Assalaamu'alaikum wa rahmatullaahi wa barakaatuhu Ado carito tantang diri ambo saketek nan basangkuik jo masalah pangulu ko. Tahun 1993, katiko ambo baru pindah ka Jakarta, katiko itu pangulu kami nan bagala Datuak Bagindo masih hiduik, baliau batanyo ka ambo, lai amuah kamanakanda manggantian ambo jadi pangulu, tanyo baliau. Jauah hari sabalun itu, ditaun 1987 sabanano alah panah diusuakan calon pangganti baliau dek 'anak-kamanakan' dalam suatu musyawarah kaum, dan dapek anam urang calon nan rencanano kadipiliah dek nan tuo-tuo dalam pasukuan kami. Namun sasudah bajalan maso baganti taun rencanatu indak panah kunjuang dapek dilangsuangkan, indak ado kaputusan. Samantaro di antaro calon nan anam tu alah ado nan mandaulu.
Katiko mamak pangulu ambo batanyo tu ambo kana-an ka baliau tantangan calon-calon nan alah disapakaik-i anam taun sabalunno tu. Kecek baliau, indak mungkin itu ditaruih-an lai doh, itu sababno ambo batanyo ka kamanakanda, kecek baliau pulo. Tapi baa mangko ambo, ambo tanyoan pulo baliak. Jawaban baliau tantulah sarupo iklan jadino, sabab manuruik pandapek baliau ambo nan pantas diangkek jadi pangulu. Sasudah tajadi diskusi cukuik panjang katiko itu, malibaik-an baliau-baliau nan labiah tuo di dalam pasukuan kami, ambo mangecek-an amuah diangkek jadi pangulu pangganti baliau, kalau itu alah sabana kasapakatan anggota kaum. Jo kato lain musti dilakukan pamilu, dan calon musti bukan ambo surang. Usua amboko ditarimo baliau. Mako dilakukanlah pamilutu, malibaik-an sakitar 80 urang anggota kaum nan alah baligh. Dan rupono dalam pamilutu ambo mandapek suaro mayoritas mutlak. Tantu indak mungkin ambo mailak lai. Allah bakahandak tahun 1994 maningga baliau, pangulu kami Datuak Bagindo. Ado nan mausua katiko itu diumumkan sajo sakali ambo sabagai pangganti baliau. Tapi ado pulo nan bapandapek bahaso managak-an pangulu indak buliah dikarajoan sacaro tasambia sarupo itu. Paralu diadoan bana alek batagak pangulu. Dalam kami baragak-agak nak maadoan alek batagak pangulutu, tajadi kajadian gadang lain. Tabaka rumah gadang bagonjong kami di kampuang taun 1995. Sainggo takandalolah alek batagak pangulu tu sampai kini. Di partamuan kaum dalam bantuak arisan nan kami adoan tigo bulan sakali di Jakarta (anggota kaum kami 75% badomisili di Jabotabek, hanyo 5% nan tingga di kampuang), tatap juo ado usulan dari anggota kaum ko nak managak-an pangulu ko. Tapi ambo maajak baliau-baliau ko relistis sajo. Tanpa manyandang gala pangulu Datuak Bagindo, insya Allah ambo tatap juo jadi urang nan mareka jadian ka tampek barundiang baiyo batido. Sakadar kacarito sajo. Wassalamu'alaikum, Lembang Alam St. Lembang Alam __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
