Assalamualaikum WW, Dunsanak sapalanta, Taun 90 an saisuak waktu masih bakarajo jo urang asiang, di kantua kami tu ado babantuak BDI, (Badan Dakwah Islam) dan ampia satiok kantua atau gedung di Jakarta ko punyo badan nan samo. BDI ko rato2 berhasil mamintak tampaik nan cukuik representativ untuak maadokan kegiatan keagamaan Islam, paliang indak untuak sumbayang Jumaik. Salah satu kegiatan rutin di gedung kami tu (Landmark) di bulan puaso adolah sholat zuhur berjamaah dan di lanjuik kan jo ceramah Ramadhan. Guru no ba tuka tiok ari. Pernah ambo batanyo kasalah surang guru ko nan cukuik di sukoi urang, apo kiat no dalam maagiah ceramah supayo umaik nan mandanga ko serius dan antusias. Jawek no, sasudah ambo manarimo undangan untuak ceramah ambo harus dapek informasi sabanyak mungkin tantang calon audiens ambo. Tarutamo tingkat pendidikan, pamahaman agamo, lingkungan karajo dan nan lain2. Itu guno no untuak mampamudah ambo mancari bahan nan sasuai jo mareka2 tu., caro masuak no labiah mudah. Untuak iko cek no indak bisa main antam karomo sajo, indak sampai pangajian awak beko. Sabaok kalau pangajian nan di baok kan balawanan jo situasi audiens awak pasti resistensi no gadang. Kalaupun ado nan jaleh salah nampak di mato, harus bajaleh kan apo nan salah tu jo bahaso nan sederhana nan bisa di mangarati urang banyak dan harus ado jalan kalua nan di agiah kan. Jan sampai manyalah kan sajo tanpa ado jalan kalua, itu indak kasampai juo kaji tu doh cek liau. Ta pikia dek ambo jadi pancaramah agamo ko memang indak gampang.
Wassalam Tan Ameh _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
