Assalamu'alaykum Wr.Wb.
"Z Chaniago" sarato sidang RN
dek lah tibo ulak jo alai kapado badan diri ambo nandatang dari "Z
Chaniago" satatangan pangangkatan datuak nan kapatang, mako karano
bapakai manuruk adat, manjadi undang di nantuo, kok kato ka iyo
babari jawek, kok gayuang biaso basambuk,Insyaallah lai kaambo cubo
manjawekno "Z Chaniago".
kok jawek nan datang dari ambo, ujuk sabanano datang dari Sipangka,
aratino bana, nan kabari kajawek diamboko, alah ambo mintakkan kapado
baliau nan diangkek jadi Datuak tu(Indra Catri Datuak Malako Nan
Putiah).
jawek nan ambo baok dari baliau adolah, bahwasono, pangangkatan
Panghulu nangko iyo alah basiapkan sajak dri tahun 1997, lah dibuek
paretongan mamak jo kamanakan, tapi alun dapek paham nan saukuan maso
nan tun, baitu pulo tahun 1999, baulang baliak babaua-baua ketek
mamak jo kamanakan, namun alun juo batamu bana nan sasuai, baru
kutiko tahun 2000 dalam baiyo-iyo mamak jo kamanakan didapekkan paham
nan saukua, batamu bana nan sasuai, jatuah kato kabulatan, kok
bulekno lah buliah digolongkan, kok picakno lah buliah dilayangkan,
aratino bana LAH TIBO GOLEK DI NAN DATA, nan gala Datuak (Panghulu)
Malako Nan Putiah iyo ka balakekkan kapado Indra Catri, karano lah
tibo golek dinan data, mako diinang dikalaka, dicari hari nan elok
ditakuak maso kutiko nan baiak, iyo batamulah hari nan kapatang
nantun, maklumlah nan baliau ko sadang bakarajo dan baniaik pulo nak
ka manunaikan rukun Islam nan kalimo (naiak haji) talabiah dahulu.
Diulua namuahno pnjang, kok dipunta nakno singek, singgkek saginggo
saparalu, satantangan pangangkatan Indra Catri sebagai Panghulu
dengan gala Datua Malako Nan Putiah ko, rasono iyo alah diangan jo di
niaikkan sabalunno, lah pulo direncanakan samatang-matangno.
Sabagai gambaran dapek pulo ambo sampaikan, bahwasono, pangangkatan
baliau sabagai Datuak kapatang ko iyo jo jalan "Hiduk Bakarilahan"
aratino bana, gala Datuak Malako Nan Putiah nan baliau sandang iyo
sadang dipakai dek Mamak baliau, nan kini baimbaukan sabagai Inyiak
Malako Nan Putiah, jadi bukanno "Mangambangkan nan talipek"
atau "manurunkan nan tagantuang" atau caro lainno. dan nan tampak
diambo,salamo alek diadokan, iyo Inyiak Malako Nan Putiah ko lah nan
manyiapkan (marancanakan) sagalo sasuatunyo.
Wakatu Inyiak Malako Nan Putiah ko manarimo Gala Datuak dari Datuak
baliau sabalunno, iyo jo caro sarupo iko pulo, yaitu "Hiduk
Bakarillahan". Wakatu itu sempat ambo mangecek (dan sempat pulo
siarkan dalam acara langsuang di salah satu radio di Jabodetabek ko =
tanggal 2/4 malam) jo Inyiak Malako Nan Putiah tu, apokoh dasar
pamikiran baa mangko caro "hiduk bakarillahan" ko nan bapakai ?
baliau manjawek, : baliau indak ingin anak kamanakan pasukuan Malayu
indak punyo Pimpinan walaupun hanyo sakutiko, harus tatap ado nan
maurus harato pusako, anak kamanakan , jadi, sabalun bukik lah taraso
tinggi nak didaki, sabalun lurah lah taraso dalam nak dituruni, elok
disarahkan tunggkek kapado nan mudo.(Mungkin iko kacontoh nan baiak
bagi awak basamo)
"Z Chaniago" ! bak kato ambo cako juo, sabanano ambo lah ka manjawek
sajak cako pagi (kamih tanggal 7) tapi supayo rantak nak
sadaram,lenggang nak sa pai, ambo japuikkan ka Baliau Indra Catri
Datuak Malako Nan Putiah kajawekno, sakalian pulo ambo mintakkan
babarapo tulisan di Surek kaba nan tabik di kampuang, baiak sabalun
maupun sasudah alek batagak gala diadokan, Alhmdulillah, kalau
tulisan nan ambo mukasukkan tu lai tamuek di Harian Singgalang
Tanggal Singgalang tanggal 28 dan 29 Maret 2005 jo di Padang Ekspress
tanggal 4 April, tantuno iko nan manjadi dasar kajawek dari ambo.
Kok buliah pintak jo pinto, sakiro lai indak baa, lai buliah jo dapek
koh nan jawek ambo kini ko sakalian jo manarangkan sinyalemen /
gejala nan sarupo dikatokan dek Mamak A.S Datuak Parpatiah.
Sakiro itu nan dapek ambo barikan, kok kurang ka manukuak, senteng ka
mambilai, iyo bamintakkan juo ka nan basamo.
Wassalamu'alaykum Wr.Wb.
Bandaro Labiah
*lah lamo dirantau, lah larek pulo dirantau
--- In [EMAIL PROTECTED], "Z Chaniago" <[EMAIL PROTECTED]>
wrote:
> Batanyo ciek lai buliah kan mak....., apokoh maangkek datuak iko
lah
> direncanakan sabalunnyo .....atau dek karano ka ikuik Pilkadal ?
>
> Kok maangkek cuma dalam rangka pra pilkadal... itu masuak ka
istilah dari
> Mak Bandaro dulu.... "P" adat hehehehe....
>
>
> Wassalam
>
>
> Z Chaniago - Palai Rinuak - http://www.maninjau.com
>
======================================================================
> Alam Takambang Jadi Guru
>
======================================================================
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
