Assalamu'alaikum wr.wb., Pakaro kuduang tangan nyiak, bis adi baco surek Al Maidah ayat 38 nan aratino, "Laki-laki yang mencuri dan perempuan yang mencuri potonglah kedua tangannya sebagai pembalasan bagi apa yang mereka kerjakan dan sebagai siksaan dari Allah. Dan Allah Maha Perkasa lagi Maha Bijaksana."
Iko ado carito lamo nan panah juo ambo lapeh di Palantako alah lambek sangaik nyiak. Mudah-mudahan bamanfaat. Wassalamu'alaikum wr.wb., Pangajian di musajik Gurun (1) Di musajik Gurun ado wirid bulanan sasudah sumbayang isya di patang Satu. Ado buya Abidin dari Bukiktinggi nan bacaramah, buya nan saba sarato santun. Alah babilang taun baliau maisi pangajian di musajik Gurun, sajak nan mandanga-an kaji baru babarapo incek, sajak nan lain masih banyak nan pancumees sajo, sajak masih banyak nan indak ciek nan ka-elok di mareka pangajian buya tu doh. Tapi di sinanlah latak kasabaran buya ko. Bialah kok alun banyak bana urang, bialah kok ka abih mancimeeh bana urang, bialah kok kabarambun malam bana baliau, bialah baliau nan mangaluaan ongkoih untuak datang sabab maagiah pangajian ko iyo indak ado honorno doh. Allah Taala kayo sungguah, dek usaho nan eloktu, baransua-ransua batambah juo urang kampuang nan amuah mandanga kaji. Kaji baliau iyo indak sarik-sarik bana doh, buliah di kecekan di sinan ka di sinan juo, pakaro masalah tauhid, masalah ka Esaan Allah, masalah dima duduak umaik manusia di hadapan Allah salamo hiduik di ateh dunia ko. Itulah labiah kurang intino tapi baliau pandai sangaik manjalehan kaji sainggo taraso baru sajo satiok nan baliau sampaian. Patang Satu kapatangko tajadi diskusi panjang. Banyak jamaah pangajian nan batanyo pakaro barang nan banyak disabuik urang kudian-kudianko. Pakaro 'manjalankan syariat Islam di Minangkabau'. Batanyolah Malin Ameh nan duduak tapek maadok ka Buya di ateh podium. "Jadi nan di mukasuik jo manjalankan syariat Islamko indak musti bana urang takuik ka dirajam, kadikarek tangan. Tapi buya pulo nan mangecekan nan bahaso hukum sarupo itu tasurek di al Quran. Baa nan sabanano goh buya?" tanyo Malin Ameh. "Sarupo iko Malin. Malin alah pai mangaji, alah mandanga kaji. Lah tau di hukum, alah tau diparaturan Tuhan Allah, alah tau nan maa nan parintah Tuhan Allah, nan maa nan dilarang Tuhan Allah. Kiro-kiro apo nan ka Malin karajoan lai dalam manjalani hiduik ko?" "Tantu patuah awak lai, nan di suruah dikarajoan, nan dilarang diantian, dijauahi, kan baitu buya?" "Batua sangaik. Nan maa nan parintah dikarajoan, nan maa nan dilarang dijauahi. Sumbayang diparintah Allah?" " Parintah Allah" "Jadi baa? Tantu dikarajoan?" "Dikarajoan" "Puaso?" "Parintah Allah. Dikarajoan" "Bazina dilarang Allah?" "Iyo" "Jadi?" "Dijauahi. Indak buliah dikarajoan" "Manciluik dilarang Allah?" "Iyo" "Tantu.." "Tantu dijauhi. Indak buliah dikarajoan" "Baduto? Baampok? Baa kiro-kiro?" "Dilarang Tuhan Allah. Jadi di jauahi." "A kalau lah baitu dima juo Malin kakanai rajam, kakanai pontong tangan? Malin indak bazina. Indak manciluik. Kan baitu?" "Jadihlah buya, awak nan alah mangaji alah tau awak. Baa kalau di kanti nan alun mangaji. Nan alun mandanga nan maa nan di parintah Tuhan Allah nan maa nan ditagah Tuhan Allah tadi tu, langsuang kanai hukumno kalau no manciluik, kalau no bazina?" "Kalau iyo bana alun tau, bukan icak-icak indak tau, alun balaku hukum cako. Manjadi tangguang jawab awak nan basamo untuak maagiah tau ka urang nan sarupo itu. Dibaono mangaji, ditarangan kabakehno bahaso iko parintah Tuhan Allah. Iko larangan Tuhan Allah. Iko sangsi kalau parintah indak dijalanan, iko pulo sangsi kalau larangan di karajoan juo. Di jaman nabi pun baitu. Indak baitu agamo Islam ado langsuang main hukum rajam, main potong tangan sajo. Nabi maajakan dulu agamoko sajaleh-jalehno ka umaik. Dijalehkan dimaa tagak awak di hadapan Allah. Baransua-ransua dakwah baliau, dijalehkan nan maa nan haq, nan musti ditagakkan nan haq itu. Nan maa nan bathil, nan musti di tinggaan nan bathil itu. Sasudah itu biko baru tagak hukum. Lai jaleh di Malin nan bahaso malakekan hukum rajam tu indak buliah sumbarangan. Musti ado saksi nan manampak urang bazinatu ampek urang, sabana-bana manampak. Kalau kurang dari ampek urang indak buliah. Dan saksi nan sabana-bana manampak, jo mato kapalono masiang-masiang, bukan dek dikecekan si anu jo si anu. Kan sarik rasono kaji kaado urang nan sabana-bana manampak sakali barampek tu. Mako di jaman nabi nan tajadi indak urang manangkok urang bazina sudah itu langsuang dihukum rajam doh. Tapi urang nan bazina itu bana nan datang ka nabi mintak dijatuhkan hukum sacaro nan di parintahkan Allah. Surang padusi nan talanjur bazina. Mintak dirajam awakno. Kecek awak kini 'urang gilo agakno mah, kaamuahno mintak di rajam sarupo itu'. Indak urang gilo bagai doh. Urang siaik, urang baraka dan nan talabiah-labiah urang nan sangaik bariman. Dan nabi saolah-olah maagiah kasampatan pulo kaano untuak mungkia. 'Mungkin angkau dikacano sajo dek urang laki-laki tu'. "Indak ya Rasulullah, ambo bazina." 'Mungkin angkau di ciumno sajo.' "Indak ya Rasulullah, ambo bazina dan kini ambo sadang manganduang." Kecek nabi pulo 'Jadilah kalau baitu. Kalau iyo angkau sadang manganduang paliarolah dulu kanduangan angkau sampai anak tu laia.' Alah laia anak tu, datang pulo no baliak ka nabi mamintak dijatuahkan hukum Allah. Kecek nabi gadangan dulu anak nan baru laia tu sampai baranti manyusu sampai baumua duo taun. Duo taun pulo kudian datang pulono baliak mintak dijatuahkan hukum Allah. Kan iyo istimewa urang padusi nan sarupo iko. A kiro-kiro nan mambaono datang barulang ka nabi mintak di hukum sarupo itu? Iman kapado Allah. Iman kapado hukum-hukum Allah. Jadi sarupo itu carono. Baitu pulo urang nan manciluik nan ka dikarek tanganno. Dijaman nabi sasudah ayat nan mangecekan hukum sarupo itu diparintahkan Allah, indak ado urang nan talok manciluik. Jadi indak ado urang nan sampai dikarek tangan doh. Kok manciluik juo tantu iyo kanai. Dan kanaiko pun indak buliah piliah-piliah kasiah. Kalau anak rajo nan manciluik indak baa, tapi kalau rakyaik badarai nan manciluik baru di hukum, bukan baitu. Bahkan kecek nabi, saandaino Fathimah anak ambo tu manciluik, ambo karek tanganno. Iko bukan sakadar paganta, bukan sakadar kecek, bukan sakadar palamak-lamakan ota baliau sajo. Sarupo itu hukum dihadokan Allah. Indak ado istilah kebal hukum doh. Baa kiro-kiro, lai jaleh di apak-apak jo di amai-amai tu?" "Ambo kabatanyo pulo ciek buya. Urang mangecekan nan bahaso kalau dijalankan syariat Islam ko barati satiok umat Islam nan indak manjalankan syariat kanai sangsi, kanai hukum. Kok ado urang indak sumbayang kanai hukum. Kok ado urang indak puaso kanai hukum. Baa pulo curitono manganai-an hukum ka urang nan indak sumbayang atau indak puaso tu buya. Apo lai tasurek pulo di al Quran parentah mahukum urang nan indak sumbayang?" giliran mak Marah pulo nan batanyo. "Parintah di dalam al Quran manyuruah managakkan sumbayang. Wajib mangarajoan sumbayangtu di wakatu-wakatu nan alah ditatapkan Allah. Itulah nan awak karajoan limo kali sahari samalam. Baitu pulo puaso di bulan Ramadhan. Allah mawajibkan awak untuak manjalankan. Parentah manganaikan hukum ka urang nan indak manjalankan indak ado di dalam al Quran. Di jaman nabi, urang kalau alah mandanga parintah tu 'sami'na wa atha'na' - lah jaleh dikami atau alah kami danga-an dan kami patuah. Jadi indak basuo doh lai urang indak sumbayang. Sabab urang alah mangarati bana nan bahaso sumbayang tu tiang agamo, bak kecek nabi, barati urang nan indak managakan sumbayang samo jo maruntuahkan agamo. Indak ado urang nan amuah dikecekan paruntuah agamo doh. Nan dikarajoan urang sacaro patuah tu bukan sajo mangarajoan sumbayang tapi bahkan mangarajoan sumbayang bajamaah ka musajik. Sabab nabi maagiah contoh sarupo itu, maajakan sarupo itu, manjalehkan untuangno di sisi Allah kalau mangarajoan sumbayang bajamaah atau rugino kalau indak datang bajamaah. Bahkan baliau agiah ancaman walau hanyo sakadar ancaman sajo kapado urang nan indak datang bajamaah ka musajik. Cukuik jo sakadar ancaman tu indak ado urang nan talok indak datang. Dan urang indak datangko bukan karano takuik tapi karano alah faham bana jo agamoko. Mareka mancari ridha Allah. Kalau alah mangarati bana tantang mancari ridha Allahko indak ado nan barek lai doh. Kadatang kamusajik subuah-subuah di musim dingin indak barek. Ka puaso di ari nan panjang di musim paneh indak barek. Dan urang saliang kana manganaan dalam babuek baiak. Indak sampai bagai urang paralu kanai hukum dek indak sumbayang doh sabab indak ado urang nan barani maninggaan sumbayang. Baitu pulo jo puaso. Jadi intino baa carono supayo urang banyak, awak nan banyak ko mangarati bana jo arati managakkan sumbayangtu. Kalau awak alah mangarati bana rasono indak kamungkin awak barani maninggaan sumbayang atau puaso tu doh. Kalau ado urang nan alun tau atau alun mangarati, kawajiban awak mangana-an. Ma-ajak supayo urangtu amuah sumbayang. Kalau iko alah tagak di tangah kampuang, urang banyak alah manjalankan parintah agamo sacaro sadar jo ikhlas karano Allah, lalu ado juo urang nan mambangkang sarato malecehkan arati sumbayang sasudah diagiah dakwah, sasudah ditunjuk diajari buliah urang itu di agiah sangsi dek urang kampuang. Mungkin di kucilkan, indak dipadulikan, indak diparetongkan lai sabagai warga. Dan kalau karano itu ano mangacau, mabuek cabuah tantu bisa di hukum pulo dek karano mambuek cabuahno tu. Baitulah kiro-kiro" "Jadi indak ado nan paralu ditakuikan doh jo 'kawajiban manjalankan syariat Islam' tu buya?" tanyo Malin Deman pulo. "Dima juo lai takuik tu ka disangkuikan. Kalau awak alah patuah, alah baniaik elok nak manjalankan agamo Allah, kasia juo awak ka takuik lai. Takuik tu cukuiklah kapado Tuhan Allah sajo lain dari itu indak paralu takuik. Alah laruik amek ari mah. Kito cukuikan sampai disiko sin lah dulu kaji awakko. Insya Allah kalau panjang umua kito sambuang pulo." _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
