Assalamu'alaikum Wr. Wb. Tuan H. M St Bangsawan sarato karapatan Rn. Mandanga rundiangan nan katangah dari Tuan kapanjawek tanyo dari ambo rasono badan diateh awan baitu sanang kiro-kiro. Lah lamo diniak dalam ati takanduang dalam kiro-kiro iyo mambangkik batang tarandam sampai nan dimukasuk dalam ati, nan di kaua lai ka sampai pulo, dulu jadi rasian ditangah malam. satantangan Baralek Gadang nan ka diadokan sahari sudah hari rayo, kok diambo iyo subagai panguaik nak pulang hari rayo bisuak, kapatangko agak baragan baru ambo kapulang, tapi karano lah dapek jawek dari Tuan wakatu untuak Baralek Gadang, mako batambah niaik tu nak ka pulang. Siriah sacabiak nan ka dikunyah sarato pinang nanka digatok, baitu pulo rokok sagiliang nan kadiisok, pangganti undangan bakeh dunsanak, mancaliak pado wakatu, iyo alah ampia rasono, lah rancak bana diantakan Tuan. Karano bapakai dalam adaik, manjadi undang di nan tuo, kok dakek balain tampaik, kok jauah balain diam, nan dakek pakaian imbau, siriah langkok manjalani, kok jauah surek nan tibo dek habih adaik bakarilahan. Lorong kapado diri ambo, kok buliah pintak jo pinto samokan ambo jo sipangka indak manjadi alek tamu samo jo anak kamanakan usah Tuan basusah pulo malayangkan surek mangirim baka, tandono ambo bukan alek tamu. alah kasanang hati Tuan Wassa;amu'alaikum Wr.Wb. Bandaro Labiah No. HP ambo nan ilang dulu, kini alah dapek baliak
Mulyadi <[EMAIL PROTECTED]> wrote: Waalaikum salam, wr, wb. Sanak ambo Tan Bandaro Labiah, kok etongan ka batagak pangulu nan Tuan tanyokan, iyolah sapakaik urang di kampuang bahaso acara batagak pangulu tu akan diadokan sahari sasudah lebaran tahun ko, tapekno di tgl. 16, 17 dan puncaknyo 18 November 2004 hari kamih yaitu acara naiak ka ateh balai. Tantu dek wakatu capek balalu, dek kito bajauahan, apo kah buliah ambo sampaikan rokok nan sabatang, siriah nan sagatok, undangan ka Tuan dan ka dunsanak RN kasadonyo melalui dunia maya ko .....?, kok lai buliah, ambo maundang dunsanak kasadonyo untuak hadir di nagari kami Sulik Ayie pado tanggal dan hari nan ambo sabuikkan tadi. Nantik akan ambo ulang baliak tertib acaranyo mano tahu kok ado nan tacicia. ==== Wassalam, M.St.B --------------------------------- Yahoo! Messenger - Communicate instantly..."Ping" your friends today! Download Messenger Now ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
