Assakamu'alaikum WW
Ado email permintaan maaf dari si Af (Wadi Afriadi) nan masuak ka group admin Palanta Rantaunet,
dek karano ndak bisa lansuang posting ka balerong, ambo forward ka balerong........
Wassalam
Z Chaniago - Palai Rinuak - http://www.maninjau.com ====================================================================== Alam Takambang Jadi Guru ======================================================================
To: [EMAIL PROTECTED] Cc: [EMAIL PROTECTED]; [EMAIL PROTECTED] Subject: Parmintaan Maaf dari Wady Afriadi
Selasa, 28 September 2004/ 13 Sya'ban 1425 H.
Kapado Yth. Niniak Mamak, Cadiak Pandai, Bundo Kanduang, sarato kasado karapatan nan duduak ateh palanta banamo Rantau Net;
=================================================
Sahubuangan jo carito ambo nan bajudul, "Apokah Al-Qur'an itu..." babarapo wakatu nan lalu, nan lah mambuek ambo dikategorikan sebagai mambuek "flaming" di palanta Rantau Net ko, mangko ambo salaku si panulih carito tasabuik, mamintak maaf nan satulusnyo kapado mamak-mamak, alim ulama, cadiak pandai, bundo kanduang, sarato kasado dunsanak nan alah ta "flaming" dek carito tu.
Nan mungkasuik ambo indak lain dan indak bukan, adolah jikok ado mamak2 kito sarato cadiak pandai ataupun bundo kanduang nan labiah mangarati, dapek manjalehkan bakeh kito basamo, supayo indak ado partanyaan2 di hati kito nan mungkin indak mangatahui tantang masalah agamo sadalam mamak-mamak kito, cadiak pandai, alim ulama, sarato bundo kanduang nan mulia nan ado sabalik palanta ko.
Namun, mungkin dek suratan ambo nan gadang dek usiran, jan lai jawek nan ka dapek, usia malah nan tibo.
Dek karano ambo nan darah alun satampuak pinang, umua alun sataun jaguang (tigopuluah lewaik saketek baru), mangko atas kakhilafan ambo nan indak awas di lotiang nan ka manganai, condong nan ka maimpok, ambo sakali lai mintak maaf kapado mamak-mamak, bundo kanduang, sarato kasado dunsanak sabalik palanta ko, ketek indak ambo sabuikkan namo, gadang nan indak bahimbaukan gala.
Mudah-mudahan, dek adonyo kajadian sarupo iko, mangko batambah juo aka ambo. Dapek pulo ambo ambiak hikmahnyo untuak maso-maso nan ka datang.
Indak dek karano iko sajo, berhubuang indak lamo lai awak ka manyongsong bulan suci Ramadhan, mangko marilah kito habisi sagalo khilaf khulafat nan ka mangganggu kito basamo dalam manjalankan ibadah puaso. Salah ka manusia kito minta maaf, salah kapado Allah SWT kito minta ampun sarato bertobat. Harapan kito basamo, tantu dapeklah kito babaliak ka fithrah kito, untuak manjadi insan nan suci baliak, barasiah dari kasado kasam kasumaik sarato khilaf khulafaik nan mungkin tabuek salamo ko.
Ambo sampaikan pulo tambusan permohonan maaf ko kapado Karapatan Surau nan terhormat, nan mungkin indak bakalamak-an pulo dek karano carito ambo tu.
Namun, ijinkanlah ambo manyampaikan penghargaan ambo nan sadalam2nyo ka mamak2 nan barado di Surau, karano bukannyo usiran nan ambo dapek, tapi jawek nan maubek tanyo.
"Al Qur'an adolah pitunjuak nan sabana langkok untuak umaik manusia, sahinggo caro bado'a pun diwahyukan oleh Allah SWT nan termaktub dalam surek Al-Fatihah nan dibahas dek Simon tu."
Ondeh, iyobana raso mandapek siraman rohani nan sojuak ambo rasonyo mambaco jawek dari salah surang mamak kito di surau tu.
Iko-lah pitunjuak nan alun dapek dek ambo jo Simon salamo ko.
Baitu sajo dari ambo mamak-mamak, alim ulama, cadiak pandai, sarato bundo kanduang nan ado diateh palanta nan mulia ko.
Selasa, 28 September 2004/ 13 Sya'ban 1425 H.
Wassalam, Wady Afriadi, S.Sn
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
