http://padangekspres.com/mod.php?mod=publisher&op=viewarticle&artid=204&PHPS ESSID=0148e015c6ce8515bf94ac49c54e6863
"Dicari..! Pamimpin Nan Punyo Taji Oleh redaksi Senin, 06-September-2004, 20:16:44 ///Rarak kalikih dek Binalu/// Tum buah sarumpun di tapi tabek./// Kok habih raso jo malu///Bak kayu lungga pangabek/// "MAA NYO mak Kari kamanakan..?" Tan Koti batanyo ka si Mira. "Alun baliak lai Tan. Lah duo hari baliau di kampuang manyalasaikan urusan kamanakan," jawek si Mira. "Baitu handaknyo niniak mamak di nagari ko. Kok kusuik manyalasai, karuah mampajaniah," ciloteh Tan Koti. "Buekan den teh pakek indak basariang ciek. Masuakan ka Mok nan den pitaruahkan di siko," pintak si Sutan. "Lai kasadonyo niniak mamak nan sarupo itu Tan," tanyo si bijak sambia mangacau gulo. Tan Koti mahelo angok dalam. "Itulah nan jadi panyakik di kampuang awak ko. Kok otanyo ka ilia ka mudiak. Satiok mangecek mamakai pantun sarato patatah patitiah. Kalau tasasak bana, sabuik se kalimaik sati Adaik Basandi Syara' Syara' Basandi Kitabullah. Lah raso jadi Datuak pulo awak tu mah," cimeeh Tan Koti. "Bunyi kecek marandang kacang. Bunyi muluik mambaka buluah. Indak sasuai kato jo pabuatan," sambuang si Mira. "Ha.iyo lah cadiak kau yo.," Tan Koti mamuji. "Sia dulu mamaknyo...," jawek nan mantiak sambia balari ka balakang. Pudin tibo-tibo dari pintu lapau. Tan Koti sanang hati indak tabado, sabab lah tibo pulo kapa gulo. Jo galak manih inyo babaso; "Iyo taragak bana awak jo dunsanak nan surang ko.Tambah lamo batambah bakilek tampak dek den." "Aponyo nan bakilek mak..?" sorak si Mira. "Jan manyindia kau piak. Mantang-mantang kapalo den sulah.," jawek Pudi. Tan Koti tagalak, si Mira takikik pulo di dapua. "Usah panyingguang bana. Apo nan katuju dek Uda siang hari ko.?" bujuak si mantiak. "Kocok-an den ciek." "Den iyo pulo.Pakek-an tehnyo, saketek gulo.Galehnyo nan paliang gadang yo." pasan Tan Koti mama san teh talua langganannyo. "Jan lupo.masuak-an ka buku hutang si Pudin," tukuaknyo. Pudin galak sengeang sajo. Inyo mangarati, Tan Koti indak mancari. Duduak di lapau satiok hari, sambia manunggu rasaki, kok lai ado nan bamurah hati. Malang bana bininyo mandapek laki. Pudin mangaluakan rokok, Tan Koti sato pulo maisok. "Mokasi Din..Dari tadi den alun marokok," keceknyo sambia mahiruik asok dalam-dalam. "Tnenk-tnenk..!" tadanga bunyi lonceang bendi. Udin Sunguik, mahelo tali, mahantikan kudo bendi. Ruponyo Mak Kari nan baru pulang dari kampuang jadi panumpang surang diri. Coga bana gayanyo. Baju guntiang Cino, sarawa Jao sapasang jo tarompa kudo.., eh tarompa kulik mungkasuik ambo. Saruang Bugih tasandang di bahu nyo nan bidang. Kopiah sampia, nan tabuek dari ikua Kudo, tatonggok di kapalo. Jokok dicaliak bana, sarupo jo jangguik tabaliak. Saroman jo rambuik Don King, runciang ka ateh, mancucuak langik. Sasudah mambaia seo bendi mak Kari baranjak ka tapi. Mira manyonsong jo balari. Sabana sanang hati mak Kari, mancaliak kamanakan nan lai babudi. Di lapau, Tan Koti tampak basanang hati, mancaliak pisang sarato lamang nan dijinjiang mak Kari. "Haa.Pucuak dicinto, lamang nan tibo.," katonyo dalam hati. Mak Kari duduak malapeh panek sambia bakipeh jo kopiah sampia. Indak lamo antaronyo, si Mira datang malatak-an aia. "Minumlah mak," kecek mampabasoi. "Baa kaba di kampuang Mak Kari...? tanyo Tan Koti. Sabalun manjawek, mak Kari tatagun sakutiko. Aia muko barubah, kaniangnyo bakaruik. Dijangkaunyo aia nan tahidang. Konconyop nan baduo jadi heran, apokoh sabab mangko mak Kari barek manjawek tanyo sakali ko. Di padiakannyo mak Kari mahelo angok, sambia manunggu barito nan elok. "Ampok jo maksiaik sabana manjadi-jadi..!" Mak Kari mangecek sambia manahan hati. Urang di lapau manahan diri, mancaliak mak Kari nan sadang manggaritih. "Masin judi talatak di tangah nagari, Di sinan lalulalang anak sikola satiok pagi. Nan ambo indak mangarati, masin judi nan banamo Mini Jackpot barado dakek rumah pak Bupati." "Lah habih bana raso jo pareso, lah hilang malu dalam diri. Bana juo kato rang tuo; "Habih miang dek bagisia, habih malu dek biaso," Pudin bakato ka badan diri. "Kalau ampok jo judi alah manjadi panyakik satiok nagari. Hampia di satiok tampek urang baralek disadiokan meja untuak bajudi kartu remi," Tan Koti sato sakaki. "Nan bedo bana, nan punyo alek Pak Haji...! "Maksiaik dikarajokan di tangah nan rami. Bagalanggang mato rang banyak, basuluah jo Matohari," sulo nan lain. "Lah hilang malu dalam diri. Indak ado lai takuik ka Polisi. Maksiaik dikarajokan barami-rami. Dari nan ketek sampai ka urang nan indak bagigi. Dari rakyaik sampai ka pagawai nagari. Indak babeda lai laki-laki jo padusi, ado pulo nan balaki-bini," tukuak Tan Koti. Dek biaso bajudi, anak kamanakan awak sanang mambuang-buang hari. Tamaik sikola inyo maleh mancari. Mabuak dek angan-angan sapanjang hari. Tulang bak kanji, salero bak taji. Cadiak malam binguang siang. Gilo maukia kayu tagak..! Mak Kari lah sasak dadonyo, indak tantu lai nan kadisabuiknyo. Inyo ambiak paisok, dibakanyo ujuangnyo. Matonyo mamandang asok nan tabang. "Den danga Pak Bupati lai Panghulu nagari. Tantu lai arih jo apo nan tajadi. ." solo Tn Koti. "Wakianyo ustad pulo. Lai gigiah managakan syariaik ugamo." sambuang Pudin. "Kadang-kadang awak bak si bisu barasian. Takana lai takatokan tidak. Elok indak takaluakan. Gadang indak mangatangahi. Sumangaik layua kalinduangan. Pangka kusuik ujuang bakaruik. Mambulalang di nan kalam. Mahariak di baliak bukik.! Bak Harimau kahilangan saiang, bak Gajah tangga gadiang," ciloteh Tan Koti. Mak Kari diam sajo. Tagak talingonyo mandanga kecek urang nan baduo. Maramang kuduaknyo dek manahan hati. Matonyo manarawang ka langik-langik lapau nan hitam dek asok kayu api. Sakalam harapannyo mananti maso nan kadatang. Di suduik paran, lawa-lawa mambuek sarang. Manambah kusuik pangana jo kaadaan. Jikok dikana ka balakang, Mi nangkabau tasabuik nagari nan tapandang. Adaik Basandi Syara', Syara' Basandi Kitabullah nan kito panggak-an. Alun bakilek alah baka lam, bulan lah sangkok tigo puluah. Alun takilek alah takalam, raso lah tibo dalam tubuah. Manusia tahan kieh, binatang tahan palu. Tagisia labiah bak kanai, tasingguang labiah bak jadi. (Viveri Yudi) ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
