Assalamu'alaikum, Wr, Wb. Nan terhormat Sutan Bandara Labiah, Dunsanak ambo Tan Badaro Labiah pulo diimbau, sungguahpun Sutan surang nan taimbau, wujudnyo iyolah kapado Niniak Mamak nan gadang basa batuah, ibarat batang baringin ditangah koto, ureknyo nan bajelo-jelo tampek duduak baselo, batangnyo nan kokoh tampek basanda, daunnyo nan rimbun tampek bataduah, Cadiak pandai suluah bendang dalam nagari, pai tampek batanyo, pulang tampek babarito, Alim Ulama nan tahu di hala jo haram, nan tahu hereang jo gendeang, tahu dikato sampai, Urang sumando nan capek kaki ringan tangan, kok keteknyo indak kabasabuik namo, kok gadangnyo indak ka baimbau gala, salam tatuju ka dunsanak Tan Bandaro Labiah surang. Adapun sambahnyo adolah sambah pendek sajo, yaitu satantangan akan di Restrukturisasinya kepengurusan SSS cabang Palembang, dimano kini diketuo'i oleh : Bpk. DR (Hc) H.Syahruddin Ismail MBA dan nan ambo sendiri dipicayo pulo diposisi Ketua II. Dek kami baru badiri atau baru di restrukrisasi tadi mako kami masih buto, mainduak kama untuak tingkek nasionalnyo. Sebab dulu pado bulan Juni nan lalu ambo sempat hadir ka Jakarta dalam acara diskusi adat nan disponsori oleh SSS Jabotabek (SSS Pusat ?) nan kalau indak salah Yth Bpk. Irjen Pol Marwan Paris ketuanyo (sakali lai tando tanyo ?). Jadi ambo mintak tolong ka Sutan Bandaro Labiah atau siapo sajo nan bisa manjawek ka jadi tanyo dari kami nan di Palembang ko, kama kami harus menghubungi Bpk Marwan Paris tu. (mungkin Rank Marola pasti dapek manjawek tanyo ambo ko) dan kalau dapek kami dikirimkan AD/ART dari SSS ko.
Untuak samantaro itu dulu etongan nan ambo katangahkan ka karapatan RN ko, mungkin ado nan tahu, talabiah dahulu kami haturkan tarimo kasih. Sifek mananti lah ambo agak sajamang. Wassalam, HM.Dt.Marah Bangso . ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
