Ciloteh Minang http://padangekspres.com/mod.php?mod=publisher&op=viewarticle&artid=668
"Pandeka Buluih Dek Mancik..!" Kamis, 16-September-2004, 05:45:26 20 klik Karumunan urang di halaman kantua wali nagari manjadi paratian dek Pudin jo Labai nan sadang minum cindua durian di bawah payuang karateh. Satiok hari Kamih, di kampuang Mak Kari "n the gank" rami dek urang nan manggaleh sarato babalanjo, karano tasabuik hari Balai. Sajak pagi Pudin lah bakameh, pai ka pasa manggaleh ameh, panambah-nambah bali bareh. Salain hari Kamih, Pudin manggaleh babelok, dari balai ka balai manamui palanggan di satiok kampuang nan ado dalam nagari. Hari Jumaik Pudin cuti mancari pitih, biasonyo sapulang Jumaik inyo singgah ka lapau Mak Kari. Disinan basobok jo konco-konco, bacurito hilia ka mudiak babagi pangalaman sambia ma-asah kincia-kincia. Hari Minggu, kalau ado panggilan, Pudin lah bahiriangan jo Piak Amba, bininyo, pai baralek. Di ruang karajo Pak Wali, sagalo tamu lah basusun nan bak siriah, balirik nan bak pugaran. Di meja panjang paliang muko ado Pak Camaik, badampiangan jo Buk Lurah nan duduak mangamek, sambia mamiciak jirawek. Di subalah suok, duduak pulo si Pandeka nan sadang ma-apa, mampalanca pidato nan kadisampaikan nyo beko. Maklumlah, sahari nantun si Pandeka diminta dek Dewan Perwakilan Anak Nagari untuak manjalehan, tantangan kondisi keamanan manjalang Pemilihan Presiden nan ka diadokan sapuluah hari lai. "Ehemm..ehemm..!" si Pudin mandehem sabalun mangecek. Malayangkan pandangan bakuliliang, sambia tasanyum manih, mancaliakan gigi platina nan tasalek di baliak bibianyo. Urang mamparatikan lagak gaya si Pandeka di ateh podium. Sabalun mangecek, Pandeka malayangkan pandangan bakuliliang. Sakutiko matonyo tatumbuak ka anak pak camaik nan baru tamaik sikola. Pandeka galak manyarengeh, anak pak Camaik capek sadar diri, basugiro mahelo rok malampok pao mulusnyo dari pandangan mato si Pandeka nan gata. "Apak Camaik nan saya hormati.," kato si Pandeka mambuka kato. "Buk Lurah baitu pulo.saya hormati juga. Ngggg.Tibo-tibo pandeka tasandek, indak kalua suaro dari muluiknyo. Tangannyo mulai manggaretek. Tan Koti manjuluakan kapalo ka muko, ma-agiah kode ka Pandeka nan sadang grogi. "Sasudah tu, dunsanak-dunsanak nan ambo cintoi. Tarimokasih dari ambo, dek karano alah datang kamari untuak mandanga pidato ambo, mawakili sagalo pandeka nan ado di salingka nagari ko." Tan Koti tampak basanang hati, dek karano Pandeka lai mangarajokan apo nan diajakannyo. Sabab sahari kapatang, Tan Koti basitungkin malatiah si Pandeka untuak bapidato dimuko urang rami. Kabanyo, si Pandeka indak lalok samalam tadi dek karano malatiah diri bapidato di muko camin sampai pagi. Untuak mandapek ilimu dari Tan Koti, Pandeka tapaso manjua cincin ameh bini. Undangan lah panuah tangah ruangan, diantaronyo ado Mak Kari, Pudin jo Mak Labai. Tan Koti mamiliah duduak di barisan paliang muko, dakek meja nan tahidang kue di hadokan Pak Camaik. Di ateh podium, Pandeka tampak samakin picayo diri. Daguaknyo mandongak, matonyo mambulalak, rambuiknyo tagak. "Untuak keamanan Nagari, dunsanak tidak usah ragu. Kami lah balatiah sampai ka lua nagari. Satiok suduik kampuang kami mato-matoi. Kami, parik paga dalam nagari manjamin keamanan nagari saratuih parosen, awak indak kabuluih lai. Sagalo kamungkinan nan kamanggaduah alah diantisipasi. Pokoknyo kondusif lah." Pidato Pandeka sabana manyanangan hati, urang banyak basorak, "Hiduik Pandeka..!Hiduuik Pandeka. Alah patuik inyo jadi Mantari..!" panciang dek Tan Koti. Pak Camaik sanang hati. Buk Lurah tambah manjadi. Tiok sabanta dipelokannyo juo gincu nan malakek di bibia, jo mato genit dikijoknyo si Pandeka. Tibo-tibo, Pandeka tapana, matonyo mancaliak ka loteang tadia. Inyo baranti mangecek, mukonyo pucek, bibianyo manggaretek. Tan Koti capek mangarati, jo suduik mato inyo mancaliak Mancik sadang mancogokan kapalo dari lubang tadia nan lah tabuak dek lapuak. "Man..Man..Maan.," Pandeka sarupo urang manggigau. Urang banyak mulai kalabuik, batanyo dalam hati, sambia mamandang ka Pandeka jo muko heran. "Sia pulo nan mangarajokan si Pandeka di tangah nan rami ko.," Pudin tagak, sambia mancaliak ka balakang. Inyo curiga, jan-jan Pandeka kanai gayuang dari balakang. Tapi, Pudin indak mancaliak urang nan patuik dicurigai. Sadang kalebuik, Tan Koti takana curito mamak si Pandeka, Bagindo, konco Tan Koti kutiko sikolah dulu. "Si Karim tu panakuik jo mancik tu mah," curitonyo sambia manyabuik namo si Pandeka kutiko ketek. Indak manunggu lamo, Tan Koti batindak sakutiko. Mancik kalera nan di ateh loteang tu alun juo baranjak. Pandeka batambah manggaretek. Tan Koti mambukak tarompa lambek-lambek, dan. "Braaak..! tarompa malayang mambae Mancik. Mancik mailak saketek, tarompa malantun, maluncua ka bawah manuju kapalo Pak Camaik. Sigap, Tan Koti maloncek, "Hup..! Dapeek..!" soraknyo bangga. "Aduah..!" pakiak pak Camaik, "Kapalo ambooo.!" soraknyo Urang tagalak, sabab nan tatangkok dek Tan Koti kapalo Buk Lurah, sahinggo mambuek sanggua nan sagadang roda bemo tangga, bagolong pulo ka tangah. "Tenang..! Tenang.! Keadaan aman dan terkendala, ehh..terkendali. Jangan saling gebuk. Pakai raso jo Pareso. Jan saliang tuduah, mambuek awak tambah taniayo," baitu Pandeka nan lah hilang takuik manangkan urang banyak. "Buluih wak den sakali ko..!" kaluah Pandeka ka Mak Kari, kutiko sampai di lapau sapulang dari tampek acara tadi. "Ingek-ingek sabalun kanai. Di ateh langik ado langik. Elok-elok urang di ateh, kok di bawah nan kamaimpok," Mak Kari manjawek sarupo urang banyanyi. Dek Pandeka lah sampai ka hati, inyo sangaik mangarayti, inyo buluih dek lah mulai lupo jo diri. (Viveri Yudi) ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
