ ಹಾಳೆಯಲ್ಲಿನ ಸೂಕ್ಷ ್ಮ ರಂಧ್ರಗಳು ಆಮ್ಲಜನಕದ ಹರಿದಾಟಕ್ಕೆ ಅನುವು ಮಾಡಿಕೊಡುತ್ತದೆ. ಆದರೆ, ಕೇಸಿನ್ನ ಹಾಳೆಯಲ್ಲಿ ರಂಧ್ರಗಳ ಗಾತ್ರ ಅತ್ಯಂತ ಕಿರಿದಾಗಿರುವುದರಿಂದ ಆಮ್ಲಜನಕವು ಸುಲಭವಾಗಿ ಪ್ರವೇಶಿಸಲು ಸಾಧ್ಯವಿಲ್ಲ. ಕೇಸಿನ್ ಬಳಸಿ ನಿರ್ಮಿಸಿದ ಹಾಳೆಗಳು ಮೊದಲ ಮಾದರಿ ಪರೀಕ್ಷೆಗಳಲ್ಲಿ ಸಾಕಷ್ಟು ಸವಾಲುಗಳನ್ನು ಒಡ್ಡಿದ್ದವು. ಉದಾಹರಣೆಗೆ, ಆಮ್ಲಜನಕದ ಹರಿದಾಟಕ್ಕೆ ಅನುವು ಮಾಡಿಕೊಡದಿದ್ದರೂ, ತೇವಾಂಶ ಹೆಚ್ಚಿದ್ದ ಕಡೆ ಅವು ಕರಗಿ ಹೋಗುತ್ತಿದ್ದವು. ಹೆಚ್ಚಿನ ತಾಪಮಾನವನ್ನು ತಡೆದುಕೊಳ್ಳಲು ಅವುಗಳಿಗೆ ಆಗುತ್ತಿರಲಿಲ್ಲ. ಹಾಗೆಯೇ ತಿನ್ನಲು ಬಹಳ ಗಟ್ಟಿಯಾಗಿರುತ್ತಿದ್ದವು. ಈ ನ್ಯೂನತೆಗಳನ್ನು ಮನಗಂಡ ವಿಜ್ಞಾನಿ ತಂಡವು, ಕೇಸಿನ್ ಪ್ರೊಟೀನಿನ ಜತೆಗೆ ಕುಸುಮಭರಿತ ಫಲಗಳಲ್ಲಿ ಸಿಗುವಂಥ ಸಿಟ್ರಸ್ ಪೆಕ್ಟಿನ್ ಎಂಬ ಪ್ರೊಟೀನ್ ಪೌಷ್ಟಿಕಾಂಶವನ್ನು ಸೂಕ್ತ ಪ್ರಮಾಣದಲ್ಲಿ ಬೆರೆಸಿ ಪರೀಕ್ಷೆಗಳನ್ನು ನಡೆಸಿತು. ಇಂಥ ಸಮ್ಮಿಶ್ರ ಪದಾರ್ಥಗಳಿಂದ ನಿರ್ಮಿಸಿದ ಹಾಳೆಗಳು ಕೇಸಿನ್ ಹಾಳೆಗಳಿಗಿಂತಲೂ ಸದೃಢವಾಗಿದ್ದವು. ಹಾಗೆಯೇ ವಾತಾವರಣದ ತೇವಾಂಶ, ಹೆಚ್ಚಿನ ತಾಪಮಾನವನ್ನು ತಾಳಿಕೊಳ್ಳುವ ಸಾಮರ್ಥ್ಯಗಳನ್ನೂ ಹೊಂದಿದ್ದವು. ಈ ಫಲಿತಾಂಶಗಳಿಂದ ಉತ್ತೇಜಿತರಾದ ವಿಜ್ಞಾನಿಗಳು, ತೆಳು ಹಾಳೆಗಳಿಗೆ ಮತ್ತಷ್ಟು ಮಾರ್ಪಾಡುಗಳನ್ನು ಮಾಡಿದರು. ಇದೀಗ ಡಾ. ಟೊಮಸುಲ ಅವರ ತಂಡವು ಮಾರುಕಟ್ಟೆಗೆ ತರಲಿಚ್ಚಿಸಿರುವ ಹಾಳೆಗಳು ಥೇಟ್ ನಮ್ಮ ನಿತ್ಯ ಬಳಕೆಯ ಪ್ಲಾಸ್ಟಿಕ್ ಹಾಳೆಗಳಂತೆಯೇ ತೋರುತ್ತವೆ. ಎಲಾಸ್ಟಿಕ್ ಗುಣಗಳು ಅಷ್ಟಿರದಿದ್ದರೂ, ಆಮ್ಲಜನಕದ ಪ್ರವೇಶವನ್ನು ತಡೆಗಟ್ಟುವಲ್ಲಿ ಹೆಚ್ಚು ಸಮರ್ಥವಾಗಿವೆ. ಸಂಪೂರ್ಣವಾಗಿ ಪ್ರೊಟೀನುಗಳಿಂದಲೇ ಇವುಗಳನ್ನು ತಯಾರಿಸಿರುವುದರಿಂದ ಮಕ್ಕಳೂ ಸಹಾ ಸುಲಭವಾಗಿ ಇವುಗಳನ್ನು ಜೀರ್ಣಿಸಿಕೊಳ್ಳಬಹುದು. ಈ ಬಗೆಯ ಉತ್ಪನ್ನಕ್ಕೆ ಮುಂದಿನ ದಿನಗಳಲ್ಲಿ ಬಹುದೊಡ್ಡ ಬೇಡಿಕೆಯಿರುವುದನ್ನು ಮನಗಂಡಿರುವ ವಿಜ್ಞಾನಿಗಳ ತಂಡವು, ಅತಿ ಶೀಘ್ರದಲ್ಲಿಯೇ ತಂತ್ರಜ್ಞಾನ ವರ್ಗಾವಣೆಗೆ ಸಜ್ಜಾಗುತ್ತಿದೆ. ಒಮ್ಮೆಲೆ ಸೇವಿಸಬಲ್ಲ ಆಹಾರ ಪೊಟ್ಟಣಗಳು ಅಂದರೆ ಒಬ್ಬರು ತಮ್ಮ ಮುಂಜಾನೆಯ ಉಪಾಹಾರಕ್ಕೆ ಸೇವಿಸಬಲ್ಲಷ್ಟೇ ಪ್ರಮಾಣದ ಪೊಟ್ಟಣಗಳ ಮಾರುಕಟ್ಟೆ ದೊಡ್ಡದಾಗಿದೆ. ಈ ಬಗೆಯ ಹಾಳೆಗಳನ್ನು ಪೊಟ್ಟಣಗಳ ತಯಾರಿಕೆಗೆ ಬಳಸುವುದರಿಂದ ಆಹಾರವು ಸೇವನೆಯ ಮುನ್ನ ಹೆಚ್ಚು ತಾಜಾ ಆಗಿರಬಲ್ಲದು. ಕೇಸಿನ್ ಅನ್ನು ಹಾಳೆಗಳಾಗಿ ಪರಿವರ್ತಿಸುವ ಬದಲು ಸಿಂಚನದ ದ್ರವವನ್ನಾಗಿ ಬಳಸಬಹುದೆ? ಎಂಬ ಪರಿಶೀಲನೆಯೂ ನಡೆಯುತ್ತಿದೆ. ಉದಾಹರಣೆಗೆ ಕಾರ್ನ್ ಫ್ಲೇಕ್ಸ್ ಸೇರಿದಂತೆ ಸೀರಿಯಲ್ಗಳನ್ನು ಹಾಲಿನೊಂದಿಗೆ ಸೇವಿಸುವ ಪರಿಪಾಠ ಹೆಚ್ಚುತ್ತಿದೆಯಲ್ಲವೆ? ವಿವಿಧ ಸ್ವಾದದ ಕಾರ್ನ್ ಫ್ಲೇಕ್ಸ್ಗಳನ್ನು ಗರಿಮುರಿಯಾಗಿಡಲು, ಅವುಗಳ ಮೇಲೆ ಸಕ್ಕರೆಯ ಲೇಪನ ಮಾಡುವ ವಾಡಿಕೆಯಿದೆ. ಸಕ್ಕರೆಯನ್ನು ವರ್ಜಿಸುವವರಿಗಾಗಿ, ಕಾರ್ನ್ ಫ್ಲೇಕ್ಸ್ ತುಣಕುಗಳ ಮೇಲೆ ಕೇಸಿನ್ ಸಿಂಚನ ಮಾಡುವ ಬಗ್ಗೆ ಪರಿಶೀಲನೆಗಳು ನಡೆಯುತ್ತಿವೆ. ಪೀಡ್ಝಾ ಸೇರಿದಂತೆ ಅನೇಕ ಎಣ್ಣೆ-ಬೆಣ್ಣೆ-ತುಪ್ಪ-ಚೀಸ್ ಲೇಪಿತ ಆಹಾರಗಳ ಮೇಲೂ ಕೇಸಿನ್ ಅನ್ನು ಸಿಂಚನ ಮಾಡಬಹುದು. ಅಮೆರಿಕದ ಆಹಾರ ಮತ್ತು ಔಷಧ ಪ್ರಾಧಿಕಾರವು ಇಂಥ ಆಹಾರಗಳಲ್ಲಿ ಸದ್ಯಕ್ಕೆ ಬಳಕೆಯಲ್ಲಿರುವ ಪರ್-ಫ್ಲೋರಿನೇಶನ್ ಸಿಂಚನಕ್ಕೆ ನಿಷೇಧ ಹೇರಿದೆ. ಅತ್ಯಂತ ಸುರಕ್ಷ ಹಾಗೂ ಪರಿಸರಕ್ಕೆ ಹಾನಿಯುಂಟು ಮಾಡದ ಜತೆಗೆ ಆಹಾರದೊಂದಿಗೇ ಸೇವಿಸಬಹುದಾದ ಕೇಸಿನ್ ಸಿಂಚನಕ್ಕೆ ಅನುಮೋದನೆ ಸಿಗಬಹುದು. ಮುಂದಿನ ಮೂರು ವರ್ಷಗಳಲ್ಲಿ ಕೇಸಿನ್ ಹಾಳೆಗಳು ಮತ್ತು ಸಿಂಚನಗಳು ನಮ್ಮ ಊಟದ ಮೇಜಿನ ಮೇಲೆ ರಾರಾಜಿಸುವ ನಿರೀಕ್ಷೆಯಿದೆ. Hareeshkumar K GHS HUSKURU MALAVALLI TQ MANDYA DT MOB 9880328224 -- 1. If a teacher wants to join STF, visit http://karnatakaeducation.org.in/KOER/en/index.php/Become_a_STF_groups_member 2. For STF training, visit KOER - http://karnatakaeducation.org.in/KOER/en/index.php 4. For Ubuntu 14.04 installation, visit http://karnatakaeducation.org.in/KOER/en/index.php/Kalpavriksha 4. For doubts on Ubuntu, public software, visit http://karnatakaeducation.org.in/KOER/en/index.php/Frequently_Asked_Questions 5. Are you using pirated software? Use Sarvajanika Tantramsha, see http://karnatakaeducation.org.in/KOER/en/index.php/Why_public_software ಸಾರ್ವಜನಿಕ ಇಲಾಖೆಗೆ ಸಾರ್ವಜನಿಕ ತಂತ್ರಾಂಶ --- You received this message because you are subscribed to the Google Groups "Maths & Science STF" group. To unsubscribe from this group and stop receiving emails from it, send an email to [email protected]. To post to this group, send an email to [email protected]. Visit this group at https://groups.google.com/group/mathssciencestf. For more options, visit https://groups.google.com/d/optout.
