Dari www.nagari.org Mambuek Surek Basamo Oleh: Drs Noor Indones St. Sati Salasai arisan keluarga, Mak sati jo babarapo anggota arisan masih duduak di ruang tamu mairuik kopi nan dilatakkan tuan rumah. Mangkuto nan terkenal cipeh' mambukak kecek tantang pengemis jalanan di antaro bukik Kaba jo kubu Karambia Padang Panjang. Mangkuto mulai mangecek: "Lai mandanga Mak Sati, bak raso ado pangemis jalanan antaro Bukik Kaba jo Kubu Karambia. Kabanyo lai 20 pos tampaek urang manadahkan tangan ka urang lalu sahinggo karajo tu mamacetkan jalan bakilo-kilo, alasannyo musibah latusan gunung Tandikek". "Macam ko Mak Sati, Menan mauleh". "Bukan cuma mamacetkan jalan, tapi karajo tu mamalukan; mamalukan urang Minang nan dari desa alah kambali ka nagari, babaliak ka surau. Nan caro tu parangai anak desa; bukan tingkah laku anak nagari ! Jadilah !... Mak Sati mampaarek selonyo. Guritiak kalian tu lah jaleh di ambo, bak kecek urang, "Malin sakitab, pangulu saukun, mudo samalu";.. kan itu dasarnyo. Nan kini ko kebiasaan tu paralu di antikan. Baa caro maantikannyo. Kalau caro ka caro, sarahkan ka ambo; Sutan Indomo kan banyak teori, garageh Sutan Indomo. Awak buek surek ka Bupati Tanah Data, supayo Bupati managahkan anak buahnyo babuek nan mamalukan itu. Kalau co itu, Menan ambiak karateh, pacikkan pena; ambo diktekan tulih di awak.
"Alah ! tulihkan ! Palembang, 2 maret 2003 Yth. Bupati Tanah Data di Batu Sangka Kami di rantau, sangat prihatin terhadap musibah gampo nan maluluah lantakkan nagari di wilayah Pak Bupati, tapi nan labiah prihatin lagi iyo lah basamaan dengan luluah lantaknyo babarapo nagari, luluah lantak pulo kepribadian anak nagari sampai-sampai manadahkan tangan di tapi jalan, manggaduah urang lalu, babaliak ka parangai anak desa. Harapan kami urang rantau: Rumah buruak jan sampai tampak dek urang maliang, Mambuhua jan badungkua, Mauleh jan mangasan, Paham jan sampai tajua, Budi jan sampai tagadai. Kalau mamahek di ateh barih Jan karajo marusak papan Jiko mularaek indak bapitih Maangok usah kalua badan Si amuak-amuak dalam padi Cuko di dalam pambaresan Sungguah ramuak dalam hati Di muko jan ditampakkan Baa, jadilah ! Tambahi, saketek lai Mak Sati. Karano Pak Bupati punyo Mamak nan baru dapek, nan gadang basa batuah, kapa-i tampaek batanyo, ka pulang tampaek babarito, kok litak tampaek mintak nasi, kok auih tampaek minta aia, banamo Taufik Kiemas bagala Datuak Basa Batuah. Kirim surek ka baliau, urai paparkan nasib awak, onkoeh parangko alah dikirim IKTD Palembang Rp. 15 juta. Ingekkan beliau. Kaluak paku kacang balimbiang Tampuruang lenggang lenggangkan Anak dipangku kamanakan dibimbiang Urang di kampuang patenggangkan Supayo tapakai pantun adaek urang Minang Wassalam Cukuik-cukuik! Sia maneken ? Mak Sati tu lah ! Mangarang ambo, meneken Mak Sati pulo !. Si Usuik sajolah nan maneken. ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
