Assalamualaikum w.w.
Iyo mantun mah, mak Ngah.. Kalumpang tu ruponyo sabangso kayu gadang nan
dapek diajadikan "landmark" panandoi nagari-2 nan utamo, jadi samo
fungsinyo jo baringin. Salain tinggi, umuanyo bisa panjang pulo. Mungkin
kayu kubang tamasuak kategori iko juo.
Ambo raso banyak namo-namo kayu nan mulai punah, baik pohonnyo maupun
namonyo. Barangkali 'bangkaweh' adolah namo kayu juo. Di parak bulakang
rumah ambo dulu masih ado "bayua," "langsano," dan kayu "kamuniang."
Kamuniang rancak untuak tangkai pisau, kapalo tungkek, dll. Warnanyo
kuniang bakilek, indak paralu dipelitur lai.
Jamberang ko dulu banyak tumbuah di kampuang ambo. Sabangso jambu juo,
daun dan putiaknyo samo jo daun dan putiak jambu.. perbedaannyo putiak
jamberang tu indak namuah jadi buah do.. lauyua dan rareh sajo. Pucuaknyo
nan kamerah-merahan atau kakuniang-kuniangan kalau dimakan rasonyo agak
asam-asam kalek. Manganyang juo bagi awak nan dan lapa-lapa-i maso
ketek-ketek daulu.
Umbang jamberang ko rancak jadi "bongka", atau peluru, badia-badia batuang
nan tabuek dari sarueh ranggeh batuang, bakaliber 6 mm...
Kulit batang jamberangko, diambiak patinyo, rancak untuak ubek kada
gestapu.
salam,
-adyan
On Mon, 12 Sep 2005 02:27:48 +0700, Sjamsir Sjarif <[EMAIL PROTECTED]>
wrote:
1. Janberang, mungkin suatu kacikak kalau urang mambuek kurabu nan pakai
"pucuak janberang" tu, kalau rasonyo indak lamak, "jaan berang" atau
usahlah bangih-bangih bana.
2. Mungkin pulo kato "Janberang" ko kapendekan atau parubahan bunyi kato
dari "Jambuerang" atau jalehnyo diacah kato sabanayo "Jambu Erang"
sabangso jambu nan sirah. Ambo indak tahu bana nan maa nan Jambu Erang
tu,
karano ado babarapo jambu nan sirah. Bahkan ado lo buah jambu nan agak
gadang nan kito namokan Jambak. Itupun ka sirah-sirahan pulo, agak
badaruih
kalau digigik. Ado pulo "Jambu Aia" cuma warnonyo nan digunokan untuak
manjalehkan macam warno, tapi indak dapek dimakan doh.
Sabagai tando dari Nagari Balai Gurah tu di ambo maso ketek-ketek kalau
awak mancaliaknyo dari lereng Gunugan Marapi dari Lasi atau Canduang
adolah
"Batang Kalumpang" di Kapalo Koto" jo "Batang Kubang di Pakan Jumaat
Pakan
Sanam" dakek Ikua Labuah. Untuak Tando Nagari Panampuang adolah "Batang
Baringin di Pakan Kaluang". Sayang Batang Baringin di Pakan Kaluang ko
indak ado lo kini lai. Dahulu maso ketek-ketek ambo acok main-maina
mamanjek-manjek tungguanyo dan babuai-buai jo ureknyo nan
tagayuik-gayuik.
Website http://www.rantaunet.org
_____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
____________________________________________________
