Si Usuit Tagia Bagala Oleh : Noor Indones St. Sati + : "Assalamualaikum" - : " Waalaikumsalam Pak Sati",..... sambia mamuta badan " Eee, Usuit. Bilo dari Medan?" + : " Yerterde Pak Sati" - : " Lah santiang ang babahaso Bule mah?" + : " Ai ken wan-wan Pak Sati" - : " Lai basuo dek ang si Katik di Medan?" + : " Ketika jalan sana, ada jumpa sama dia, waktu nak balek dak betemu lagi." - : " Baa, cubo ulang." + : " Katiko kapulang indak basuo lagi." - : " Iyo batambah santiang Usuit kini. Bak kecek papatah awak, Sakali marangkuah dayuang, duo tigo pulau talampaui, sakali mambukak puro duo tigo utang tabayia, sakali manggauik kada duo sendok kalempeang jatuah, sakali mambukak muncuang duo tigo bahaso dapek." + : "Ambo bapuji, tapi kapalo ambo apak laga. Kini ambo nak batanyo lai buliah Pak?" - : " Buliah, buliah. A nan ang tanyokan?" + : " Di sampiang gala Sutan Sati, ado pulo gala Apak Sutan Palaga. Baa pulo iko Pak?" - : " Sutan Sati sabana gala. Sutan Palaga, gala paragiah kawan di palanta. Kecek kawan-kawan sasuai jo kaahlian Apak. Malaga kapalo urang sambia mambari nasihat." + : " Drs di pangka namo Apak, apo pulo itu?" - : " Panjangnyo, Di Rumah Sajo. Indak cando waang sabanta ka Padang, sabanta ka Jawa, patang lah dari Medan pulo. Usuit bisa Apak agiah gala. Baa?" + : " Jadi Pak, tapi nan sasuai." - : " Iyo, iyoo. Gala tantu iyo sasuai jo keadaan awak. Ambiak pena jo karateh. Catet ! Mr. Yusuf, MLs, MTg. Panjangnyo: Marah Yusuf Malala sajo Marando Tagang." Tarangah Yusuf mandanganyo : " Usuit ! Sabalun gala ko waang pakai, dalami dulu bahaso Arab Minang Buya Hamka ko : Ahajjanu tuahu, tafansyara sirtuha. Bahaso awaknyo: Tuah kok diajan cirik nan tapanca." + : " Itu puloo. Jadilah Pak Sati. Sagan awak, beko ado nan tasingguang". Sambil basalam Usuit mengucapkan tarimo kasih dan dari muncuangnyo tadanga assalamualaikum. Pak Sati manjawab: waalaikumsalam...
Sumber: www.nagari.org ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
