Assalamu'alaikum wr.wb., Panjang carito awak sapakan ko. Tapi ambo diinggoki 'antu' maleh saketek, dek ado pulo karajo lain, baiak di kantua maupun di musajik (di tampek ambo tingga). Jadi indak taawai amek 'kompor' ko.
Nomor satu pakaro si Wady, Iyo lah panek pulo awak dek urang mudo (umua 30 tahunan agakno) nan surangko. Santiang bacarito, pandai manulih (mungkin dek sarjana seni tu mungkin) tapi agak 'galia', agak nyinyia nak mamasuakan isi kapalono nan nyleneh. Tampak-tampakno di ambo, urang mudoko masih dalam pancari-carian, alun sabana-bana mada lai doh jo kaingkaranno. Balain jo aktor terkenal kito nan sabana pakek sarupo J St M, atau aktor-aktor nan lain. Tapi tamasuak nan agak liek memang. Kalau di kacomato ambo urangko masih takategori (iko bukan bahaso Japang) 'mantiko langek'. Ado kawan no nak agak saroman nan panah pulo dulu ado di Palanta, dulu...., yoitu Urpas. Pakarono di kaluaan, sarato pandapek sabagian awak nan satuju, kalaulah si Wady ko amuah mintak maaf, buliah no masuak baliak, sayang indak ditanggapino. Antah dek malu, antah dek bangih, antah dek lah patah arang indak jaleh di awak. Saandaino amuah no mintak maaf, amuah bajanji indak ka maampokkan flame (bak kecek Miko), manga pulo indak kaawak tarimo. Tapi kalau no indak amuah, atau kalau no ka tatap juo nak barajo kaatino surang, nak basutan kamatono surang, nak ka manjua galeh nan pasti indak disukoi dek masyarakaik umum di Palantako, tantu iyo indak katuju pulo diawak nan basamo doh. Angek biko awak sa palanta dino. Nomor duo pamilu putaran kaduo. Katuju atau indakpun awak jo caro atau jo calon nan ado, karajoko alah lapeh, awak alah malangsuangkan pamilu pilpres nan kaduo. Alah jaleh sangaik bahaso nan ka manarajui nagariko ka batuka. Taraso diambo nan awamko, nan bukan urang fulitik ko, rancak awak kini baprasangko elok sajo lai..... sarato ditolong jo doa. Mudah-mudahan digarakkan Allah hati pamimpin nan baruko ka nan elok. Diagiahno kakuatan dek Allah untuak mamimpin nagariko sacaro adia, sacaro amanah, sacaro elok-elok. Mudah-mudahan barubah nagari awakko manjadi baldatun thayyibatun wa rabbun ghafur, nagari nan mandapek rahmat sarato barakah dari Allah Subhanahu Wa Ta'ala. Indak nagari nan di pa kumidi an urang sin taruih manaruih. Nan katigo hasia bom di Kuningan. File nan dikirimkan dek Rangkayo Isna, manambah sajo ka pangatahuan nan alah ambo danga juo sabalunko. Katiko bom Bali malatuih duo tahun nan lapeh, alah ado parnyataan dari fihak TNI, wakatu itu bahkan ditayangkan di TV, nan bahaso kamampuan TNI mambuek bom masih jauah dibawah kamampuan 'pandai' bom Bali tu. Bahkan Mantan Ka Bakin, Jenderal Z.A. Maulani, katiko itu alah mansinyalir bahaso nan malatuih di Bali tua adolah mini nuke. Tambah pulo jo informasi nan bakatabangan wakatu itu nan mangecekan pamarintah Amrik alah maagiah paringatan ka pamarintah Australi sarato Chino Taiwan untuak maingek-an masyarakaik-no untuak jaan mandakek-dakek ka Bali manjalang bom kamalatuih katiko itu. Tapi nan fihak pulisi awak jo sangaik pede barasia mairik ka pangadilan urang sarupo Amrozi, sarupo Ali Imron. Nan antah dek a kolah, pangadilanno tampak sarupo pangguang srimulat kadang-kadang. Bahkan sempat Kapalo Pulisi awak (nan indak basipatu tu) batemu ramah bagai jo Amrozi (sabana baramah tamah) dan indak panah manyabuik-nyabuik kamungkinan mini nuke tu doh. Indak panah mambuktikan sacaro nyato baa bana kamampuan bom nan konon dek Amrozi cs dibuek jo potasium nan dibali di Surabaya tu. Lai kolah sarupo akibaikno jo asia nan di Bali tu? Baitu pulo sasudah bom Mariott. Ado kapalo palaku bom bunuah diri tabang ka tingkek ampek di Mariott, kononno urang awak. Samakin banyanyi pulisi maaminkan carito bahaso iko karajo Jamaah Islamiyah. Sia go sabanano nan Jamaah Islamyah ko, dima organisasitu adono, indak panah jaleh. Lalu tarakhir di Kuningan. Haqqul yakin juo lai baru Kapalo Pulisi awak mangecek-an carito nan itu kaitu juo, iko karajo Dr. Azhari jo Nurdin M. Top. Baa mangko awak sarupo di 'padikiea'an urang sin taruih, indak sadar-sadar juo baliauko? Kapatang alah kalua pulo carito baru, alah basuo binyi Nurdin M. Top tu. And so what? Taraso di ambo, awak alah abih dikumidi-anno sin di jaringan teroris internasional, nan sarupo dicaritokan dalam file nan dikirim dek Rangkayo Isna tu, dan pulisi awak ndilalah, kok indak sadar-sadar. Alah tigo kali bom sajenis malatuih alun ado pernyataan nan agak mangarah ka ilmiyah dari pulisi awak lai doh. Dulu bom Bali dikecek-an rakitan potassium tapi indak panah dibuktikan sacaro ilmiyah. Nan kapatangko, nan dikarajoan urang di siang gadang, jo asia nan sabana jaleh sajaleh-jalehno sarupo itu, jo cindawan putiah satinggi ratusan meter naik ka langik, alun juo kalua parnyataan pulisi awak nan agak masuak di aka saketek lai doh. Dalam pado itu, sampai kini lubang bakeh bom di Kuningan tu, craterno nan gadang tu, masih batutuik juo lai baru jo triplek untuak mamelokino. Supayo jan nampak di urang banyak? Iyo ciek sin pintak awak ka Allah, mudah-mudahan dibukakan Allah rasio busuakko sajaleh-jalehno, jo caro nan Allah sajo Nan Ka Tahu. Itu sajolah nan agak pantiang-pantiang bana nan ambo komentari dulu. Wassalamu'alaikum wr.wb., Lembang Alam ----- Original Message ----- From: Isna Huriati <[EMAIL PROTECTED]> To: <[EMAIL PROTECTED]> Sent: Friday, September 24, 2004 7:45 PM Subject: [EMAIL PROTECTED] bom > Dunsanak kasadonyo, > Kalau dunsanak ingin tau keterangan lain mengenai bom di Kuningan, atau > juo di Marriot jo di Bali, mako ado rancaknyo sanak klik website dibawahko. ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
