Assalamu'alaikum wr.wb., PANGAJIAN DI MUSAJIK GURUN (9)
'Alah awak kaji sabalunko bahaso awak musti saimbang dalam urusan dunia jo urusan akhiraik awak. Untuak urusan dunia babueklah jo caro nan katuju, jo kamampuan nan ado di awak masiang-masiang, tapi patuhi rambu-rambu nan alah ditantuan dek Tuhan Allah. Dan Tuhan Allah tatapkan paraturan-paraturan untuak jadi padoman di awak dalam manjalani kahidupan awak. Tuhan Allah nan manatapkan nan maa nan buliah nan maa nan indak buliah. Nan maa nan hala nan maa nan haram. Paraturan-paraturan nan ditatapkan Tuhan Allah itu baguno sajak dari untuak kabaiak-an awak hiduik di ateh dunia ko sampai ka parsiapan untuak hari akhiraik isuak. Sajak dari urusan sasamo manusia, hablumminannaas, sampai urusan jo Tuhan Allah, hablumminallaah. Ditatapkan Allah hukum, untuak awak patuhi. Untuak urusan dunia awak ditatapkan Tuhan Allah caro-caro baurusan sasamo manusia untuak awak patuhi. Baa carono bajua bali, bautang piutang, bakarik kirabaik. Baa carono manjago kasalamatan basamo, managak-an kaadilan, mamutuih-an pakaro kalau tajadi silang salisiah di dalam pargaulan awak. Baitu pulo paraturan-paraturan tantang caro-caro baibadah kapado Allah untuak kaparaluan akhiraik awak. Ado di antaro aturan-aturan tu basuo di dalam al Quran, nan sakali baco jaleh aratino tapi ado pulo nan paralu katarangan labiah rinci, nan disampaikan jo lisan nabi Muhammad SAW. Tuhan Allah bafirman di dalam surek Ali Imran ayat nan ka 102 nan aratino; 'Wahai urang-urang nan bariman, bataqwalah kalian nan sabana-bana taqwa. Jaan kalian (sampai) mati kacuali dalam kaadaan Islam (basarah diri). Ayat iko mambimbiang awak untuak mamaliaro langkah awak dalam kahidupan dunia, jo caro salalu mangana paraturan-paraturan Allah. Jo caro sarupo itulah awak mungkin manjadi urang nan bataqwa. Tumbuahan raso takuik taradok hukuman Allah, baiak hukuman nan mungkin ditarimo di ateh dunia sakatiko awak masih hiduikko, ataupun hukuman nan ka ditimpokan isuak di akhiraik. Tumbuahan raso harok kapado karidhaan Allah. Jo aa? Tantu sakali lai jo caro mamatuhi nan diparintahkan, sarato mainda-an nan larangan-larangan Tuhan Allah. Dan iko musti dipaliaro taruih manaruih. Taqwa tu musti dijago salamo awak hiduik. Jaan sampai awak di ujuang iduik biko lapeh dari nilai-nilai taqwa, mati indak dalam kaadaan basarah diri kapado Allah. Indak dalam kaadaan Islam. Kalau sampai awak mati indak dalam kaadaan Islam, akibaikno awak ka mandapek hukuman Tuhan Allah nanti di akhiraik. Baa pulo nan dimukasuik jo mati dalam Islam tu? Apo cukuik jo tasurek di KTP awak sajo? Atau jo karano urang gaek awak baugamo Islam sainggo awakpun alah tadaftar Islam sajo? Tantu bukan sarupo itu. Firman Allah pulo di dalam surek al Baqarah ayat 208, nan aratino ; Wahai urang-urang nan bariman. Masuaklah kalian kadalam Islam ko sacaro manyaluruah. Jaan dituruik-an langkah-langkah setan. Sabab setan itu adolah musuah nan sabana musuah dek kalian.' Diparintahan ka awak untuak masuak ka dalam Islam ko sacaro manyaluruah, sacaro bulek, sacaro utuah. Sacaro kaffah, dalam bahaso al Quranno. Ba iyobana-iyobana dalam baugamo Islam tu. Jaan dipiliah-piliah paraturanno jo nan sasuai di awak sajo. Diambiak hukum-hukumno nan ka lamak di awak sajo. Jaan dituruik-an langkah-langkah setan. Setan ka manipu ka mandayo awak indak baranti-baranti. Awak ka digiriangno supayo mandurako taradok katatapan-katatapan Tuhan Allah. Jadi jaan diiriang-anno. Kecek Tuhan Allah jaan dimakan arato urang jo caro nan bathil. Kecek setan, saketek indak baa doh, cubolah, lamak. Indak ka baa bagai doh. Kecek Tuhan Allah jaan di makan riba. Kecek setan, 'hari gini nggak punya rumah?' di maa pulo ka dapek rumah kalau indak jo bautang babungo. Laluan sin lah indak baa bagai doh. Kecek Tuhan Allah tagak-an shalat, bayiakan zakat, Kecek setan, pai shalat lo dulu, biko lapeh kontrak nan saarago tujuah milyar ko. Biko bagailah sumbayang tu. Zakat tu nanti sin di bayia, awak lah mambayia pajak bagai, tu ka dibayia lo zakat, maa nan ka tingga untuak awak lai? Kecek Tuhan Allah kalau mambagi warisan, agiah-an duo bagian ka anak laki-laki, ciek bagian ka anak padusi. Kecek setan, alaaaa... kan jaleh-jaleh indak adia namono du sarupo itu. Awak kan samo-samo anak. Indak anak kanduang, anak tirih bagai do. Bagi samo gadang malah, baru adia. Sarupo itu taruih. Aa sajo katatapan Allah, mako setan ka manukai jo nan lain. Setan kamambisiak-an ka talingo awak supayo mambangkang, supayo malawan parintah Allah tu. Setan tau bana di sia awak masiang-masiangko. Setan punyo jurus-jurus nan ka dipakaino untuak malaluan kajino ka masiang-masiang awak. Manipu urang nan indak ba ilimu sarupo iko carono. Manipu urang nan lai agak ba pangatahuan sarupo iko carono. Itu mangko di kanaan bana dek Tuhan Allah, jaan dituruik-an langkah-langkah setan tu. Ta aniayo biko. Manyasa biko. Aa sainggo iko sin lah dulu. Ambo dibisiak-i Malin Ameh cako. Banyak nan kaditanyoan jano. Aa laluanlah tanyo tu kini,' kecek buya Abidin. 'Ambo banalah sakali batanyo buya,' kecek Malin Ameh. 'Panah pulo ambo danga kaji dulu, urang nan di akhia hiduikno talakik dino mambaco 'laa ilaha illallah,' pasti masuak sarugo. Baa kaduduak-no jo ama ibadah awak saari-ari lai du buya? Kok ado urang nan indak samparono mangarajoan agamo Islam ko, tapi di kasudahan iduikno, sabalun mati talakik dino manyabuik kalimaik nan itu, Masuak sarugo sin no langsuang? Kan jadi maleh biko urang, manga bana panek-panek baibadaik, lah ka mati sin biko baco 'laa ilaha illallah'. Baa kataranganno du buya?' 'Banyak hadits Rasulullah SAW nan mangecek-an sarupo itu. 'Siapo sajo nan mati dalam kaadaan awakno yakin bahaso indak ado tuhan salain Allah, mako awakno masuak sarugo.' Pado hadits nan lain baliau basabda, 'Siapo sajo nan mangecek-an indak ado tuhan salain Allah, dan awakno maingkari satiok sasambahan salain Allah, mako urang sarupo itu haram arato jo darahno, sadangkan paretongan taradok dirino tasarah kapado Allah.' Katiko paman baliau Abu Thalib alah sakratul maut, dibimbiang juo dek Rasulullah, diajak juo untuak mambaco 'laa ilaha illallah', namun Abu Thalib indak mambacono doh. Kecek baliau, sabuiklah paman, 'laa ilaha illallah', ambo ka manjadi saksi untuak paman isuak di hari kiamat kalau amuah paman mambacono. Namun Abu Thalib indak juo mambaco dek malu ka urang Quraisy. Malu ka Abu Lahab, ka Abu Jahal nan samo duduak manunggui. Jadi batua kalau awak diakhia hayat talakik mambaco pangakuan nan bahaso indak ado tuhan salain Allah, awak ka masuak ka sarugo insya Allah. Tapi apokoh masuak langsuang indak dihisab amalan awan nan lain? Bisa sajo kalau Allah bakahandak. Sabab Tuhan Allah ka maampuni siapo sajo nan katuju di No untuak diampuni, ka maazab siapo sajo nan katuju di No untuak maazab. Tapi nan labiah tapek, nan labiah mayakinkan, tantu ado dulu paretongan. Namun nan labiah sulik, baa awak ka yakin bahaso tapek katiko sakratul maut itu biko lai takana sin di awak mangucap sarupo itu. Disunnahkan ka urang nan mancaliak untuak maaja atau mantalqinkan urang nan ka mati jo kalimat Laa ilaha illallah. Tapi disaat sakratul maut setanpun sato pulo sibuk. Mako ado sajo kajadian, urang nan indak panah sumbayang, indak panah puaso, indak panah baibadaik, katiko ka mati ditolong urang mantalqinkan. Satiok urang mambacoan kalimaik tu, di no nan kalua, caruik bungkang. Sakik alah samparono sakik, mato sin indak talok dino mambukak lai, tapi suaro caruikno kalua sangaik jaleh. Apo aratino? Aratino, labiah badanga dino bisiak setan katiko itu sabab salamoko ano labiah akrab jo setan tu. Baitulah kiro-kiro Malin.' 'Jadi amal ibadah awak saari-ari kiniko tamasuak untuak malatiah supayo katiko sakratul mauik biko ijaan sampai tagaliciak du mah iyo buya?' tayo Sutan Nangkodoh manambah saketek. 'Batua. Jo baamal shaliah, jo mamatuhi parentah agamo tarago awak masih siaik, mamaliaro iman jo taqwa katiko masih siaik, adolah untuak parsiapan awak maadoki saaik nan saketek tu biko. Sabab saaik sakratul maut indak ado awak nan tahu pabilo ka datang no doh. Kan indak ado awak nan tau pabilo awak ka mati doh? Dimaa awak kamati? Jo caro aa awak ka mati? Jadi pasiapanlah diri taruih manaruih. Sainggo insya Allah, katiko tibo masono awak alah siap. Mudah-mudahan, di panghujuang angok awak, talakik mambaco 'laa ilaha illallah' tu. Sudah itu dipareso biko catatan amalan-amalan awak, lai elok. Barulah awak ka dimasuak-an Allah kadalam sarugo No insya Allah.' 'Kalau ambo ka batanyo dari kaji awak nan lapeh buya. Buya mangecek-an bahaso awak disuruah Tuhan Allah untuak saliang ba katahuan antaro sasamo manusia. Kan cukuik jo ba katahuan sajo buya. Kan labiah elok kok awak mamaga diri dari bagaua jo urang nan indak saakidah jo awak. Indak paralu bana awak bagaua jo mareka doh. Sabab jo bagaua ko mungkin labiah banyak mularaik nan katumbuah. Baa kiro-kiro du buya?' tanyo Kari Sutan. 'Alah? Sakitu sin tanyo Kari?' 'Sakitu dulu buya,' jawab Kari baliak. 'Batua sabagian ketek, salah sabagian gadang nan Kari sabuik-an tu. Batua kok dipiliah-piliah urang nan ka dibao bagaua ko. Di caliak-caliak urang nan kadibao baiyo batido, indak disamoan sin sado urang ko doh. Kalau nampak di awak bahaso bagaua jo surang urang tu ka mambao mularaik ka awak, di adok-an Tuhan Allah, mako ancak mainda. Tapi salah, kalau awak manutuik diri rapek-rapek dari pargaulan dunia ko, jo mancukuik-an pargaulan awak hanyo jo urang-urang nan sa akidah jo awak sajo. Kalau sarupo itu caro bapikia urang-urang nan alah daulu baugamo Islam, indak sampai agamo Islam ko ka mari. Indak sampai agamo Islam ko ka nagari awak ko doh. Islam ka tapakok di pasakitaran Madinah sajo. Tapi para sahabaik, para tabi'in, para tabi-tabi' in, para urang-urang bariman nan datang kudian, pai bana manapa, pai bana bagaua ka dunia lawehko, dan jo sarupo itulah agamo Islam ko tibo di nagari awak. Datangno untuak bagaua, bisa sajo jo badagang, atau jo ba dakwah langsuang. Nagari Indonesia awakko jadi contoh kasus nan samparono rancak tantang itu. Islam ko datang jo damai kamari. Ulama-ulama nan mambaono dulu itu, bagaua jo inyiak muyang awak, maagiah contoh kaimanan mareka, sampai inyiak muyang awak tatariak, sampai mareka masuak Islam. Dulu sabalun Islam datang, inyiak muyang awak, tamasuak di Minangkabauko baugamo Hindu, manyambah dewa-dewa, mamakan barang-barang haram. Sasudah masuak Islam barubah saketek-saketek, managak-an aturan-atuaran syariat agamo Islam. Baitu juo andakno taruih sampai kini. Nan labiah paralu sabanano, bakali diri awak jo benteng nan taguah dalam baagamoko, sainggo katiko awak bagaua jo urang nan bukan Islam, ado pangaruah ka urang-urang tu datang dari awak. Tunjuak-an kautamuan akhlaq Islam, tunjuak-an kautamuan kajujuran nan diajakan Islam, tunjuak-an kasiah sayang dalam Islam. Mudah-mudahan tatariak urang mancaliak nilai-nilai Islam awak. Sudah itu ingin pulo no sato masuak Islam. Tapi kalau benteng indak ado, pamahaman awak dangka, nan katuju diawak nan bakilau sajo padohal nan bakilau tu acok kali loyang, bukan ameh, mako nan ka tajadi hanyolah sio-sio utang tumbuah. Awak nan hanyuik dilarian kayakinan urang. Baitulah Kari.' Website http://www.rantaunet.org _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
