Assalamu'alaikum.w
.... kito sambuang pulo baliak.....
Mako urang nan sehat utaknyo, basiap-siap untuak mati
sabalun mati. Urang-urang nan takuik mati sabalun
mati, berarti inyo lah mati sabalun mati.
Urang-urang nan Al-kayyisu, urang nan cadiak, adolah
"man daa na nafsahu"
Yaitu orang-orang yang meletakkan dirinya, yaitu nan
mamacik agamo,
"waamila lima badal maut", dan beramal untuk mati
besok.
Itulah nan cadiak atau al-kayysisu itu.
Makonyo kalau kito nio jadi urang cadiak, aaa
... standby lah untuak mati.
Beramallah pagi patang siang malam, gunokan
sapanuah-panuahnyo ukatu tu untuak baibadat sambia
mancari nafkah untuak iduik di dunia ko sasuai jo
jalan nan diperintahkan dan diridhai dek Allah swt.
Kalaulah tibo masonyo mati tu, indak ado nan bisa
maubek, baru takana sumbayang, baru takana nan bana,
lah talambek. Ikolah nan awak takuikkan, kalau
ujuang-ujuangnyo mati tu mati ndak elok. Dahaga nan
kito katokan tadi, indak bisa diubek walau jo aia
sapanuah lauiktan, dek karano, rasakinyo lah ndak ado
lai. Rasaki minum tu lah ndak ado lai. Tapi disunatkan
juo bagi urang nan iduik untuak maagiah aia, guno
mambasahkan rakungannyo, walaupun indak taminum di nyo
lai. Kok tuan-tuan titiak-kan aia, kamudian tuan-tuan
dangakan baliak, tadanga aia tu sarupo manggalagak
dalam rakuangan, karano inyo indak buliah mandaugik
lai, dek rasakinyo lah ditutuik, indak buliah
mandaguik lai dek karano malaikat mikail lah turun
lalu nyo mangecek, "Wahai anak adam, rezekimu
setitikpun sudah tidak ada lagi.". Kito titiakkan juo,
tinggalah aia tu di rakungan, dek karano rasaki
sabananyo tiok-tiok nan dimakan jo nan diminum. Pitih
dalam saku alun tantu jadi rasaki lai, kadang-kadang
hanyo singgah samantaro.
Bilo sampai masonyo izrailpun datang, sambia mambao
kapan dari narako kok urang tu urang bamaksiat, untuak
mangapankan roh urang tu, jo baun nan indak
takao-kaoan dek urang nan iduik. Dan malaikat izrail
datang sambia mambao kapan dari sarugo, jo baun nan
sabana lamak, untuak mangapani roh urang nan beramal,
urang yang bertaqwa, urang nan shaleh, urang-urang
yang berbakti, urang-urang nan batarimo kasih ka Allah
swt.
Itu sababnyo kalau maliek urang mati, jan diliek
urang nyo, liek suasana kematian tu. Jan kematiannyo
nan diliek tapi pengajaran dari kematian tu diliek.
Aratinyo giliran inyo lah sampai, nantik giliran kito
pulo ka tibo. Nan malangnyo giliran tu bilo awak ndak
tahu. Kalau tahu, antri kan sanang. Apo lai kok tahu
tampek nyo, kini giliran urang Padang sajo, bisuak
giliran rang Kik tinggi, eh..., bisa lari ka bukik
tinggi atau ka tampek lain. Atau kalau umua lah jaleh
bara-baranyo, ....kalau umua 70, nantik 69 satangah
baru batobat. Tapi sayang umuapun indak diagiah tahu
bara-baranyo doh.
Ado urang mangabakan kawannyo, bahaso kawannyo
sakik.
"Ndak baa doh, bisuak dicaliak...
Tau-tau pagi-pagi ka dicaliak, ruponyo pukua ampek
pagi lah maningga. Kan ndak sempat.
Nyo ndak bisa bagai doh, "bialah ambo caliak bisuak,
buliah mati gak lambek saketek",... ndak bisa do.
Itu sababnyo dalam hal takah iko, kok ado dunsanak,
family, kawan nan sakik, jan ditundo, rancak pai
caliak capek. Dari minik ka minik, bisa painyo. Sabab
izrail indak bisa ditagahan doh, dek karano perintah
Allah swt. indak bisa dilawannyo, dan bukan
malaikatnyo kalau nyo bisa malawan Allah swt. Nyo
cabuik juo kok lah tibo perintah.
Tacabuik juo nyao tu,... sakik
Dalam kitab tafsir al jalalain manyabuik, sakiknyo
tacabuik nyao tu sarupo jo dipancuang urang, lalu
sakiknyo dilipekkan 70 kali. Sakali pancuang kan
sakik, dikalikan 70 kali, baralah ka sakiknyo tu. Ndak
ado urang iduik nan tau, dek karano indak ado urang
nan babaliak dari mati tu do. Kalau ado nan baliak,
mungkin indak basiagak-siagak panuah musajik do tu.
Masajik sagadang istiqlal indak ka cukuik, co
bayangkan bara penduduk Jakarta, untuak urang nan
diJakarta sajo baru tu. Kini musajik indak baurang,
dek karano indak nampak balasan dek urang. Dan Allah
indak manampakkan balasan tu di dunia ko doh, di
akhirat nantik baru nampak.
Lah mati baru tau.
Manangihlah keluarga, anak jo bini, dek karano
kekanda nan dikasihi alah pai maninggakan inyo untuak
salamo-lamonyo. Katiko dimandikan tu, tadanga suaro
dari langik,
"Wahai anak adam, engkau meninggalkan dunia, atau
dunia meninggalkan engkau ?."
"Wahai anak adam, sekarang engkau akan musafir ke
tempat yang jauh, apa persiapanmu wahai anak adam ?."
"Wahai anak adam, dulu dalam dunia banyak pengaruh
engkau, banyak orang yang mendukung engkau, banyak
orang yang setuju tindakan engkau, bangga engkau dalam
dunia, sombong engkau dalam dunia, sekarang engkau
.... Bangun !!!,.. " kecek nyo sambia marangguikkan.
"Dulu tenaga engkau terlalu hebat, sekarang dimana
tenagamu, wahai anak adam ?",
"Dimana kekuatanmu, dimana pengaruhmu ?",
Suaro langik ko batalu-talu, baru taraso dinyo.
Dimandikan urang disumbayangkan, manyarahlah inyo,
saketek juo nyo ndak complain nyo doh. Digosokkan
giginyo, nyo anok, ditakan paruiknyo nyo diam,
diduduakkan aniang je nyo. Kapatang galaknyo, kini
anoknyo, kapatang gembiranyo, kini indak babunyi nyo
doh. Kapatang mangeceknyo, kini bisunyo. Dibaoklah
kakubua, roh lah ndak ado dibadan, bakatolah roh tu,
kama den kadibao, kama den kadibao. Kalau urang yang
beriman dan beramal shaleh, basicapeklah, basugirolah.
Itu sababnyo urang mati jan ditunggu-tunggu, bao
sajo. Jan ditunggu lo anak dari london ka pulang, anak
dari Amerika ka baliak, Barisuak baru nyo sampai, baa
jenazah ko ko?.
Inyo pulang ndak pulang, indak mauntuangkan ka si mati
saketek juo doh. Anak ka baliak ka ditunggu, urang lah
mati. Nan paralu iyolah doa. Iko nan ka sampai, bagi
anak nan shaleh pulo.
Sudah tu diturunkan ka kubua, wakatu malatakkan
jenazah tu, ambiak 3 kapa tanah.
"Minhaa khalaqnaakum" Dari tanah engkau dijadikan.
"Wa fiiha nu-idukum" dan kepada tanah engkau
dikembalikan
"Waminhaa nukhrijukum taaratan ukhraa", dan kelak dari
tanah juga kamu akan dibangkitkan semula. Diciumkan ka
jenazah tu .
Mukasuiknyo, ambiak tanah 3 kapa, sakapa diciumkan,
"Daulu engkau datang dari tanah"
Cium nan kaduo, "Sekarang kembali masuk dalam tanah"
Cium nan katigo " Nanti bangkit dari tanah juga"
Dibuliahkan isteri atau suami mancium suami tu.
Indak mambatakan udhuak.
.... lah panjang pulo... barisuak kito sambuang...
Wabillahil hidayah wat taufiq
Wassalam
St. Sinaro
__________________________________________________
Do You Yahoo!?
Tired of spam? Yahoo! Mail has the best spam protection around
http://mail.yahoo.com
Website http://www.rantaunet.org
_____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
____________________________________________________
