|
Assalamu'alaikum
wr.wb.
INDAK BULIAH BAKAMPANYE LAI
Patang ari ko sadang rami di Lapau Randah. Mungkin dek tigo ari lai ka Pamilu, abih pulang anak-anak sikola dari Padang, nan kasato mamiliah di kampuang. Di lapau ado Sutan Mantari, Malin Ameh, Bagindo Baro, Malin Deman. Ado pulo anak-anak bujang, mahasiswa-mahasiswa nan bak raso alah jadi urang santiang, maota pulitik, satangah bakampanye. Mangomentari calon pasangan presiden/wakia presiden nan limo pasang tu. Katiko itulah mak Marah masuak ka lapau. Mato urang nan ado dalam lapau mancaliak ka baliau. 'Ha.... Ko baru basobok
lawan kalian. Cubolah tanyoan diang ka nyiak Marah tu, Jal. Sia dino nan ka
dipiliah no?' Bagindo Baro langsuang maonyok-an carito. 'Aa nan ka ditanyoan ka
den? Urang ndak buliah bakampanye lai. Wakatu bakampanye alah abih. Kini
pikia-an sainlah di awak surang-surang lai. Kok nan maa - nan maa nan
ka dipiliah,' mak Marah langsuang sajo manjawab. 'Eee indak baitu, doh.
Iko kan antaro awak samo awak. Iko kamanakan-kamanakan awak ko
sabantako mampakecek-an juo kalabiahan sarato kakurangan tiok-tiok calon tu. Baa
gak ati Marah?' Malin Ameh manangahi. 'Kalau kakurangan jo
kalabihan masiang-masiang calon tu kan alah ka samo tau pulo awak. Alah samo
didanga pulo kutubahno salamo sabulan ko. Timbang sinlah di awak masiang-masiang
lai kini,' jawek mak Marah. 'Tapi mangko nyiak.
Mungkin ado juo nan indak tau kakurangan baliau-baliau tu. Iko nan paralu
bana awak kaji. Sabab kok salah piliah awak, kok manang calon nan kurang
rancak, paliang indak limo taun lai awak musti mananti. Itupun kalau
indak dikicuahno pulo awak. Kok nyampang dikicuahno, bakuaso pulo no
agak duo puluah tahun dulu sabalun buliah diganti, kan ka batambah
seso nagari awak ko biko,' si Rijal mahasiswa tingkek duo di UBH bausao
malaluan ota. 'Iyo. Tapi sasudah jadi
panonton salamo sabulan ko kan alah ka cukuik rasono. Alah ka tau awak nan maa
nan ka dipiliah. Piliahlah bisuak ari Sinayan nan raso ka elok di awak,'
jawek mak Marah pulo baliak. 'Di sinan lah latak
kajino nyiak. Iko nan paralu awak pajaniah bana dulu. Sia di inyiak nan ka
inyiak piliah. Sadapek-dapekno tantu samo pandapek awak sakampuangko andakno.
Untuak kabaikan nagari awak nanti-nanti. Iko nan ingin awak jalehan. Baa
bana kalabihan jo kakurangan satiok calon tu,' tambah si Rijal
pulo. ‘Itu kan alah jaleh diang du. Kini satiok awak alah
tau sia nan ka dipiliah. Kini indak ado lai kampanye. Lah abih maso jo
katikono,’ kecek mak Marah pulo. ‘Kok salah piliah inyiak baa?’ tanyo si Rijal
manyasak. ‘Nan ka dikecekan salah jo bana tu nan maa? Piliahan
bana untuak ang, mungkin salah di
den. Piliahan den bana untuak den, mungkin salah untuak ang. Indak ado bana nan sabana bana do. Kini
samo mamintak sajo lah awak kapado Allah. Mudah-mudahan nan ka tapiliah bisuakko
nan sabana elok untuak urang banyak lah andakno.’ ‘Jadi indak amuah inyiak marundiangkan no lai
doh?’ ‘Rundiangan aa juo lai diang. Kok barundiang-rundiang
juo, bakampanye juo namo no tu lai. Kampanye lah salasai.’ ‘Jadih lah kalau baitu nyiak. Jadi awak piliah sajo
nan maa nan katuju di awak masiang-masiang bisuak. Baitu mah yo nyiak.’
‘Iyo baitu,’ jawek mak Marah pulo.
Si Rijal indak lanteh angan no lai nak
manaruihan. ‘Tapi, Marah. Lai tau Marah aa nan di karajoan
pareman di lapau si Tamburin?’ kecek Malin Ameh maaliah
carito. ‘Indak. Aa nan di karajoan mareka tu?’ jawek mak
Marah. ‘Dipataruahan mareka tu sia nan ka manang jadi presiden ko. Ado nan
mamacik Amin Raih, nan mamacik SBY, nan mamacik Wiranto,’ Malin Ameh
manjalehan. ‘Itu nan sabana babakaik baampok dumah. Ka
dipangaan pulo di awak lai,’ baleh
mak Marah. ‘Kan badoso du karajo sarupo tu,’ kecek Sutan
Mantari. ‘Itulah..... Di pareman-pareman tu indak kunjuang
jaleh juo arati doso bataruahko. Aa sajo jadi taruah. Urang main bal di nagari
si Patokah, jadi taruah. Oto lalu ilia mudiak jadi taruah. Tapi tatap paralu
juo awak manganaan, ka
kamanakan-kamanakan awak tu,’ mak Marah manambahkan.
*****
|
____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ___________________________________________________
