Assalamu'alaykum wr.wb. Sidan RN nan ambo muliaka n Alhamdulillah, wa syurkurillah, itu juo nan basabukkan, karano rencana samulo, acara Bagurau di RRI Bogor lai talaksana sasuai jo nan dimukasuk. Sungguahpun ari hujan gadang baganti jo rinai, nan tamu lai tibo, indak disabuk ciek-ciek namo, indak diimbaukan surang-surang gala, rasono nan datang lai langkok ganok, baiak nan dari Banten, Bekasi Jakarta, Bogor. Paruang jo Depok Kok asa jo kampuang baliau nan datang, lai pulo langkok rasono, ado nan dari Pikumbuah, baitu pulo dari agam, sato pulo dari Pitalah Bungo tanjuang, padang panjang jo Solok, indak katinggalan Batusangka, sarato Piaman jo pasisia, langkok jo Maninjau nan jo Tiku. Anggota RN lai pulo hadir, baliau Tuan Erwin. Sutan Rangkayo Mulia,
Kok mancaliak pado umua nan datang, dari nan ketek sampai nan gaek, iyo mudo nan jo tuo, laki-laki jo padusi, sananglah hati mamandangi Sajak pukua tujuah malam lah bi tibo, namun dek samo taragak jo basapoan kasadono, baiak di lua maupun di dalam aula, kok iyo acara Basaluang jo Rabab sarato Dendang tapaso alun bamuloi sungguahpun nan ka basaluang jo barabab alah hadir, mungkin dek lamak carito kian kamari. dek ari lah bajalan juo, iyo dibaok baerak malah alek nan datang, baerak dari alam nan bapaneh, ka alam nan balinduang, iyo di Aula RRI, samo duduak barapak dilapiak nan sahalai.. Samulo Bagurau ka dimuloi, mako basampaikan pulo kato sapatah, rundiangan nan sabuah, indak jo pasambahan, tapi lalunyo jo kabanaran sajo. Talang sarueh nan babunyi, mairiang urang nan dedang, wakatu bagurau ka bamuloi, iyo diimbau jo dendang Singgalang Dek wakatu lah bajalan juo, labiah kurang lah sa jam, mako basambuangkanlah acara ka Radio (on air), malayoklah dendang saluang nan jo raba kian kamari, sampai ka suduk-suduk dapua taruh ka ruang tangah masuak ka biliak dalam, iyo dirumah masiang-masiang pandanga. Samantaro kami bagurau di RRI, sambia makan Pelo baabuh jo kue talam, ado pulo goreng pisang, kue gadang, langkok jo kopi aia putiah. nan carito batambah sero, ado nan bagisia jo basingguang, gisie jo singguang lewaik dendang nan jo rabab, disinan takakah galak urang, mancaliak merah muko urang, namun hanyo dalam bagurau Kok nan dirumah buliah sato pulo, interaktif rang namokan, acara banamo Bagurau Di Udaro, malalui telp 0251-312450 nomor no, lah bacarigik urang manakan, kok indak masuak ka baa juo diulua namuah no panjang, dipunta sajo nak no singkek,.sakiro pukua 3 manjalang subuah, baranti sabanta si tukang dendang, baitu pulo jo tukang Saluang, kami bamupakaik agak sabanta, iyo bamulah nan manyudahi. dek capek dapek kato mupakaik, lalu bana jo baiyo, mako basudahi acara Bagurau nantun, batutuk pulo nan jo dendang, tarakhir dendang Kasiah Kacarai. sungguahpun acara alah salasai, nan maota taruh juo, sakiro pukua ampek jo satangah limo, barulah mulai banyak nan maiyak langkah, pulang katampaik masiang-masiang. Limbak nan dari pado itu, nan jadi pamikiran di ambo kini ko, bukanno panek jo latiahno, tapi satantangan kaet rekaman nan samulo baniaikan, iyo agak mauruk dado ambo saketk, baa sabab dek baitu, iyo dek karano hasia rekaman nan kurang samparono, maklumlah dek tumbuak tanak di badan surang, kok hasia rekaman lai 8 buah kaset (c 60 = hampia 8 jam kasadono), tapi bak kato urang tuo-tuo juo, lai nan di hati, tapi indak bisa ba kandak hati, bapulang maklum tantang itu Sakiro itu nan takana dihati, takilan di mato, salah jongga sarato kok indak pado tampaikno, maaf juo nan bamintak Wassalamu'alaykum Wr.Wb. Bandaro Labiah --- In [EMAIL PROTECTED], Sjamsir Sjarif <[EMAIL PROTECTED]> wrote: > Salamat manikmati Saluang sarato manunggu kadatangan "Samalam di Ranah > Minangkabau". Dari jauah ambo manikmati, mambayangkan sajo, mudah- mudahan > sumarak acara di Rantau Bogor, tantu saluang juo nan kamanyampaikan. > > Bagurau kito bagurau > Bagurau paubek risau > Saluang jo Rabab nan ka maimbau > Salam ditarimo dek Rang Lapau. > > Lah lamo Kampuang indak tasilau > Marapi Singgalang tigo jo Sago > Walaupun Jauah badan di Rantau > Namun Saluang takana juo. > > Salam, > --Mak Ngah > Di Tapi Riak nan Badabua ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
