Assalamu'alaikum wr.wb.,
Ambo satoi judul ustadzah mudo Rahima namun ambo rubah saketek. Laa tahzan wa
laa khauf. Jangan sedih dan jangan takut. Tantu bukan jo katakaburan kapado
Allah awak mangecek-an laa tahzan wa laa khauf, jaan sadiah, jaan takuik. Tapi
jo basarah diri kapado Allah dengan sautuahno, sabulek-bulek panyarahan.
Takuiklah hanyo kapado Allah sajo.
Musibah Aceh adolah palajaran nan sangaik gadang bana aratino kalau awak
bariman kapado Allah. Samakin sadar awak nan bahaso awak, manusia kaciakko,
indak ado apo-apono dibawah kakuaso-an Allah Ta'ala doh. Kalau Allah
bakahandak, kalau Allah manjadian, sungguah tajadilah apo sajo nan dapek
tajadi. Banjir gadang, gunuang malatuih, galombang lauik pasang nan naiak ka
darek, bumi rangkah, gunuang runtuah. Sabagian jo akibaik dek ulah tangan
manusia babuek karusakan di muko bumi ko samisal banjir bandang dek rusakno
hutan rimbo, sabagian sabagai katantuan dari Allah, sunatullah, sarupo gunuang
malatuih, tsunami, gampo bumi, gunuang runtuah.
Sabagian pulo awak baco di dalam al Quran sabagai hukuman Allah taradok
umaik-umaik nan durako, Allah datangkan banjir gadang (kaum nabi Nuh), atau
bumi di porakporandakan (kaum nabi Luth), didatangkan angin putiang baliuang
(kaum nabi Huud), didatangkan patuih gadang jo hujan badai (kaum nabi Shalih)
dan sabagaino.
Allah Maha Bakuaso mutlak untuak mandatangkan maro bahayo nan sarupo itu dan
alah diadokan parangkat di dalam bumiko untuak mandatangkan musibah-musibah
sarupo itu. Gunuang barapi bisa dan biaso malatuih, angin putiang baliung bisa
dan biaso diadokan Allah, lauik basa bagalombang bisa dan biaso tajadi, gampo
parajan datang. Sagalono serba bisa, dan serba panah dipanampakkan Allah ka
awak.
Di bumi tampek awak tagak, wa bil khusus di nagari awak Indonesiako, labiah
khusus pulo lai di Sumatera bagian barat, di Jawa bagian selatan, di Sulawesi
bagian utara, di Maluku, di Irian dima talatak gunuang-gunuang barapi, adolah
tampek-tampek nan alah ditatapkan Allah SWT sabagai tampek nan potensial untuak
tajadi latusan gunuang barapi, atau gampo tektonik, atau kaduo-duono sakali,
barikuik jo galombang pasang (tsunami) sarupo nan tajadi kapatang di Aceh tu.
Kalau Allah kamanjadian, mako sungguah, tampek awak tinggako iyo indak aman
doh. Gunuang matatuih, alah tajadi. Gampo tektonik gadang alah tajadi.
Galombang lauik pasang alah tajadi. Tsunami alah tajadi. Jadi kabaa lai?
Aratino, kama awak kamintak tolong? Disikolah awak faham (harusno) nan bahaso
awak ko iyo lamah. Awakko iyo nggak ada apa-apanya. Jaan kayo awak nan
kadisabuik. Ijaan pangkaik tinggi awak nan kadibaco. Jaan santiang awak nan
kadikecek-an. Katiko musibah datang, katiko bancano tibo. Kama kalari? Ka sia
kamintak
tolong? Kalau bukan kapado Allah. Kama awak kabalindungan kalau indak kabawah
parlinduangan Allah Ta'ala.
Kalau lai ado kaimanan kapado Allah di dado, mako yakinlah awak nan bahaso
awakko sabulek-bulekno barado dibawah kakuasoan Allah. Nan bahaso apopun nan
tajadi harus awak tarimo jo kaikhlasan, jo kasabaran, jo katawakalan. Allah
Maha Bakuaso. Allah Maha Manantuan. Allah Maha Maliputi. Indak usah awak cameh,
indak usah awak ragu. Indak paralu awak basadiah bakabiahan bana, dan indak
paralu awak takuik. Kok nyampang iyo tajadino, itu adolah dek Allah kuaso
manjadianno, awak pasrahkan diri awak kapado Allah samato. Cukuiklah awak
tingkekkan kaimanan jo kayakinan awak kapado Allah. Kapado Allah samato awak
basarah diri. Katiko musibah manimpo, capek awak manganakan diri awak, nan
bahaso, awakko datang dari Allah, dan kapado Allah awak ka baliak.
Mako, mudah-mudahan jadi batambah kaimanan awak sasudah paringatan demi
paringatan Allah. Manjadi bakurang kacintaan nan balabiah-labiahan awak taradok
dunia jo isinoko. Dan kalau alah sarupo itu, sandaino awak manarimo pulo
musibah nan sarupo dari Allah, sasudah awak basarah diri kapado Allah, indak
paralu awak takuik lai dek Allah manjanjikan malalui lisan Rasulullah SAW,
bahaso umaik baliau nan kanai bancana, mati tanggalam, atau dihimpok gunuang
runtuah, insya Allah mati dalam kaadaan syahid disisi Allah SWT.
Laa tahzan wa laa khauf. Amantu billah, laa haula walaa quwwata illa billahi.
Wallahu a'lam.
Wassalamu'alaikum wr.wb.,
Lembang Alam
---------------------------------
Do you Yahoo!?
Yahoo! Mail - Helps protect you from nasty viruses.
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
