Maa Angku Afriadi (bukan Wady Afriadi tu do dunsanak kasadonyo, ambo asli Muaro Labuh, Solok Selatan) sarato Rang Lapau nan Basamo,
"...kamambaia Rp. 6.000.000, dan manunggu dua bulan baru barangkek ka sinan (manuruik pihak PJTKI), ambo
khawatir kanai tipu karano banyak kajadian sarupo itu..."
Mancaliak angko anam juta tu banyak nan takana di ambo kasus-kasus nan ambo adoki sahinggo angko tu ruponyo lah manjadi tando nan kurang elok dalam urusan dokumen-dokumen ko. Khusus nan datang ka Rantau ambo di Nagari Tanasam, tiok ado "pandatang haram" nan tatangkok dek imigrasi, tanyato mareka tu lah takicuah dapek dokumen-dokumen palasu dengan mambaia antaro Limojuta sampai Anamjuta Rupiah. Karano itu ingin ambo bacarito saketek supayo hati-hati mandapekkan dokumen-dukumen pajalanan (tarutamu paspor jo visa) ka Lua Nagari tu. Jaan sampai dapek dokumen palasu.
Ruponyo di Nagari Awak banyak calo-calo nan maintai-intai mancari magsa urang-urang nan kapai ka Lua Nagari. Calo-calo galia ko dengan gayanyo baserakan sajak di Palabuahan Tanjuang Pariuak sampai-sampai ka pakarangan kadutaan-kadutaan atau konsulat asiang Jakarata dan Surabaya. Mareka ko mangaku agen-agen nan punyo banyak koneksi tahuberes. Baitu juo di kota-kota lain, kini lah manjala sampai-sampai ka Banduang, Malang, antah dimaa lai. Di Jakarata sandiri banyak korban nan mangecekan markas-markas agen ko di Pulogadiang.
Polanyo, sanak ingin karajo ka Lua Nagari? Beres, maa pitih limo atau anamjuta, beres, tunggu duo minggu. Umumnyo iyo beres ka barangkek. Pado hari-H nan dijanjikan, si agen dengan gayanyo nan mayakinkan, maantakan si mangsa ka airport, dokumen di tangan agen. Beres, tingga barangkek se lai, den antakan sampai ka pintu sekuriti masuak kapatabang. Salamaik jalan, turuikkan se lah urang nan dimuko tu. Ado duo tigo kawan, tapi jan mangecek-ngecek di ateh kapatabang. Barangkeklah si Bujang dari Kampuang, salamaik tingga Ayah jo Bundo nan lah susah payah manyalang pitih atau manjua tanah untuak anak nan ka dapek karajo di Lua Nagari di Nagari Tanasam.
Sampai di Palabuahan-palabuahan kapatabang masuak di Nagari Tanasam tu, prosedur imigrasi sabana ketat. Tiok urang nan masuak dicaliak jaleh-jaleh jantan batinonyo, itam putiahnyo, dokumen-dokumen, surek-sureknyo. Kalau dicurigai, dan kadapatan ado nan palasu, dalam wawancara tu sagalo isi kopor keteknyo, tamasuak nomor-nomor atau namo-namo nan tatulih di karateh cabiak-cabiak ketek nan tahandok-handok dipareso dan ditanyo.
Panjang carito. Kasimpualannyo, si pandatang haram cako diagiah kasampatan mamiliah, namuah Baliak Pulang ka Kampuang sacaro Sukarela atau Dipaso Pulang. Kalau indak namuah pulang, mungkin kalau takuaik ka dianiayo pamarentah di nagari asanyo, alternatif lain buliah masuak dengan prosesnyo ditahan dulu, masuak panjaro sampai jaleh putusan hakim. Kalau carito palintak-palintuik akhianyo hakim mamutuihkan mamaso pulang. Dan nan paliang pantiang, jaan sampai tabali jo dokumen palasu. Uuruslah sandiri dokumen-dokumen tu ka kantua resmi, baiak kantua imigrasi pamarentah kito ataupun kantua kadutaan dan konsulat asiang.
Sabagai kisah nyato. Kapatangko (salamo sabulan) ambo bolak-baliak antaro Pangadilan jo Panjaro. Anak mudo 19 tahun, lah satahun tamaik SMA, datang ka Rantau ambo, dijanjikan ado karajo nan manunggu. Kironyo tampek karajo tu palasu, dokumen palasu, tatipu babali limo juta. Mulo masuak palabuahan ruponyo salah-salah jawab, karano bahaso Inggirihnyo kurang pas, akhianyo ditangkok, dipanjarokan lah 39 hari sampai paang tu. Ruponyo wakatu itu inyo manjawab surang dan banyak nan kurang mangarati. Untuak disidangkan ambo diimbau sabagai pantarjumah. Ancaman hukuman panjaro barek, dando maha dan sanksinyo barek pulo. Syukurlah dengan bantuan dan karajo samo pembela dan pantarjumah sadonyo dapek diklarifikasi. Anak mudo ko dirundiangkan mangaku sajo dan dengan perjanjian nan agak panjang, inyo dilapehkan dari panjaro. Kami basalaman, aia muko samo lindok, aia mato anakmudo baliang-linang mandanga putusan hakim.
Nah, sabagai tambahan pasan ambo Banyak pandatang-pandatang dari Nagari Kito kalua nagari. Di Rantau ambo Nagari Tanasam, lembaga-lembaga tu, baiak pamarentah atau swasta, diwajibkan undang-undang baru untuak mabaia pantarjumah. Kalau indak, mareka pulo nan kanai undang-undang. Kabanyakan pandatang kurang pandai babahaso Inggirih. Walaupun kadang-kadang di Indonesia lah bisa dipagunokan bahaso Inggirih tu, tapi kok basuo hal nan barek-barek saroman dapek kacelakaan, dipareso polisi, imigasi, agen kapatabang, kanai copet, kahilangan kartu kredit, atau maloporkan apo sajo di Rantau Jauah, mungkin Caro Inggirihnyo tagago-gagok dan mudah salah mangarati, paralu pantarjumah. Lembaga-lembaga di Rantau Jauah nan ka mambaia pantarjumah tu bukan awak. Jadi jan sagan-sagan mintak pantarjumah. Kecekkan, "I dont' speak English very well, I need an Indonesian interpreter, please." Interpreter aratinyo pantarjumah lisan, sadangkan translator aratinyo pantarjumah tulisan. Mudah-mudahan salamat dalam baurusan dan dan salamat dalam pajalanan.
Sakitu lah dahulu.
Salam, --Mak Ngah
33471
From: <[EMAIL PROTECTED]> Date: Wed Sep 22, 2004 5:30am Subject: [EMAIL PROTECTED] Mohon Bantuan seputar PJTKI
Ass. Wr. Wb,
Mamak-mamak dan uni-uni kasadonyo nan mengelola PJTKI atau nan acok baurusan jo PJTKI itu, maminta bantuan kamanakan mengenai dokumen-dokumen apo sajo nan paralu ditarimo/dipacik dek tanago karajo nan ka dikirim PJTKI tu bia bisa bakarajo di negara tujuan.
Salah surang adiak ambo ka jadi TKI ka Qatar, kamambaia Rp. 6.000.000, dan manunggu dua bulan baru barangkek ka sinan (manuruik pihak PJTKI), ambo khawatir kanai tipu karano banyak kajadian sarupo itu dan juo ambo indak mangarati bana urusan jo PJTKI tu do, baa bana teknis urusannyo, perjanjian karajonyo jo PJTKI atau jo Perusahaan di Negara Qatar dan juo biaya pengurusan visa karajo dan lain-lainyo. Makonyo dipalanta ko mungkin dunsanak, angku-angku atau mamak jo uni-uni labiah mangarati urusan jo PJTKI tu agiah tau lah ka ambo informasinyo, bia indak tatipu adiak ambo tu do.
Ateh bantuan jo informasi dari dunsanak ka sadonyo manjadi ibadah pulo hendaknyo dan dibaleh amal oleh Allah SWT, amin ya rabbal 'alamin.
Wassalam,
Afriadi (bukan Wady Afriadi tu do dunsanak kasadonyo, ambo asli Muaro Labuh, Solok Selatan)
--- Outgoing mail is certified Virus Free. Checked by AVG anti-virus system (http://www.grisoft.com). Version: 6.0.742 / Virus Database: 495 - Release Date: 8/19/2004
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
