Baranti Marokok ===============
Alah kiro kiro duo bulan ko ambo baranti marokok baliak. Ambo tu parokok angin-anginan.
Sajak kawin di taun 2000, sampai pacah kongsi di taun 2004, ambo indak pernah marokok lai. Salain untuak maharagoi urang rumah nan indak suko ambo marokok, ambo maiyokan pulo kecek urang nan mangecekkan bahaso maisok tu adolah "mamanggang pitih."
Tapi sasudah pacah kongsi tu, iyo sabungkuih pulo sahari baliak, cuma lai Sampurna Mild.
Jikok Ambo kabatulan sadang di kampuang, baa kecek ambo mintak rokok ka urang lapau;
"Da Iyat, tolong nan samparono tu ciek!" Mangko langsuanglah Da Iyat tu maambiakkan rokok Sampurna sabungkuih.
Kalau kecek Mark Twain, mamak jauah ambo nan basisunguik taba tu, "Sia nan mangecek baranti maisok tu sabana sarik? Aden mangecekkan indak! Sabab alah baratuih kali den mangarajokannyo!"
Kato Angku Mark Twain tu tantu iyo, baranti maisok sudah itu maisok pulo baliak. Sudah tu baranti pulo baliak. Baa ndak ka baratuih kali etongannyo. Cubo baranti maisok sakali sajo, sudah itu indak maisok2 lai baliak. Itu nan payah kan? Baitu mungkin kecek sanak2 dalam hati.
Nan mangganggu pikiran ambo adolah. Tiok duduak basamo2 jo urang. Baru dikecekkan dek awak baso ambo alah baranti maisok, pasti seragam sajo tanggapan nan disampaikannyo sasudah tu.
Apo keceknyo:
"Nan marokok, iyo baranti. Tapi nan di-rokok, kan lai juo taruih ndak?"
Itu taruih nan disabuik urang!
Alah jajok ambo mandanga. Indak urang bodoh atau indak basikola nan manyabuik tu do, tapi urang2 nan sikolanyo tinggi!
Ambo indak pernah maajak mangecek nan kumuah do, cuma manulak rokok nan ditawarkan ka ambo. Tapi itu taruih tanggapan nan basuo dek ambo.
Tolong agiah tau dek mamak2 kasadonyo, baa caronyo supayo jan basuo juo baliak kecek sarupo itu?
Ambo lah muak pulo dinyo!
Wassalam, Wady Afriadi
---------------------------------------- Do You Urangawak?
Join the [EMAIL PROTECTED]
The group of Minangkabau folks worldwide
To join, click http://groups.yahoo.com/group/urangawak ----------------------------------------
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
