Assalamu'alaikum wr.wb.,
Ambo antaan pulo kaji buya Abidin nan nomor salapan. PANGAJIAN DI MUSAJIK GURUN (8) 'Dalam hiduik di dunia ko awak musti manjago kasaimbangan,' kecek buya Abidin. 'Kasaimbangan antaro urusan dunia awak jo parsiapan akhiraik awak. Iko parintah Allah. Mako badoapun diajakan dek Tuhan Allah. Mintaklah kabaikan untuak di duniako, mintak pulo kabaikan untuak di akhiraik, 'rabbanaa aatina fiddunya hasanatun - wa fil aakhirati hasanatun'. Wahai Tuhan kami anugrahilah kami jo kahiduik-an dunia nan elok, sarato hari akhiraik nan elok. Kan baitu doa awak. Untuak mandapek-an dunia nan elok paralu usaho. Paralu bakureh tanago. Kok ka manggaleh awak. Kok ka batani awak. Kok ka mancari ikan di lauik awak. Karajoanlah! Kok ka jadi pagawai awak, karajoanlah! Tapi tatap ado rambu-rambu. Tatap ado paraturan Tuhan Allah nan paralu diparatian. Ka manggaleh awak, mako manggalehlah jo amanah. Jaan mangurangi cupak jo timbangan. Jaan baduto jo mangicuah. Barang lancuang jaan dikecek-an barang elok. Bajaleh-jaleh dalam bajua balitu. Baitu pulo kok ka batani. Jaleh-jalehan tumpak jo bateh tanah awak nan ka dipangkua. Jaan indak bapimatang sin sawah, dipangkua-i sajo tanah urang. Alah tumbuah tanaman awak, kirono indak sarancak tanaman urang, dikelok-an sin tangan ka tanaman urang, punyo urang nan diambiak di awak. Jaan dikarajoan nan sarupo itu. Baitu juo kok ka mancari ikan ka lauik basa. Ado taratikno. Ado caro-carono. Jaan marusak. Jaan jo tangguak rapek di tangkok ikantu sainggo tabao sampai ka anak-anakno. Biko abihno indak ado nan kadiambiak lai sasudah itu. Ijaan dirusak lauik jo racun, jo bom nan kamarusak ka kahidupan dalam lauiktu. Hiduik di ateh duniako iyo basamo-samo. Bamacam-macam bangso. Bamacam-macam warno kulik. Bamacam-macam bahaso. Bagaualah kalian jo elok-elok satu jo nan lain. Barinteraksilah kalian satu samo lain, baitu kecek urang kini. Allah bafirman di dalam surek al Hujuraat ayat ka 13 sarupo iko aratino, "Wahai manusia. Sasungguahno Kami nan manjadian kalian dari (asano) surang laki-laki jo surang padusi. Dan Kami jadian kalian ba bangso-bangso, ba suku-suku supayo kalian jadi bakatahuan. (Namun) sasungguahno urang nan paliang mulia di sisi Allah adolah urang nan paliang taqwa. Sasungguahno Allah Maha Mangatahui, Maha Manganali." Aa aratino go iko? Allah nan manjadian awak saganok manusia nan hiduik di muko bumiko. Kasado-sadoanno. Tuhan Allah manjadian awakko sabagai katurunan dari inyiak muyang awak, nan dulu bana adolah surang laki-laki jo surang padusi. Itulah nabi Allah Adam jo Siti Hawa. Katurunan nabi Adam ko nan kini manjadi urang bakulik putiah di Eropah, urang bakulik hitam di Afrika. Jadi awakko samo. Baiak nan putiah kulikno, baiak nan itam, baiak nan kuniang langsek sarupo awak-awakko. Baiak nan karitiang abuakno, baiak nan sarupo upiah jaguang abuakno baiak nan sarupo ijuak abuakno. Samo kasadoanno. Allah nan manjadian. Allah nan manciptakan. Aratino pulo indak ado labiahno nan surang daripado nan lain, nan sakalompok pado kalompok nan lain. Indak labiah elok bagai nan bakulik putiah dibandiangan jo nan bakulik hitam doh. Jadi aratino pulo indak paralu pulo awak maraso randah katiko bagaua jo sasamo umaik manusia ko doh, siapun juo awakno. Baurusanlah kalian, bajua balilah kalian, bakarajo samolah kalian untuak kamashlahatan dunia kalian jo manusia nan banyaktu. Tapi sakali lai tantu tatap ado paraturan-paraturan nan musti kalian paratian. Jadi buliah awak bajua bali jo Cino nan indak baugamo Islam? He..he..he.. buliah. Indak ado laranganno doh. Nabi SAW bajua bali jo urang Yahudi. Ba pagang-gadai jo urang Yahudi. Sampai panah tagadai baju zirah baliau ka urang Yahudi. Baru ado laranganno kalau nan dipajuabalian tu barang nan haram. Kok sato pulo awak mambali arak di kadai Cino tu, baru indak buliah. Tapi kok ka mambali pinjaik awak disinan, buliah. Indak ado larangan no doh. Bakarajo samolah untuak urusan dunia awak basamo pulo. Sarupo ka mambuek jalan nan kadipakai basamo. Ka mambuek jambatan nan kadipakai basamo. Karajoanlah. Didalam bakarajo samoko tantu babedo-bedo kaahlian masiang-masiang. Ado nan santiang jadi tukang batu, ado nan ahli tukang kayu, adu nan pandai manembok. Nan ciek pasti ka mamaraluan nan lain. Nan sarupo iko alah manjadi katatapan Allah pulo. Kan indak kamungkin kasadoan karajotu dikakok dek surang urang sajo doh. Ka tumbuak tanak surang sajo. Awakno surang nan pai mancari jo manabang kayu ka rimbo. Awakno juo ka mancari pasia pasang ka pantai. Dima ka talok dino. Jadi intino, untuak kaparaluan hiduik dunia kalian, iyo buliah kalian bakongsi-kongsi di ateh duniako. Tapi... untuak urusan akhiraik kalian? Dimato Tuhan Allah urang nan paliang elok diantaro kalian adolah nan paliang mandakek-an dirino kapado Allah. Urang nan paliang taqwa. Nan paliang patuah kapado parintah-parintah Tuhan Allah untuak mangarajoan nan diparintahan tu. Untuak manjauahkan diri dari larangan-larangan Allah. Sia nan ka mungkin manjadi urang-urang nan bataqwa ko? Adolah urang-urang nan mamaliaro iman kapado Allah, bariman kapado hari akhiraik. Tibo disiko jadi basisiah atah jo bareh. Iyo indak samo sin awak jadino lai doh. Ado nan bariman ado nan indak bariman. Ado nan Islam ado nan indak Islam. Di antaro nan Islam pun ado nan sabana Islam, ado nan saroman urang Islam tapi nan sabanano indak Islam. Dan Tuhan Allah Maha Tahu jo diri awak masiang-masiangko. Jaleh bana dek Tuhan Allah, manganali bana Tuhan Allah ka masiang-masiang awakko. Tahu Tuhan Allah apo nan tagarak di hati awak masiang-masiang, indak ado nan rahasio saketek juo di Tuhan Allah doh. Sudah itu awak dikanaan untuak mampasiapkan akhiraik masiang-masiang awak. Ado urusan gadang nan ka dihadang biko di sinan. Di sinan itu biko indak ado lai jua bali, indak ado tolong manolong. Firman Allah di dalam surek Al Hasyr, surek nan ka 59 ayat 18 nan aratino. 'Wahai urang-urang nan bariman. Bataqwalah kalian kapado Allah. Handaklah satiok diri mamparatian apo sajo nan alah dikarajokanno untuak baka di hari akhiraik... (sampai akhir ayat).' Diingek-an Tuhan Allah kapado kito urang-urang nan bariman untuak bataqwa kapado Allah. Sudah itu untuak maetong-etong aa sajo baka nan alah dipasiapkan untuak ka dibao pulang maadok-i pangadilan Allah. Apo sajo baka nan kadibao. Laikoh awak babaka amal-amal shaliah? Laikoh awak mamaliaro diri dari doso nan kamanyababkan awak tarancam jo azab Tuhan Allah biko di sinan? Sabab di sinan biko awak ka mampatangguangjawabkan hasia awak masiang-masiang. Di sinan biko awak sabana ka banafsi-nafsi, indak mungkin katolong manolong lai doh. Paralu dikarajoan amalan-amalan nan diridhai Tuhan Allah tarago awak iduik kiniko, itulah nan kajadi baka untuak awak. Amalan-amalan nan diridhai Allah, nan jaleh urusanno disisi Allah. Bukan amalan-amalan nan dibuek-buek di awak surang. Nan indak ado tuntunanno, walaupun nampak sarupo amalan-amalan juo. Ka panutuik kaji, awak ulang baliak, paralu bana dijago kasaimbangan dalam urusan dunia jo akhiraik dek tiok-tiok awak. Sakitu pulo dulu, sabalun awak sambuang jo tanyo jawab,' kecek buya Abidin. Jamaah nan mandanga maangguak-angguak faham. Taraso bana agakno isi pangajian buya ko. Mak Marah nan muloi batanyo sakali ko. 'Bialah ambo mamuloi batanyo buya,' jano baliau. 'Muloilah Marah!' jawek buya Abidin. 'Bajua bali jo urang nan bukan Islam, asa indak mampajuabalikan barang nan haram, kecek buya cako indak baa doh. Tapi di kadaian urang Cino tu ado barang-barang nan indak hala atau nan haram. Indak bapangaruah no ka awak bajuoa bali disinan du buya? Walaupun nan dibali diawak nan hala sajo? Itu sin di ambo no buya,' kecek mak Marah. 'Salamo awak tau nan bahaso barang nan ka dibalitu indak mungkin tacampua jo nan haram insya Allah indak ka bapangaruah doh. Umpamono barang pacah balah, atau barang kalontoang, atau barang matah samisal bareh, tapuang, gulo, garam nan indak ka mungkin bacampua jo nan haram doh. Buliah sajo awak mambali disinan. Tapi kalau alah ado kamungkinan nan bahaso barangtu bacampua jo nan indak hala, indak buliah awak bali. Pai awak ka kadai nasi urang Cino, dipasan nasi goreng. Kirono ka pambuek nasi gorengko dicampuano jo minyak babi. Indak buliah awak makan,' jawab buya Abidin. 'Walaupun barang cako talatak badakek-dakek-an buya? Sarupo misalno tapuang atau bareh talatak dakek boto arak. Indak baa nan sarupo itu dibali?' 'Indak baa. Kan jaleh-jaleh nan dibali di awak tapuang no, bukan arak. Awakno manggaleh arak itu bagai di kadaino dek ado pulo urang nan ka mambali. Itu mako ditaruahno disinan. Tapi tantu bukan awak nan ka mambali araktu. Sakadar bagaua awak, sakadar bajua bali barang-barang nan hala awak jo sasamo manusia ko buliah. Itu nan dimukasuik surek Al Hujuraat ayat 13 nan awak baco cakotu. Jadi jaan pulo dipasulik-sulik. Lah badatak sin ati awak kalau mambali pinjaik di kadai Cino padohal Cinoko cako sudah makan babi, raso indak ka hala sin pinjaik nan dibalitu. Aa itu bakalabiah-kalabiahan awak namono du. Indak buliah pulo nan sarupo itu. Tapi alah awak baco cako. 'Lita'aarafuu', kecek Tuhan Allah. Supayo kalian bagaua satu samo lain, supayo kalian saliang bakatauan. Bakatauan ko tantu ka bainteraksi sasudah itu, ka paralu mamaraluan juo untuak urusan dunia sasudah itu. Jadi buliah awak kok ka bajua bali bagai karano itu tamasuak dari bagian pargaulan kahidupan awak cakotu. Baitu Marah!' kecek buya Abidin pulo. 'Ambo pulo batanyo lai buya,' kecek Sutan Bagindo. 'Baa pulo hukumno awak bakarajo samo atau makan gaji jo urang kapia, buya,' jano. 'Ambek dulu. Bakarajo samo jo urang kapiako untuak urusan apo? Kalau untuak urusan nan kamarusak, tamasuak nan kamarusak aqidah awak, indak buliah. Bakarajo samo mambuek barang nan indak hala, jaleh baraso itu indak hala, indak buliah. Jadi kalau awak ka bakarajo di pabirik tuak, itu indak buliah. Ka bakarajo awak di kandang pataranak-an babi indak buliah. Atau di rumah potong babi, indak buliah. Tapi kalau awak bakarajo jo urang kapia mambuek jambatan sarupo nan awak kaji cako, atau mambuek labuah gadang. Indak ado salahno. Indak ado laranganno. Baa pulo kalau bakarajo jo urang kapia nan mambuek sinjato, nan mambuek kapatabang, nan mambuek bom? Aa iko paralu dicaliak-caliak bana. Kalau sinjato nan dibuek itu jaleh pulo kadipagunoan untuak maancuakan umaik Islam, alah ado pasananno sarupo itu, jadi indak buliah. Tapi kalau sinjato itu jadi barang dagangan umum sajo, nan sia sajo buliah mambali, nan sia sajo bisa mamanfaaikkanno, tamasuak urang Islam, mako bakarajo disinan buliah-buliah sajo. Indak ado laranganno doh.' 'Baa pulo kalau awak bakarajo jo parusahaan Amerika buya?' tanyo si Barain, anak mudo nan baru pulang dari Batawi. 'He..he.. Sarupo juo jo nan sabalun ko. Aa nan diusaoan dek parusahaan Amerika tu? Kalau parusahaan itu pabirik oto, dimaa pulo indak ka buliah. Indak ado pulo dalilno nan mangecek-an indak buliah tu. Oto tu kan barang nan ado manfaaik ka urang banyak. Bahaso sasudah itu biko ado pulo oto tu dipakai urang untuak kajahatan lain pulo urusanno. Tapi kalau bakarajo jo pabirik brendi, pabirik minuman kareh, itu iyo indak buliah. Sabab barang-barang itu barang haram namono manuruik agamo awak. Sainggo iko pulo lah dulu kaji awak. Disambuang pulo di lain ari insya Allah,' kecek buya Abidin. _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________