Assalamualaikum ww, Sanak Hendra (kamurer [EMAIL PROTECTED]), Iko Ambo forward kan baliak carito dari sanak Wady Afriadi [EMAIL PROTECTED]
Wassalam, Jum BTM -----Original Message----- From: [EMAIL PROTECTED] [mailto:[EMAIL PROTECTED] Behalf Of Wady Afriadi Sent: Tuesday, March 07, 2006 11:28 PM To: [email protected] Subject: [EMAIL PROTECTED] Suatu Hari di Ateh Oto "Afmomen" Sanjo tu ari kiro-kiro pukua limo. Oto Afmomen nan ambo tumpangi kadang taangguak-angguak katiko mandaki dari Padang Panjang ka Bukik Tinggi. Ambo suko naiak oto Afmomen ko dari Padang Panjang ka Pikumbuah. Karano namo otonyo samo jo namo kawan ambo, si Af, urang Tiakar Guguak, Pikumbuah mudiak. Antah oto ko ado kaitannyo jo si Af tu antah indak, ambo ndak tau pasti. Si Af kawan ambo tu memang kadang-kadang misterius sangaik. Jikok duduak maota di lapau, namuah lupo kito jo ari. Kadang nyo batea-tea salai-lai, kadang sarius bana sahinggo banyak keceknyo nan ambo ndak mangarati. Pernah ambo tanyo ka wanyo taruih tarang; "Af, oto Afmomen tambang Solok- Pikumbuah tu waang nan punyo? Alah punyo oto tambangan waang anok-anok se." Namun keceknyo bakeh ambo indak. Antahlah, mungkin nyo pandai basisuruak, mungkin juo sabana indak. Ambo sakawan jo wanyo sajak SMP, walaupun ambo ukan urang Tiaka, tapi urang Danguang-Danguang, namun ambo acok duduak di Tiaka, di lapau Iyuh Gosoh tu. Katiko tibo musim durian, alah satu pulo ambo jo urang Tiaka mangalarau ka suduik-suduik kampuang mancari durian. Satantangan oto Afmomen tadi tu, tambangannyo subananyo dari Solok ka Pikumbuah, tapi jikok ado panumpang naiak di jalan tantu lain ditarimonyo juo. Sambia takantuak-kantuak di kurisi paliang balakang, tapikia-pikia juo dek ambo, jikok iyo si Af tu nan punyo oto ko, sabana sasuai jo namonyo. Kalau ndak salah, lai takana juo dek ambo palajaran bahaso Inggirih katiko kami samo sikola di SMP 2 Danguang-Danguang, di balakang pakan Sabtu, bahaso kato "momen" itu aratinyo adolah "wakatu", atau kutiko, atau maso. Jadi kato Afmomen itu sabananyo samo jo "Af Moment" atau maso-maso jo si Af. Sabananyo moment-moment jo si Af tu iyo sabana lasuah, ado-ado sajo kajadian nan ndak bisa dilupoan kalau sadang jo paja tu. Talayang-layang ambo katiko takana si Af tu. Apolai angin sepoi-sepoi berhembus dari jandela oto nan cuma ambo bukak sabalah. Namun kantuak ambo tiok sabanta tagaduah dek suaro sitokar atau cingkariak nan tiok sabanta basisorak sambia barayun bakcando dunsanak kito nan suko mamanjek tu. "Kumbuah kumbuah kumbuah! Kosong..!" Kecek cingkariak tu baulang-ulang. Tapaso lah ambo mambukak mato baliak. Kiro-kiro satantangan nagari Sapuluah Koto, naiak surang induak-induak. Sasudah dicaliaknyo tampek duduak dimuko suok kida ndak ado nan kosong, akhianyo tapasolah nyo bajalan ka balakang, ka dakek ambo duduak. Lalu duduak lah wanyo dakek ambo. Ambo caliak jo suduik mato ambo, etek ko ado mungkin umuanyo ampek puluah-an. Badannyo agak gapuak, bakaraduang bordir, mungkin buatan Ampek Angkek. Inyo ndak ado mambaok barang, cuma tas ketek ciek nan langsuang dipangkunyo katiko wanyo alah duduak di sampiang ambo. Ambo parati-paratikan juo - dek indak ado karajo, etek ko urang lai nampaknyo. Mungkin nyo urang manggaleh di Pasa Ateh Bukik Tinggi. Di tangannyo balingka galang sagadang galang aka baha nan acok dipakai pareman. Tapi galang nan dipakai etek tu bukan galang barono hitam sarato kumuah nan acok dipakai pareman tu, namun kuniang warnanyo. Ameh. Cincinnyo barek pulo nampak dek ambo, di jari manih ciek, jari tangah ado pulo. Indak subalah tangan, tapi kaduo balahnyo bacincin. Nampaknyo ameh juo. Salinteh di pikiran Ambo, ah, mungkin tu ameh tasi. Abih ameh tingga basi. Basi loyang nan disapuah sahinggo tampak bak cando ameh. Banyak tukang sapuah di Bukik Tinggi, jankan di Bukik Tinggi, di Pakan Sabtu Danguang-Danguang se banyak. Namun dek karano duduak di subalah ambo bana, nampak dek ambo galang nan dipakainyo tu agak sumbiang saketek, mungkin karano benturan dg benda kareh, sahinggo kuliknyo mangalupeh, tampak bagian dalamnyo. Nampak dek mato ambo, di bagian dalam logam tu tatap kuniang bakilau juo. Ambo raguak aia liua, manggumam surang: iyo bana ameh tampaknyo. Panek utak ambo mamikiakan etek tu surang, padohal wanyo ndak ado hubuangan apo-apo jo ambo, dunsanak indak sakampuang indak, manga lo dipikiakan, akhianyo tibo kantuak ambo baliak. Akhianyo kapalo ambo sandakan ka bangku oto, dicubo lalok agak sakijok manjalang oto liwaik Bukik Tinggi. Babarapo kali kutiko sadang talalo, taraso baban barek di bahu ambo sabalah kida. Etek tu duduak sabalah kida ambo, sadangkan sabalah suok ambo indak ado urang lain, karano ambo duduak di suduik sabalah suok, bangku paliang balakang. Lai takana dek ambo, apo ko nan maimpik ambo, apokah etek urang manggaleh tadi basanda ka bahu ambo? Namun dek mato barek bana, ambo taruihkan sajo lalok, indak ambo pedulikan. Lai ndak lain-lain pulo niaik nan timbua dek ambo takantuak. Kecuali kok anak gadih nan duduak di sampiang ambo, tantu lain pakaro. Alah sapuluah minik mungkin, atau duopuluah minik berlalu. Ambo tajago baliak katiko cingkariak basorak: "Padang Lua, Padang Lua...! Nan Padang Lua abih.. Padang Lua abih..." Baitu sorak sitokar tu. Ambo tajago baliak. Sabalah suok nampak pasa Padang Lua, rami bana nampaknyo. Bakaruang karuang lobak, sawi, lado baroton (wortel) baungguak tampak dek ambo. Sairiang jo itu, etek subalah ambo tajago pulo nampaknyo. Mancaliak nyo ka ambo, lalu batanyo: "Alah dima ko?" "Padang Lua. Dima etek turun?" Tanyo ambo sesopan mungkin. "Di Baso." Jaweknyo sambia manutuik muluiknyo nan kuok. Sasudah kuok, tu, nampaknyo ado nan taraso nampaknyo dek etek tu. Dicaliaknyo ka tampek duduak sabalah kida, ndak ado nampak, dicaliaknyo ka sabalah suok, ka tampek ambo duduak, ndak pulo basuo nan dicarinyo. Dicubonyo manakua, andak mancaliak ka bawah bangku oto, wajahnyo batambah gelisah tampak dek ambo. "Apo nan etek cari?" Tanyo ambo. "Ado nan ilang?" Namun wanyo ndak manjawek. Dipatuik-patuiknyo urang nan duduak di sabalah kida, apak gaek dan bakacomato taba, batupi haji. Ndak ka mungkin rasonyo, akhianyo dipatuiknyo ambo. Ambo mulai maraso ganjia. Dek a etek ko? Manga nyo mancaliak sarupo itu ka ambo? Akhianyo ambo baranikan diri batanyo baliak, "Ado apo tek?" Wajahnyo barubah masam bakeh ambo. Baa keceknyo: "Jan purak-purak ndak tau waang lai!" Ambo sungguah-sungguah ndak tau apo mungkasuik etek tu, tantu ambo batanyo sejujurnyo bahaso ambo iyobana indak tau, ado a? Etek tu manjawek jo suaro agak maninggi, "Dari tadi sajak partamo den naiak, waang surang nan duduak di siko nyo. Jan bak cando urang engak juo waang lai. Dompet den! Maa nyo dompet den?!" Astagfirullah, ruponyo etek tu mancari-cari dompetnyo. Ambo sungguah-sungguah ndak tau, tapi bialah, walaupun etek ko agak tenggi tensi nampaknyo, bialah ambo bantu juo mancarinyo. Tagak ambo ambo dari bangku, manyigi ambo suok kida, manyilau pulo ambo ka bawah bangku oto, ndak ado nampak do. "Apo warna nyo dompet etek, kulik atau kain?" Tanyo ambo baliak, dengan niaik baik andak manolong. "Jan banyak gaya juo waang lai, dari tadi waang nan acok mancaliak-caliak ka den, waang kecekkan indak tau den. Kamarikan dompet waden, kok indak den laporkan waang ka polisi kini juo!" Ondeh mandeh, iko ruponyo. Ambo baru tasadar bana bahaso ruponyo etek ko manyangko ambo nan maambiak dompetnyo. Ambo sabarkan juo diri ambo, jikok awak indak berbuat, manga lo cameh? "Subhanallah, indak ado ambo mancaliak dompet etek do tek. Mungkin tajatuah atau etek lupo dima malatak-annyo, kana-kana bana lah dulu." Namun etek tu mulai mambulalang ka ambo. "Ma nyo dompet den tu, kaluakan! Jikok indak waang den laporkan kini juo!" Dari tadi mato urang saoto alah tatuju bakeh ambo. Apolai bantuak ambo - sejujurnyo - iyo agak kurang sanereh. Kulik ambo iyo agak kalam, wajah tambuak-tambuak dek bekas jarawek gadang-gadang nan indak namuah barubah. Namun walaupun baitu, alun lai ambo ka maambiak-ambiak punyo urang. Bia lah ambo bansaik ndak makan asa jan mamakan nan haram, baitu prinsip ambo. Namun etek ko malah alah yakin bana bahaso ambo nan maambiak dompetnyo. Mato urang sakuliliang samakin tajam tatuju bakeh ambo. Babarapo urang laki-laki nan gadang bangkalainyo alah nak tagak, tapi cingkariak oto duluan datang bakeh ambo. "Iyo uda nan maambiak dompet uni ko, agiah kan sajo lah baliak." Kecek cingkariak tu, mungkin niaiknyo elok, sabalun urang saoto turun manangani ambo. "Masya Allah... ndak ado waden maambiak dompet etek ko do. Demi Allah.." Jawek ambo, suaro ambo alah gamaretek saketek. Sungguah ilang aka ambo, walaupun awak indak salah, tapi kok ditangani urang beko baa? Takana dek ambo kawan si Af urang Tiakar Guguak tu. Wanyo bukan urang bagak, tapi katiko ado masalah-masalah sarupo iko biasonyo capek dinyo dapek jalan kaluanyo. Namun kini ko tapaso lah ambo mamikiakan jalan kaluanyo surang. "Ndak paralu sabuik-sabuik namo Tuhan do, jikok indak uda nan maambiak, cubo kaluakan isi saku sarato isi tas uda." Kecek cingkariak oto. Walaupun karajonyo cingkariak, tapi paja ko cukuik arif juo nampaknyo, pikia ambo. Ambo alah siap mangaluakan isi saku sarato isi tas ambo, namun etek nan kailangan tu indak saba lai nampaknyo. "Iyo jaleh wanyo ko pelakunyo, sia juo lai? TOLONG.. Barantikan oto ko! Aden ka maimbau polisi, tolong barantikan oto ko, ado COPET, COPEETTT...!!! Pakiak etek tu, sampai tadanga dek urang di tapi jalan. Supir oto langsuang maambiak kiri, dibarantikannyo oto, sudah tu wanyo turun pulo, bajalan ka balakang, antah ingin tau apo nan tajadi antah ingin ikuik manangani. Biasonyo manangani urang nan maliang nan tatangkok adolah kebanggaan bagi banyak urang. Ado kiro-kiro sapuluah urang laki-laki badagok bakarubuang bakeh ambo. Babarapo tinju alah taangkek ka udaro, namun ambo baeh pulo mahariak baliak supayo jan sampai kanai dulu sabalun jaleh permasalahannyo. Namun baitu, ambo lah siap pulo pasang kudo-kudo, memangnyo urang Danguang-Danguang aia matah se isi paruiknyo, tantu indak. Percuma ambo mangaji ampek-puluah hari jo guru surau Suluak di Balubuih kalau baitu. "Tahan dulu!" Hariak ambo. "Ambo ndak ado maambiak dompet etek ko do. Ambo ko mahasiswa Fakultas Hukum Universitas Muhammadiyah, sampiang Aua Kuniang, kalau ndak picayo ko kartu mahasiswa Ambo!" Sagah ambo sambia mampacaliakkan kartu mahasiswa ambo. Ambo kaluakan dompet ambo, ambo lemparkan ka tanah, ambo ambiak tas ambo, ambo serakkan sado isinyo sahinggo tampak dek sado urang nan ado. Salain urang oto, urang nan lewaik pun sato pulo bakarubuang mancaliak apo nan tajadi. "Ma dompet uni ko jo Ambo? Lah dari tadi ambo kecekkan, ndak ado ambo maambiak dompet uni ko do! Ambo mahasiswa, bukan urang pareman, ambo lai tau jo agamo, tau jo hala jo haram!" Sagah ambo baliak. Tinju nan tadi taangkek ka udaro lai turun baliak. Banyak mato nan tadinyo mambulalang bakeh ambo kini baraliah ka etek tu. Sitokar nan arih bijaksano tu akhianyo mangecek baliak, "Alah bapareso tas uda ko ni, ndak ado dompet uni jo inyo do. Pareso bana lah barang uni baliak." Keceknyo tegas. Uni tu tu akhianyo mangarapiak-mangarapiak ka dalam tas nan dari tadi dipaciknyo. Antah bara biliaknyo dalam tas tu, banyak juo nampaknyo. Katiko wanyo marogoh ka biliak rahasio di dalam tasnyo, nan talatak paliang dalam, tangannyo kalua sambia mamacik sebuah dompet kulik berwarna coklat. "Dompet itu nan uni cari?" Tanyo sitokar tu. "Eh, di siko kironyo dompetnyo. Perasaan uni tadi dompet tu uni pacik, indak masuak dalam tas doh. Maaf yo diak, uni alah salah sangko ka adiak." Kato uni tu sambia mancaliak bakeh ambo. "Oo ho..." Kecek urang banyak manggarutu. Ruponyo kejadian ko cuma salah sangko. Supir oto langsuang duduak baliak ka balakang stiurnyo, siap manstater oto baliak. Penumpang nan lain baliak ka tampek duduak masiang-masiang. Namun katiko tangan supir oto alah mamacik kunci kontak andak manstater, ambo langsuang manyoru: "Tunggu dulu!" Sagah ambo. Mato-mato mancaliak bakeh ambo baliak. "Ndak amuah mode iko sajo caronyo, aden ndak bisa manarimo tuduahan sumbarangan sarupo iko doh." Lanjuik ambo. Baa jawek etek tu: "Ondeh uni kan lah mintak maaf bakeh adiak. Iyo alah salah paham uni, manga juo diperpanjang masalahnyo lai." Keceknyo dengan wajah memohon bakeh ambo. "Indak bisa doh." Lanjuik ambo tegas. "Ambo ko mahasiswa Fakultas Hukum ni. Perlakuan uni tadi bisa ambo tuntuik sebagai perlakuan tidak menyenangkan serta pencemaran nama baik..! Kecek uni tadi kito ka malibatkan polisi, tu mah polsek Jambu Air, mari kito turun, kito salasaikan permasalahan ko secara hukum!" Ambo iyobana alah naiak spaning. Salamak tu wanyo manuduah sambarangan tadi, kini lamak se mintak maaf bakcando ndak tajadi apo-apo. "Ondeh diak... Jan sarupo itu bana. Mambana uni ka adiak..." "Indak bisa do ni. Iko alah keterlaluan bana ko, ambo ampia ditangani urang gara-gara tuduhan uni. Pokoknyo masalah ko harus diselesaikan di pengadilan." Ambo semakin yakin jo pandirian ambo, biar uni ko tau rasa sarato ndak manuduah urang sambarangan sarupo itu. "Uni sabana mintak maaf diak. Sekadar untuak paubek ati adiak, ..." Etek tu manahan keceknyo sabanta karano sambia mangecek tu wanyo mancubo mambukak dompetnyo. Diambiaknyo duo alai karateh duopuluah ribu dari dalamnyo, sudah tu disorongannyo bakeh ambo. "Putiah kapeh dapek diliek, putiah hati bakaadaan, tarimo lah dek adiak iko paragiah uni sebagai ungkapan kata maaf dari Uni." Kecek uni tu sambia mauluakan pitih tu ka ambo. Lamak se! Batin ambo. Sasudah sagalo hal nan tajadi lamak se wanyo manyogok ambo jo pitih ampek puluah ribu tu. Sabananyo ampek puluah ribu tu biaya ambo sabulan diagiah gaek mah. Katiko tu balanjo ambo ampek puluah ribu sabulan diagiah gaek. Pitih nan paliang gadang pado maso itu adolah uang karateh duo puluah ribu. Wakatu tu alun ado karateh limo puluah ribu atau saratuih ribu. Namun harga diri ambo tantu ndak bisa dinilai jo pitih ampek puluah ribu tu do. "Pokoknyo ambo ndak tarimo do Ni! Kejadian ko harus disalasaikan secara hukum!" Jawek ambo mantap. "Jan sarupo itu bana diak... Uni tulus andak mintak maaf. Jikok adiak alun bisa manarimo..." Kecek uni tu taranti karano wanyo mangaruak dompetnyo baliak. Dietongnyo uang duopuluah ribuan sampai sapuluah halai, ndak bara tingga nampak dek ambo pitih di dompetnyo lai. Lalu diagiahkannyo pitih nan diambiaknyo tadi bakeh ambo baliak. "Tarimo lah iko dek adiak, jadikanlah balanjo untuak kuliah. Sebagai ungkapan maaf uni bakeh adiak." Sambuang uni tu baliak. Taruih tarang, ati ambo alah mulai bimbang. Sapuluah halai uang karateh duo puluah ribu, berarti duo ratuih ribu! Bisa untuak balanjo ambo limo bulan, bisa pambayia uang kuliah semester nan katibo! Namun takana tadi ambo sambarang dituduah, ampia pulo ditangani urang, akhianyo kareh ati ambo baliak. "Ambo kecekkan indak bisa, yo INDAK BISA!" Sagah ambo. "Apo uni hendak berniat menyogok ambo? Untuak uni ketahui, ambo adolah calon penegak hukum nan indak bisa disogok! Biarpun sapuluah juta uni agiah ambo kini, ambo tatap indak tarimo! Ayo kito pai ka kantua Polsek Jambu Aia tu, tu ndak jauah dari siko. Kito harus menyelesaikan masalah ko secara hukum!" Sagah ambo baliak. Urang-urang nan tadi mancaliak bergumam tadanga dek ambo. Sebagian alah hijau matonyo mancaliak kepeang nan dikaluakan uni tu. Namun selaku hamba hukum nan taat, tantu ambo harus membiasakan diri untuak indak namuah disogok dari kini. "Ndak baitu do diak..." Lanjuik uni tu. Nampaknyo baliau ndak gampang putuih asa pulo do. Ditambahnyo pitih nan dikaluakannyo tadi tu sapuluah halai lai, sudah tu dibukaknyo galang nan dipakainyo kasadonyo, ampek buah. Sudah tu ditanggakannyo pulo cincin nan dipakainyo di kaduo balah tangannyo, kasadonyo dilatakkannyo di ateh pangkuan ambo. "Bialah, Uni relakan kasadonyo ko untuak Adiak, sebagai penebus kesalahan uni, asalkan masalah ko indak Adiak perpanjang." Kato uni tu. "Ambiak sajo lah diak. Uni sabana rela, iyo tadi uni alah talongsong manuduah adiak. Iko sebagai pelajaran berharga pulo bagi Uni untuak salanjuiknyo. Ambiak lah." Sasudah mangecek tu, Uni tu basorak ka supir oto. "Pir, jalan! Alah salasai!" Langsuang supir oto manstater oto, sasudah bagaruncang oto tu saketek, inyo mulai bajalan. Ambo rapekkan paha ambo supayo ameh nan tadi dilatakkan uni tu ndak jatuah berserakan. Akhirnyo, ambo tapaso manyarah. Daripado memperpanjang masalahnyo sampai malibatkan polisi segala, rancak lah dipasingkek sajo. Apolai uni tu lai mintak maaf secara tulus bakeh ambo. Seakan-akan ndak picayo mato ambo taruih menatap ameh nan berkilauan di pangkuan ambo. Ado pulo pitih sebanyak ampek ratuih ribu rupiah. Uang kuliah ambo alah aman untuak setahun jo pitih ko. Ameh ko kok dijua dapek pulo untuak balanjo hiduik ambo sataun. Satahun lai ambo jadi Sarjana Hukum! Pas bana! Tapi ado pulo nan taniaik di hati ambo. Ambo kan alah lamo berencana mambukak pangkas rambut, karano hobi ambo dari dulu memang memangkas rambut teman. Namun salamo ko rencana ambo ko selalu terbentur masalah modal. Namun dengan kejadian tak terduga ko, ambo alah punyo modal untuak mambukak rumah pangkeh tu! Ambo rancang-rancang, pangkeh tu nanti namonyo "St. Pamenan Barber Shop". Ondeh, sabana lasuah. Namun antah apo nan tajadi, tibo-tibo badan ambo baguncang-guncang. Apo nan tajadi, gampo ari ko? Balantak oto? Sabalun ambo sadar apo nan tajadi, tadanga suaro kareh di talingo ambo; "An... An...!" Suaro itu mamanggia namo ambo. Namo ambo iyo si An. "An..., An... ! Jago lah. Kecek waang waang ka barangkek ka Padang Panjang kini, jago lah!" Ruponyo itu suaro mandeh ambo manjagokan ambo. Katiko tajago, ilang lenyap pulo kasado ameh sarato pitih nan tadi ado di pangkuan ambo. Ambo caliak jam di dindiang, alah pukua salapan pagi. Rasian malah kironyo.[] *Bogor, 7 Maret 2006 W.A.S.P. [email protected] http://groups.yahoo.com/group/urangawak -------------------------------------------------------------- Website: http://www.rantaunet.org ========================================================= Berhenti, berhenti sementara dan konfigurasi keanggotaan anda, silahkan ke: http://rantaunet.org/palanta-setting -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
