Alaikumsalam WW., Baitu dapek info ambo langsung manilpon HP anak ambo si Ronny nan bakarajo di Kedubes Australia tu. Wakatu kejadian inyo sadang batugas diluar kantua. Sananglah hati. Namun sedih jua mandanga korban bajatuhan, salah satunyo satpam kedubes australia. duta
stlembang_alam <[EMAIL PROTECTED]> wrote: Assalamu'alaikum wr.wb., Tadi itu, pukuah 10.30 itu, ambo sadang di ruangan ambo, di tingkek limo Kuningan Plaza Menara Utara, dibatehi Menara Selatan sajo dari Kedutaan Australia tu. Sadang bakarajo di muko komputer. Tibo-tibo babunyi dantuangan, plafon ruangan kantua ambo jatuh sabingkah. Ado goyangan sarupo gampo babarapo saat sasudah latusan itu. Masih ragu ambo antaro, gampo atau bom. Di lua, dari ruangan lain, urang abih basorak-sorak. Ambo bagageh kalua. tapi sasudah babarapo langkah, baliak ka meja ambo maambiak HP jo kunci oto. Kami bagageh turun malalui janjang daruraik. Sampai di bawah, mancaliak ka arah subarang jalan, ka Plaza 89, masya Allah sado kacono hancua. Di bawah di jalan Rasuna Said alah rami manusia nan turun dari kantua-kantua di sakitar sinan. Jo kawan ambo, kami bajalan mandakek ka arah kedutaan Australia. Di jalan ado asok hitam. Ambo indak sampai bana ka muko kedutaan Australia tu, ado pulo kawan nan maajak babaliak. Tapi kawan ambo tadi taruih juo kian. Kudian ano bacarito bahaso awakno mancaliak potongan kaki di jalan. Masya Allah. Inna lillahi wainna ilaihi raaji'uun. Sungguah manyadiahkan. Kami bakumpua-kumpua di tapi jalan. Sabab urang-urang indak buliah masuak ka pakarangan Plaza Kuningan tu, sabab diisolir untuk panyalidikan pulisi, kecekno. Lamo kami tagak di sinan. Nampak gubernur DKI tibo. Anggota-anggota DPR tibo. Hamzah Haz tibo. Menteri Luar Negeri tibo. Banyak wartawan televisi, banyak wartawan asiang. Heboh. Rami. Dari management kantua ambo alah ado pernyataan bahaso karyawan di suruah pulang. Ambo mananti juo agak sabanta, maarok-an oto bisa di kalua-an. Tanyato sampai patang ari tatap indak bisa. Kabatulan ado oto dinas ciek, tibo, rancanano ka masuak ka pool. Dek kawan ambo diambiak sajo oto tu ka dibaono pulang. ambo diajakno. Kami naik baranam jo sedan tu manuju ka arah jalan Sudirman. Di sinan ambo turun langsuang maambiak taxi manuju pulang. Pagi tadi wakatu rapek manajemen, GM kami alah mangecek-an supayo bahati-hati tarutamu sasudah hari pamilihan tanggal 20 nanti. Ambo jo kawan ambo manejer Personalia bagarah; bakalabihan amek si Ujang ko. A nan ka ditakuik-anno. Nagari aman-aman sajono, jano ambo. Rupono iyo juo tajadi. Antah si ujang ko asa mangecek sajo, antah alah ado kaba-kaba angin, indak jaleh di ambo doh. Sampai di rumah, agak satangah trauma sajo ambo ka mambukak komputer ko. Ambo tarimo sms dari Miko. Ambo baleh maagiah tahu bahaso ambo lai sihaik-sihaik sajo. Itulah nan tajadi saariko. Wassalamu'alaikum wr.wb., Lembang Alam ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________ ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
