Yth. Urang Awak;
Tagalitiak ati ambo untuak mangomentari katiko mambaco posting Sangkakala di palanta Urang Awak nan batanyo, apo ko nan kurang dari bangso kito?
Takana dek ambo, katiko maso-maso dulu ambo jo Simon sadang manjalani maso-maso 'kuliah' nan sabananyo.
Kebanyakan ilmu nan ambo dapek, ukanlah dari kampus nan bagedung sarato banyak dosen tu. "Kuliah' nan iyobana memberikan ilmu-ilmu sarato pituah nan baharago labiah banyak ambo dapek dari kampus iduik nan sabananyo, yaitu: lapau.
Di lapau ('lopou', baitu kami manyabuiknyo di Tiakar Kecamatan Guguak, Kab, 50 Kota, Pikumbuah mudiak) kito mandapek banyak palajaran iduik nan sangaik baharago, nan ndak jarang malabiahi kaji-kaji nan disampaikan dek buya-buya kito dalam satiok kesempatan, baiak di bulan puaso maupun di lua bulan puaso.
Kaji, kami picayo iyo sarupo anggapan urang kampuang;
"Kaji tu kan untuak urang, untuak awak lain pulo." Baitu pituah nan kami tarimo, iyo baitu pulo nan tampak dek kami. Jadi kerajinan kami ka musajik tiok malam di bulan Ramadhan nan panuah berkah tu, ukanlah untuak mamparhatikan kaji nan sadang disampaikan dek buya tu.
Mato kami tatuju indak ka buya, tapi ka arah balakang, ka baliak kain nan bajadikan pambateh antaro laki-laki jo padusi di musajik kami nan banamo "Baburrahmah" - artinya 'pintu rahmat' - di Desa Tiakar di Pikumbuah mudiak tu. Ado-ado sajo caro supayo dapek tagak sabanta untuak mancaliak ka balakang. Maambiak asbak nan talatak di ateh bandua jendela musajik (mandanga kaji tantu paliang lamak sambia maisok), mampaelokkan lapiah nan bageser, atau kalau ndak ado caro lain lai, tapaso bajalan ka balakang ka arah pintu kalua sambia icak-icak sasak buang aia ketek.
Baiak-lah, babaliak ka carito kito satantangan 'apo nan kurang' tadi tu.
Biasonyo, kalau karajo kito alah balain-lain, nan indak patuik sajo nan bakarajokan sadangkan nan patuik banyak nan indak bakarajokan, mangko tanggapan urang di lapau singkek sajo nyo. Maaf, dalam bahaso nan agak kasa sarato tadanga kurang bapendidikan (malu ambo sabananyo jo anak Unand), bunyinyo kiro-kiro;
"Waang ko, iyo ndak pitih nan kurang nampaknyo."
Mungkasuiknyo, jikok pitih nan kurang tantu masih dapek dicari, bakureh jo bakarajo, manggaleh atau ba-usaho.
Jadi nan mambuek seseorang mampabuek tindakan-tindakan nan indak patuik (silly) itu ukanlah disebabkan oleh karano kakurangan pitih. Melainkan ado nan lain, selain pitih, nan agak kurang.
Kalau dunsanak indak juo mangarati jo pernyataan nan disampaikan urang lapau di ateh tu, mangko biasonyo urang nan mangecek tu manambahkan kato-katonyo baliak.
"Jikok aka bana nan kurang, kabaa juo lai."
Jadi iyo itulah nan dimungkasuik. Ukan pitih nan kurang, melainkan aka (!).
Jikok pitih kurang dapek dicari, tapi aka bana nan kurang, kadipangakan.
Itulah nan sabananyo nan paliang tapek untuak malukiskan keadaan di nagari kito ko, nan alah dicurai papahkan dek dunsanak kito Sangkakala sacaro intelek, dalam bahaso nan mungkin dipakaikan anak-anak kuliah dalam skripsinyo.
Baitu sajo dari ambo Sangkakala. Jadi bangso kito indak kakurangan sumber-sumber kekayaan nampaknyo. Melainkan nan saketek tu nan agak kurang. Kabaa juo lai.
Tapi alhamdulillah, salamo ko duduak di lapau, dari pagi sampai patang, dari patang sampai pagi (di bulan puaso), lai alun ado nan mangecek sarupo itu bakeh Simon, atau bakeh ambo.
Mudah-mudahan babarakaik,
Wassalam, Wady (31 th.) Parung, Bogor 16330 [EMAIL PROTECTED]
Re: [Urangawak] Apa Yang Kurang Dari Bangsa Sebesar Indonesia?
At 05:15 PM 4/3/2005, Sangkakala wrote:
Apa yg kurang dari Bangsa sebesar Indonesia?
Dilihat dari segi jumlah penduduk adalah yg terbesar ke 4 di jagad jonggring saloka. Dilirikdari potensi alam , duh luar biasa berlimpah ruah� flora-fauna dikabarkan adalah yg no 2 tebesar di bumi, sumber daya mineral jangan ditanya, siap didaya gunakan, sebutlah besi, timah, nikel, batu bara, aspal, seng, tembaga, dan Minyak gas bumi ada tersedia. Potensi laut dgn luas yg dari samudera hindia hingga pasifik menjanjikan sekali.
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
