http://padangekspres.com/mod.php?mod=publisher&op=viewarticle&artid=45&PHPSE SSID=0148e015c6ce8515bf94ac49c54e6863 Berita / Ciloteh Minang
"Jan Tapiliah Nan Palasu..!" Oleh redaksi Rabu, 01-September-2004, 16:46:12 ///Alang tukang tabuang kayu///Alang cadiak binaso adaik///Alang Malin binaso ugamo///Alang sapaham rusak nagari/// "Pakaro dukuang mandukuang ambo indak sato.!" Suaro Pudin manggaga sampai ka tapi jalan kampuang. Si Mira nan sadang di dapua sato takajuik. Piriang nan sadang dicucinyo hampia lapeh. Si Mira tatagun sakutiko, inyo taruih bakarajo dek karano inyo lah biaso mandanga nan sarupo itu di lapau tampek inyo manolong mamaknyo manggaleh ko. "Indak salasai.! Pangicuah.! Indak baradaik, Kalera.!" tadanga suaro Pudin labiah kareh dari nan tadi. Pudin tarabo. Matonyo sirah sarupo urang sakik mato. Mukonyo baitu pulo. Jirawek batu nan tatonggok di puncak hiduangnyo batambah sirah. Urek saga sagadang caciang mambalintang di kaniang lawehnyo, manggarik-garik. Lubang hiduangnyo kambang kampih, sarupo hiduang Kabau jalang. Salasai mahariak inyo tapurangah sambia basanda ka dindiang tadia di balakang pungguangnyo. Matonyo nana mamandang urang sabalik. "Baa mangko haniang sajo.?" sambuangnyo sambia mahambuihkan asok rokok dari lubang nan duo di ateh bibia lawehnyo. Mak Kari mambaranikan diri untuak batanyo. "Sia nan pangicuah sanak? Sia nan indak baradaik." "Alun juo awak jago lai..? Lah pakak talingo den mandanga gunjiang tantangan urang-urang nan tahormat di kampuangko. Untuak dirinyo surang namuah baduto, apolai untuak urang banyak. tantu duto pangkek tigo nan kadikarajokannyo. Luko hati den jikok mangana parangainyo surang-surang. Diagiah picayo, tapi khianaik..!" jalehnyo sambia manggadangan mato sambia mamandang bakuliliang. "Oooooo.iituuuu, ijazah palasuuu.." sarantak suaro kalua dari muluik urang nan sadang di lapau Mak Kari sambia maangguak-angguakan kapalo. "Kalau itu nan sanak mungkasuik, lah paham den tu mah," kecek Tan Koti di suduik lapau. "Rokok ciek lu.." sambuangnyo sambia manjangkau rokok nan talatak di muko Pudin. Urang saliang mamandang sambia galak sengeang mancimeehkan parangai Tan Koti. Sutan 'K' ota tinggi. "Caliak bana dulu Tan, jan sampai taisok rokok palasu pulo." "Ha.ha.ha" Urang dilapau tagalak. Paruik Tan Koti nan buncik sato baroyak, aia matonyo tapacak dek kasangan galak. Pokoknyo dek Tan Koti, galak urang galak lo awak, samantaro nan digalakan urang.awak. Dek mancaliak urang galak, si Pudin sato pulo galak icak-icak dek karano talingonyo agak pakak. Mak Kari indak sato galak, kaniangnyo bakaruik tando ado nan sadang dipikiakannyo. Lapau haniang sakutiko. Indak lamo antaronyo Mak Kari basuaro, "Cukuiklah sakali pisang babuah.Ingek-ingek awak nan ka datang. Sabanta lai Tahun Duo Ribu Limo ka tibo pulo. Panghulu gadang awak ka baranti." Urang di lapau saliang mamandang. Tasentak dek kato Mak Kari tadi. "Iyo yo.. Panghulu gadang kota jo kabupaten di nagari awak ko ka dipiliah pulo.," Labai mamabaranikan diri basuaro. "Panghulu gadang di Propinsi iyo pulo mah." solo Tan Koti. "Ingek-ingek sabalun kanai. Sasa kudian indak baguno." Mak Kari maingekan urang rami. "Apo manuruik awak basamo syaraik urang nan patuik mamimpin nagari.supayo awak jan tajua tagak bantuak kini.?" Pudin batanyo sapanuah hati. "Nan partamo, jan mamiliah urang nan suko manyogok jo pitih. Sudah tu jan pulo tapiliah pamimpin nan indak mamakai parasaan jo hati, apolai nan bakabaji.Nan mambuek rakyaik indak sanang hati" Tan Koti manjalehan sarupo urang nan mangarati. "Nagari awak ko nagari Adaik basandi syara', Syarak basandi Kitabullah, mako panghulu gadangnyo harus urang nan mamakaikan adaik.Labiah baradaik dari pado nan lainnyo. Jan sampai tungkek pulo nan mambaok rabah.." sambuang Tan Koti. Nan mandanga maangguak-angguak, mancaliak lagak gayanyo bacurito sahinggo lupo jo parangai Tan Koti nan kadang-kadang indak manuruik adaik. "Kalau dek ambo syaraiknyo indak rumik-rumik bana doh. Manuruik agamo, ado tigo tando-tando urang munapiak. Nan partamo, bajanji mungkia, bakato duto, dipicayo khianaik. Sudah tu nabi maingekan pulo, kalau urusan disarahkan kapado urang nan indak ado ilimunyo tantangan iitu, tunggu kahancuran ka tibo." Labai manyampaian jo gaya ustad nan tagak di mimbar musajik. "Nan paralu bana jan sampai awak takicuah jo ijazahnyo, palasu pulo beko. Awak nan kamari bedo dibueknyo," sorong si Mira dari balakang. "Kalau ijazahnyo sajo alah palasu, tantu nan lainnyo paralu pulo dicurigai. Jan-jan hatinyo palasu pulo, sahinggo indak dapek maraso. Matonyo palasu pulo, sahinggo indak dapek mancaliak nan sabananyo tajadi.," sambuang Pudin sambia galak. "Kalau urang nan sarupo itu bisa dapek surek katarangan sehat, tantu nan mamaresonyo dotor palasu pulo." Mak Labai indak namuah kalah. "Ha..ha..ha." Lapau panuah dek suaro galak, sahinggo tadanga ka tapi labuah, mambuek urang lalu tatagun mamandang heran ka lapau Mak Kari. "Usah dipikiakan bana sagalo nan palasu tu. Sabab kalau banyak palasunyo, gaji pulo jo pitih palasu. Draw awak tu. Jan dibaia inyo jo pitih nan sabananyo." garah Tan Koti. Lapau batambah buncah dek galak gadang urang nan sadang maota di lapau Mak Kari sahari nantun. Lah pasai galak Mak Kari mulai mangecek. "Manuruik niniak muyang awak, piliah pamimpin nan cadiak. Tapi kok cadiak jan malendo. Gadang jan malendo. Kok tagak jan manyondak. Runtuah rumah ko dek karano dindiang jo langik-langiknyo alah rapuah. Untuang lai ado sandi dan manguekan." (Viveri Yudi) ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
