----- Original Message -----
From: Wady Afriadi
To: [EMAIL PROTECTED]
Sent: Tuesday, September 28, 2004 6:22 PM
Subject: [Urangawak] Hikayat Buah Dalimo (Wady Afriadi)
HIKAYAT BUAH DALIMO
=============================
Dicaritokan dek: Wady Afriadi
Wakatu ambo jo Simon masih ketek-ketek juo baru, kami samo mangaji di langga (surau)
Piboda Batu Biliak nan ado di Tiaka sabalah mudiak. Bagi nan lah akrab jo ambo sarato
Simon tantu alah tau bahaso Tiaka ko adolah namo kampuang ambo nan talatak di
Kecamatan Guguak, Limopuluah Koto, Pikumbuah Mudiak.
Baa kok longga (surau dalam bahaso Tiaka) tu basabuikkan Longga Piboda Batu Biliak?
Dek karano inyo talatak di baruah urang Piboda (Payobada), nan talatak satantang Batu
Biliak di kaki bukik Tiaka nan sabana rancak tu. Jikok dunsanak nio mancaliak baa bana
bantuaknyo bukik Tiaka tu, silahkan sigi http://geocities.com/tiakarguguk. Batu Biliak
ko adolah batang aia nan sangaik janiah dan mangalia di antaro batu2 nan manyarupoi
biliak-biliak sahinggo dinamokanlah batu biliak. Kadang-kadang kami lai main jo Simon
di sinan di siang ari.
Aia-nyo di Batu Biliak tu sangaik janiah. Dingin. Indak jarang dapek dek kami udang di
sinan. Tapi ikannyo nan paliang banyak adolah ikan Sipareh. Kadang2, pulang sikola
kami bungkuih nasi dalam daun pisang, bajalan kami malintasi sawah jo batang aia
manuju batu biliak tu, kami makan nasi nan babungkuih tu di sinan, duduak diateh batu
di tapi aia sambia kaki bajuntai masuak aia.
Ndak ado urang nan ka basobok di sinan do, paliang ciek jo duo urang nan kaparak di
ateh bukik tasarongoh dek kami, atau urang nan sadang mamikek balam.
Jadi dek latak surau di baruah Piboda tu satantang bana jo Batu Biliak, mangko
lakeklah namo surau tu Longga Piboda Batu Biliak.
Guru di longga tu adolah Mak Niuh. Namo lengkapnyo yaitu Djunius Dt. Batang. Kadang2
kami maimbaunyo Tuak Batang, tapi labiah acok kami mahimbaunyo jo Mak Niuh sajo.
Ambo barangkek ka surau tu sambia mambaok obor untuak manarangi jalan. Ambo karek
buluah bambu sagadang ampu kaki sarueh, ambo isi jo minyak tanah, basumbekkan kain
buruak untuak ka sumbu, bacogokkan kapalonyo saketek untuak dinyalokan. Katiko tu
listrik alun lai masuak ka Tiaka. Kadang2, kalau indak ba-obor, ambo ambiak daun
mangga (daun karambia) masiak, itu nan ambo iduikkan jo api ka jadi suluah.
Mangko-nyo ambo buek obor, karano indak panek awak dinyo sarupo jikok mambao daun
mangga. Jikok awak basuluah daun mangga, awak tapaso malayok-layokkannyo taruih
(mengibas2kan), kalau indak tapaso bahambuih supayo apinyo iduik baliak. Tapi katiko
apinyo lah gadang, sabana gadang bana pulo. Ka-angek-an pulo awak nan mamacik, sabalun
kasado daunnyo abih tabaka. Api daun mangga tu ndak pulo lamo iduiknyo. Kadang,
ditangah jalan awak baru, inyo lah abih dimakan api. Tapaso lah barawai ambo pulang.
Kami barangkek ka surau biasonyo sabalun wakatu mugarik tibo, pulang sasudah sumbayang
Isya.
Pado suatu malam, mancaliak kami nan alah mulai batea-tea mangaji, mangko mangeceklah
Mak Niuh ka kami:
"Jikok kalian lai sungguah-sungguah mangaji, mangko sasudah awak mangaji beko, aden ka
mancaritokan carito tantang buah dalimo ka kalian."
Langsuang barubah kalakuan kami dek kecek Mak Niuh tu. Carito dari guru tu adolah nan
kami nanti-nanti. Ndak tiok ari inyo maagiah carito ka kami do, jadi mandanga inyo
manjanjikan ka bacarito sasudah kami mangaji, tantu sanang ati kami sadonyo. Jikok Mak
Niuh tu bacarito, ndak tantu wakatu dek kami mandangakannyo.
Jikok tantang buah dalimo tantu alah jaleh dek kami apo nan buah dalimo tu. Tapi dek
karano Mak Niuh nan mangecek inyo ka bacarito tantang buah dalimo, mangko tantu kami
sugiro ingin tau, baa bana curito buah dalimo nan ka dicaritokan dek Mak Niuh tu?
Buah dalimo siapo? Dima? Manga buah dalimo tu? Dimakan urang? Apo nan tajadi? Baitu
pertanyaan nan bakacamuak dalam hati kami. Mangko ndak ado-lah diantaro kami nan
bagarah2 lai mangaji sudah tu. Ambo tintiang mambaco duo juh, Simon sampai ampek juh
tambuak dinyo. Akhianyo, sasudah Mak Niuh salasai mangoreksi bacaan sarato tajuid
kami, mangko duduak lah kami di sakuliliangnyo, siap mandanga carito tantang buah
dalimo nan ka dicaritokannyo tu.
Cahayo lampu dindiang cap kapa manarangi muko Mak Niuh nan alah banyak garih2
karuiknyo tu. Wakatu tu mungkin umua Mak Niuh alah labiah juo anam puluah. Sajak inyo
bapulang ka Rahmatullah di wakatu ambo sadang sikola SMP, taraso bana dek kami
kahilangan guru kami tu.
Anyo suaro kaririak dilua surau nan manjadi latar balakang suaro Mak Niuh nan bacarito
tu, sarato suaro buruang hantu sakali-sakali, sayuik-sayuik sampai tadanga dari surau.
Mandanga suaronyo mungkin buruang antu tu babunyi dari kaki bukik Batu Biliak tu.
Sasudah kami alah duduak di sakuliliangnyo, mangko mulailah Mak Niuh bacurito.
"Pado maso daulu, ado surang anak mudo nan kito sabuik sajo si Fulan." Kecek Mak Niuh
mamulai caritonyo ka kami.
"Si Fulan ko adolah surang pemuda nan sangaik bansaik, tapi rajin bakarajo. Jujur,
sarato bertaqwa pada Allah SWT. Tiok ari inyo baparak indak kenal latiah, barujan jo
bapaneh di tapi batang aia. Tapi dek Tuana- Tuhan Allah alun mangandak-i, mangko
hiduiknyo alun lah dapek dikatokan sonang, miskin juo baru."
"Samantang pun baitu. Kaimanan si Fulan ko sangaik-lah kuaik. Jikok ado urang nan
manyuruah-nyo bakarajo, mangko karajo tu iyobana disalasaikannyo sampai urang nan
manyuruah pueh dinyo."
"Pado suatu siang nan sangaik paneh, si Fulan bakarajo di parak di tapi batang aia
sarupo biaso. Katiko si Fulan ko maraso panek, mangko baranti lah inyo bakarajo,
duduak nyo dibawah batang kayu nan rindang sambia manjuluakan kakinyo ka dalam aie."
"Mangko nampak-lah dinyo ado nan anyuik di batang aia tu dari arah mudiak. Dikaiknyo
jo batang kayu, kironyo nan anyuik tu adolah buah dalimo nan sangaik masak, sirah
ranum, mambuek sia juo nan mancaliaknyo pasti titiak saleronyo sarato ingin
mamakannyo."
"Baitu pulolah jo si Fulan ko. 'Pasti sabana manih buah dalimo ko, cubo dikicok
saketek.' Baitu kecek si Fulan tu. Dari mangicok saketek, akhianyo abih licin dinyo
buah dalimo tu, inggo incek jo kuliknyo sajo nan tingga indak tamakan, lainnyo licin
tandeh disungkahan dek si Fulan."
"Sasudah abih dinyo Dalimo tu, mangko taparangah lah si Fulan tu dek ado nan takana
dinyo. 'Astagfirullah.., buah dalimo ko tantu ado nan punyo, baa kok ambo makan sajo?
Lai ko izin ko urang nan punyo?' Baitu kecek si Fulan dalam hati."
"Namun dilanjuikkannyo juo dek si Fulan mangarajokan karajonyo sambia tatap mamikiakan
buah dalimo nan alah dimakannyo tu. 'Buah ko alah masuak kadalam paruik den, ka
manjadi darah dagiang di den. Jikok urang nan punyo indak rela, tantu haram hukumnyo
nan den makan tu.' Baitu pikiran si Fulan tu taruih, mambuek kiro-kironyo indak
tanang. Mangko diputuihkannyo lah dek si Fulan tu untuak barisuak ka pai mancari dima
asa buah dalimo tu. Nak ka mangecek jo nan punyo, jikok paralu dibayia kalau urang tu
indak rela. Jikok indak ado dinar ka pambayianyo, jo tanago malah dibayia, baitu
pikiran Fulan."
"Mangko sasudah sumbayang subuah di ari barisuaknyo, langsuanglah si Fulan mambungkuih
baka untuak kadibaonyo dalam parjalanan, dituruikkannyo lah batang aia tu mudiak,
andak mancari dima asa buah dalimo tu. Alun lai tabik matohari, namun si Fulan ko alah
bajalan cukuik jauah."
"Alah sahari panuah si Fulan bajalan, matoari alah ampia tabanam pulo baliak, tapi nan
tando-tando batang dalimo alun juo tampak lai. Raso takuik manjala di hati si Fulan,
batanyo2 dalam hatinyo, apokah malaikaik nan mahanyuikkan buah dalimo tu dari sarugo?
Karano salamo ko inyo iduik, dari ketek sampai bujang, alun pernah marasokan buah
dalimo nan sarupo jo nan dimakannyo tu."
"Katiko malam tibo, dicarilah tampek lalok di antaro batu2 di tapi batang aia tu dek
si Fulan. Katiko pagi tibo, dimulainyo bajalan baliak."
"Alah tujuah kali matoari tabik, tujuah kali pulo tabanam, tapi tando-tando batang
dalimo tu alun juo nampak dek si Fulan lai. Namun inyo bapantang baputuih aso,
ditaruihkannyo juo bajalan ka arah mudiak baliak."
"Pado hari ka sambilan, daerah nan ditampuahnyo iyo lah jauah bana dari daerah asanyo.
Tumbuah2an nan ado disinan banyak nan indak ado di desa tampek tingganyo. Di siang
hari pado hari ka sambilan tu, tampaklah suatu kabun dibaliak samak nan manarik
perhatian Fulan. Langsuang nyo bagageh ka sinan, ternyato, parak tu panuah dek batang
dalimo!"
"Buah nan ado di batang2 dalimo tu sangaiklah labeknyo. Banyak nan alah masak, sirah,
sabana manih nampaknyo. Babarapo batang dalimo marunduak ka tapi aia, sampai tacacah
rantiangnyo ka aie. Buahnyo sangaik ranum diateh aie mangalie nan bakilauan di bawah
cahayo matohari. 'Jadi siko-lah asa dalimo tu. Sungguah baruntuang urang nan punyo
parak ko. Bagaikan tiruan ladang di sarugo, -mungkin.' Baitu gumam si Fulan."
"Mangko dicari-carilah dek si Fulan, dima ko garangan urang nan punyo. Bajalan nyo ka
arah mudiak batang aia tu saketek lai, nampaklah dinyo rumah gadang nan sangaik
aguang, batingkek, sarato bakubah. Labiah gadang daripado musajik nan ado di kampuang
si Fulan."
"Jo perasaan harok-harok cameh, mangko ditokoknyolah pintu dek si Fulan tu."
"Seorang hamba sahaya datang manyambuiknyo sarato batanyo ka di Fulan, apo ko
mungkasuiknyo datang kamari? Mangko dijalehannyo lah dek si Fulan mungkasuiknyo ka
sinan, untuak mangecekkan sarato mamintak karilaan urang nan punyo taradok buah dalimo
nan alah dimakannyo tu."
"Disuruahlah si Fulan mananti sabanta dek hamba sahaya tu. Ndak lamo sasudah tu,
muncullah inyo baliak sarato disuruahnyo si Fulan mairiangkannyo masuak ka dalam rumah
gadang tu."
"Tangango si Fulan malewati sagalo nan ado di dalam rumah tu. Parmadani dari Persia,
guci-guci nan sangaik rancak nan indak tantu dek si Fulan darima asanyo, sarato
lampu-lampu hiasan nan baukiran dari ameh, akhianyo sampailah si Fulan jo hamba
sahaya tu ka ruangan nan dituju. 'Silahkan masuak ka ruangan disinan tu, baliau
Rankayao alah manunggu di dalam.' Kecek hamba tu, sasudah tu langsuang inyo babaliak,
maninggakan si Fulan di muko pintu gadang nan sangaik tinggi pulo."
"Ditulakkannyo lah pintu tu dek si Fulan jo parasaan ragu jo takuik. Nampaklah seorang
tuan (rangkayo) nan tagak di dakek jendela nan madok ka tapi aia, sahinggo aie nan
mangalia nampak jaleh dari baliak kaco, sarato buah-buah dalimo nan sangaik ranum tu.
Rangkayo tu mamakai sorban putiah, bajunyo nan panjang pun putiah, sarupo kapeh."
"'Masuak-lah.' Kecek Rangkayo tu ka si Fulan nan masih ragu bacampua takuik. 'Berang
nyo ka ambo beko?' Baitu tanyo ati si Fulan taruih."
"'Duduaklah, dan caritokanlah ampo mungkasuik kadatangan angku ka rumah ambo ko, anak
mudo. Mancaliak ka diri angku, bantuaknyo angku alah bajalan sangaik jauah. Sia ko
garangan namo angku?' Lanjuik Rangkayo tu sambia batanyo."
"'Maaf baribu maaf, Rangkayo. Ambo adolah si Fulan, mungkasuik ambo kamari adolah
untuak mamintak ampun baribu kali ampun ka Rangkayo nan mulia, dek karano ambo lah
sasek sarato khilaf, mamakan apo nan ukan hak ambo.' Kecek si Fulan sambia manyambah
dari ateh lutuiknyo bakeh rangkayo tu."
"'Apo kasalahan angku ka Ambo, wahai Fulan?' Tanyo Rangkayo tu. Mangko
dicaritokannyolah dek si Fulan baa kajadian sampai inyo mamakan buah dalimo tu. Sarato
kainginannyo nan tuluih untuak mamintak karilaan nan punyo, jikok paralu tantu dibayia
utang nan alah dibueknyo tu."
"Mangko bapikia-lah Rangkayo tu sabanta. Sasudah ditimbang-timbangnyo masak-masak,
mangko mangecek lah inyo ka si Fulan:
'Fulan, ambo iyo indak marelakan buah dalimo ambo nan alah angku makan tu do.'
Tasirok darah si Fulan mandanga kecek Rangkayo tu. 'Bialah ambo bayia, Rangkayo. Dek
karano ambo indak punyo dinar ka pambayia, mangko ambo bayia jo tanago ambo.' Baitu
kecek si Fulan manjawek, jo suaro nan agak gamataran.
'Angku lai tau, wahai Fulan? Bahaso buah dalimo ambo sangaik maha haragonyo? Indak ka
bisa angku malunasinyo do.'
'Sampaikan sajolah apo ka pambayianyo, Rangkayo. Insya Allah, ambo ndak ka manulak
malunasi kasalahan ambo nan alah mamakan apo nan bukan hak ambo. Bialah di dunia utang
ambo bayia daripado dibao sampai ka akhiraik.' Baitu kecek si Fulan mayakinkan
Rangkayo tu.
'Jadih-lah. Mulai barisuak sampai tujuah hari baturuik-turuik, angku bakarajo jo ambo
untuak manabuih kasalahan angku tu.'"
"Tugeh tu dijalani dek si Fulan jo sanang hati. Salamo tujuah hari inyo bakarajo
dibawah matoari nan sangaik paneh, bakarajo di ladang punyo rangkayo tu. 'Di narako
siksaan Allah bagi orang2 nan mamakan apo nan bukan hak-nyo jauah labiah padiah.'
Baitu batin si Fulan.
"Sasudah manyalasaikan karajonyo dengan sangaik samparono sampai hari ka tujuah,
mangko mahadok-lah baliak si Fulan ka Rangkayo tu. Baa jawek Rangkayo tu;
'Alun cukuik lai apo nan angku karajokan tu, Fulan. Jikok angku maraso indak sanggup
lai, silahkan angku babaliak ka kampuang angku, tapi nan ambo tatap indak rela. Tapi
jikok angku masih mangharapkan karelaan ambo, mangko ado tugeh lain nan harus angku
karajokan.' Mangko langsuang lah si Fulan manjawek; 'Ambo indak ka pulang sabalun
mandapek karelaan angku do, Rangkayo. Katokan sajolah apo tugeh ambo salanjuiknyo.'
"Mangko dijawek-lah dek Rangkayo tu; 'Angku harus bajalan ka Syria mengantarkan barang
dagangan ambo sarato manjua-nyo disinan.'"
"Syria! Parjalanan ka Syiria mamakan ampek puluah hari ampek puluah malam dari situ
manunggangi unto. Namun si Fulan pantang manyarah, mangko langsuang disambuiknyo kato
Rangkayo tu, 'Pabilo sajo Rangkayo nio ambo barangkek, ambo barangkek.' Mangko sasuai
jo instruksi rangkayo tu, barisuak pagi-pagi sasudah sumbayang subuah, barangkeklah si
Fulan sarato duopuluah ikua unto (onta) mambao barang dagangan manuju Syria.
"Alkisah, dek kajujuran si Fulan dan karano urang memang sanang mancaliaknyo, seorang
pemuda tampan nan jujur sarato elok hati, akhianyo si Fulan pulang baliak ka rumah
Rangkayo tu dengan hasia perdagangan nan didapeknyo sacaro jujur. Disarahkannyo kasado
hasianyo ka Rangkayo tu. Sampai ka dim-dimnyo (dim = sen dinar) indak kurang sarimih
indak, disarahkannyo ka Rangkayo tu."
"Mangko mangecek lah Rangkayo tu ka si Fulan baliak;
'Fulan, ambo caliak angku lai sukses pulo mangarajokan amanaik ambo nan kaduo ko.
Tingga ciek amanaik ambo nan harus angku jalankan. Jikok angku nio babaliak ka
kampuang angku, silahkan, ambo agiahkan kasado hasia perniagaan ko untuak angku. Tapi,
kerelaan ambo atas kesalahan angku mamakan buah dalimo tu jan diarok lai, ambo ka
tatap indak ridhla.'"
"Mambatin lah si Fulan mandanga kecek Rangkayo nan taragkhir tu. 'Astagfirullah...,
masih ado juo ciek tugas lain nan harus ambo karajokan...' Namun, karano si Fulan
memang alah bartekad untuak menebus kesalahannyo tu, apopun nan dikehendaki dek
Rangkayo tu, mangko langsuang-lah si Fulan batanyo baliak.
'Apo tugeh ambo nan salanjuiknyo tu, Rangkayo? Ambo siap malaksanakannyo.'
'Angku harus mangawini anak gadih ambo nan buto, bisu, pakak, lumpuah.'"
"'Astaghfirullah...' Tamanuang si Fulan mandanga kecek Rangkayo tu. Patuiklah anak
gadih-nyo tu indak pernah nampak, ruponyo rangkayo nan barumah sagadang ko, tarnyato
memiliki anak gadih nan cacat! Indak mancaliak, bisu, pakak, lumpuah.... Iko nan ka
jadi bini den...?' Baitu batin si Fulan."
"Sasungguahnyo suaro syaitan alah mulai masuak ka talingo si Fulan... 'Angku bodoh
bana ko Fulan, namuah se dipabudak rangkayo tea tu... Ciek buah dalimo nan angku makan
nyo, namuah se angku dimanfaatkan sarupo iko. Labiah rancak diambiak se hasia
manggaleh ka Syria nan dijanjikannyo tu, bakirok angku dari siko capek! Banyak urang
nan labiah rancak di kampuang angku!"
Agak tagalak ambo jo Simon mandanga, karano sia pulo nan ka namuah dipaso babinyi jo
urang gadih buto, bisu, pakak, sarato lumpuah pulo, kayo baiak inyo? Nan kami caliak
tiok ari adolah gadih-gadih rang Pikumbuah nan kecek urang 'aie-nyo janieh ikannyo
jinak'. Gadih2 Pikumbuah tantu dunsanak tau iyobana rancak-rancak, jarang nan buto,
pakak, atau lumpuah. Apolai mampunyoi cacat katigo-tigonyo tu sakaligus, buliah
dikecekkan indak ado. :)
Namun dek carito Mak Niuh sadang tagantuang, mangko kami aliahkan pangana kami dari
gadih-gadih Pikumbuah nan alun ka namuah ka kami dek kami anak2 ketek baru, kami
taruihkan lah mandanga carito Mak Niuh ko baliak jo panuah paratian.
"Namun dek dasar kaimanan si Fulan ko iyo sabana kuaik, mangko indak didangakannyo
godaan syaitan nan masuak ka talingonyo tu. Dibulekkannyo baliak atinyo andak mamintak
karidhlaan Rangkayo tu taradok buah dalimo nan alah dimakanannyo. 'Jikok baitu
kainginan Rangkayo, mangko Ambo siap mangawini anak Rangkayo nan buto, pakak, sarato
lumpuah tu.' Kecek si Fulan mantap."
"'Anak ambo tu sadang duduak di dalam biliak di sinan, mananti angku. Silahkan angku
caliak ka sinan, wahai Fulan.' Kecek Rangkayo tu sambia manunjuak ka sebuah kamar
lainnyo nan ado di rumah tu. Pintu masuaknyo bawarna putiah barasiah, tinggi,
taganggang saketek. Katiko si Fulan mandakek ka pintu tu, tacium dek inyo bau harum
aroma bungo nilam nan ruponyo tagantuang di pintu."
"Ditulakkannyo dek Si Fulan pintu tu. Tangango si Fulan mancaliak surang anak gadih
rancak nan mamakai pakaian sagalo putiah. Matonyo mancaliak ka Si Fulan dari baliak
cadar nan tipih, sambia duduak manyilang kaki di ateh kursi baukiran nan sangaik
mewah. Walaupun seluruh tubuahnyo tatutuik dibaliak kain putiah barasiah, namun
namonyo kain tantu maikuti bantuak tubuh urang nan mamakainyo. Ampia indak tadanga
suaro si Fulan katiko mangecek jo suaro lirih, 'Assalamu'alaikum...?'"
Manjaweklah gadih tu langsuang dengan suaro jaleh, 'Hai...'
"'Wa-alaikum salam, wahai Fulan calon junjunganku..., Aku dan ayah sudah sama-sama
sepakat, ternyata angku-lah nan kami nanti-nanti salamo-ko.' Kecek gadih tu sambia
bajalan ka arah si Fulan."
"Takajuik si Fulan indak alang kapalang, 'Baa kok kecek Rangkayo ayahnyo tu, anak
gadihnyo buto, bisu, pakak, sarato lumpuah? Sajaleh tu siaik anak gadihnyo,
dikecekkannyo buto, bisu, pakak, lumpuah! Sasek masuak biliak ambo ko?'"
"Untuak mahilangkan karagu-raguannyo, mangko balari lah si Fulan ka rangkayo tu
baliak. 'Rangkayo, sasek masuak ko ambo? Masuak ambo ka biliak nan angku tunjuakkan
tu, indak ado anak gadih buto, bisu, pakak, lumpuah sarato nan angku kecekkan tu do.'
Kecek si Fulan sambia sasak angoknyo dek balari tu. Antah ko lah kok sasak angoknyo
dek nan lain. Mangko dijaweklah dek Rangkayo tu pertanyaan si Fulan tu dengan bahaso
nan sangaik lamah lambuik;
'Duduaklah baliak, wahai Fulan anakku.' Kecek rangkayo tu sangaik tanangnyo.
'Sasungguahnyo Allah SWT sadang menguji keimanan angku lewaik ambo. Dan bagi ambo
surang, kadatangan angku kamari adolah rahmat nan indak takiro pulo, nan kami
tunggu-tunggu salamo-ko. Alah angku caliak, anak ambo adolah surang anak gadih nan
tajago kahormatannyo. Namun alah bataun-taun alun ado jodoh nan patuik untuaknyo, nan
beriman sarato manjago kahormatan dirinyo di dunia sarupo angku, wahai Fulan anakku.'"
"Alun sempaik si Fulan mananggapi, dek muncuangnyo tangango manyadari apo nan
sabananyo tu, mangko mangecek lah Rangkayo tu baliak malanjuikkan titahnyo;
'Baa kok ambo kecekkan inyo buto? Karano walaupun inyo mampunyoi kaduo mato nan
paliang rancak di duniako, nan bak cando matohari dek kasado kami nan barado di ateh
rumah ko, namun kaduo matonyo itu indak pernah inyo caliak-kan ka sagalo nan dilarang
dek Allah SWT. Sagalo maksiat nan lah biaso dicaliak urang banyak, ndak pernah
dicaliaknyo. Dek karano itulah ambo kecekkan inyo buto.'
'Baa kok ambo kecekkan inyo bisu? Karano kaduo bibianyo nan bakcando limau duo uleh
nan ranum tu indak pernah dipagunokannyo untuak mangecekkan kato-kato nan ditagahkan
dek Tuhan Allah SWT. Apo nan biaso dikecekkan urang nan ndak disukoi Allah SWT, indak
pernah dikatokannyo, iyobana ditutuiknyo muluiknyo rapek-rapek dari hal2 nan indak
diridlhai Allah SWT, dek karano itu mangko ambo kecekkanlah baso inyo bisu.'
'Baa pulo inyo ambo kecekkan pakak? Karano walaupun kaduo talingonyo nan rancak sarato
bisa mandanga jarum panjaik jatuah, namun kaduo talingonyo tu indak pernah
dipagunokannyo untuak mandangakan apo-apo nan dilarang oleh Allah SWT. Mangkonyo ambo
kecekkan inyo pakak, karano inyo indak mandanga apo nan suko didangakan dek urang2
lain, nan lah biaso mandangakan apo2 nan dilarang Allah SWT.'
'A, baa pulo ambo kecekkan inyo lumpuah? Sarupo nan alah angkau katahui, wahai Fulan,
inyo mampunyoi kaduo kaki nan utuah, indak bacacek jo bacelo nan alah bisa angku
bayangkan bantuaknyo tu. Tapi kaduo kakinyo indak pernah inyo pagunokan untuak bajalan
ka tampek-tampek maksiat, nan dilaknat oleh Allah SWT. Baa mangko ambo kecekkannyo
inyo lumpuah karano inyo indak pernah bajalan ka tampek-tampek nan urang lain suko
bajalan ka sinan, dek itu pulolah ambo kecekkan inyo lumpuah.'"
"Akhianyo, jodoh nan salamo ko dicito-citokan dek si Fulan, diberikan Allah SWT
padanya karena jiwanya yang sangat suci dan benar2 mencari keridlhaan Allah daripado
sekedar materi duniawi."
"Jauah dari apo yang dibayangkannyo, si Fulan malah mandapekkan seorang jodoh gadih
nan cantik jelita, berakhlak mulia sarupo nan dikecekkan Rangkayo Bapaknyo tu, sarato
kayo rayo pulo."
"Sasudah Rangkayo tu maningga, mangko si Fulan lah nan mawarisi kasado kakayaannyo.
Walaupun alah indak dalam kesusahan lai sarato memiliki harato balimpah paninggalan
Rangkayo tsb, namun si Fulan ndak pernah lupo diri dan indak pernah lupo mambantu
urang2 nan kasusahan. Kasado kekayaan duniawi itu indaklah menjauhkan di Fulan dari
ketaqwaannyo terhadap Allah SWT."
Baitu kecek Mak Niuh manutuik caritonyo ka kami.
Parung, 27-28 September 2004
Wady Afriadi
Yahoo! Groups Sponsor
ADVERTISEMENT
--------------------------------------------------------------------------------
Yahoo! Groups Links
a.. To visit your group on the web, go to:
http://groups.yahoo.com/group/urangawak/
b.. To unsubscribe from this group, send an email to:
[EMAIL PROTECTED]
c.. Your use of Yahoo! Groups is subject to the Yahoo! Terms of Service.
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
