Ma sagalo adidunsanak jo anak kamanakan di sagalo suduik bumi Allah ko, Assalamu 'alaikum wr. ab. Dek tampek bakajarak-an, ambo sakaluarga di Jalan Anggur 1 A, Pintu Kabun, Bukiktinggi, rasonyo tantu indak mungkin ka manaiaki janjang dan manapiak bandua, manjinjiang kampia sirih jo rokok sabatang manjalang sagalo adidunsanak jo anak kamanakan di sagalo suduik bumi Allah ko nan hadir di palanta awak ko. Iyo mungkin cuma bapadoan adaik panggia mamanggia sapanjang nan bakarajoan di ranah Minang jo hantaran kato jo sapatah duo malalui alua nan iko sajo.
Dek nan ketek lah gadih pulo, lah sampai pulo ukua jo jangkonyo, anak bunsu ambo nan padusi, nan banamo ELVINA KARTIKA ESYA (IKA) insya Allah ka ambo nikahkan jo calon junjuangannyo nan banamo: ANDI AGUSTIAN DASRIL (ANDI) di hari Jumaik, tanggal 17 September 2004 nan ka tibo di dangau kami, Jalan Anggur 1A, Pintu Kabun, Bukiktinggi. Bisuak harinyo, Sabtu 18 September 2004, insya Allah, kami sakaluarga baralek, sakadar tando malewakan suok jo kida ka sagalo kaum jo kirabaik, handai jo tolan, dan sagalo adidunsanak jo anak kamanakan di sagalo suduik bumi Allah ko. Gadang harapan kami sakaluarga, sagalo niniak mamak jo rang sumando silang nan bapangka karajo nan bapokok, kok adolah kasampatan di sagalo adidunsanak jo anak kamanakan di sagalo suduik bumi Allah ko, tarutamo sakali nan ado di Sumbar, dan talabiah lai nan di Bukiktinggi jo Agam, basamo-samo awak maadoki akad nikah dan mahadiri alek ketek kami, kami junjuang tinggi-tinggi. Kok dek jarak nan bajauahan indak mungkin jo badan diri untuak maagiah doa restu, jo doa sajo dari tampek masiang-masiang, semoga anak jo minantu kami nan baru ko dibari karidhaan Allah mandirikan rumah tanggo nan sakinah wal mawaddah lah gadang aratinyo dek kami sakaluarga. Ateh namo silang nan bapangka karajo nan bapokok: Sjamsir Alam St. Nan Sati ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
