Ass Wr Wb bapak Saafroedin Bahar yth
Aduh kalimpanan mato hanifah mambaco tulisan bapak nan hanifah birui di bawah
gon, apoli nan bamerah gan he he he.
Kalau basuo atau maota jo doktor iyo alah biaso noh, tapi maota eh badiskusi
jo BrigJend Walau alah Pur ... wah saumua umua baru kini baru. Alhamdulillah..
elok no nasib taraso eh.
Pak Saaf
Manuruik hanifah, disampiang indak punyo jejaring , nan mambuek awak taicia
dari urang lain (jawa) adolah indak namuah karajo kareh. Kalah ulet dari kawan
nan dari jawa. Sudahlah mereka kompak, ulet, santiang pulo lai, trus santun
kalau mereka di posisi bawah. Kalau indak santiang mako nan santiang
malinduangi.
Mungkin ndak jo konsep ABSSBK nan bapak impikan mampu marobah sikap dari
karajo surang jadi karajo basamo? dari pamaleh jadi suko bakarajo kareh?
Itu sen dulu tanyo hanifah, talabiah takurang mohon maaf
Wass
Hanifah Damanhuri
Tapi ado nan paralu ambo tambahkan ciek, yaitu latar belakang pendidikan dan
pangalaman ambo dalam bakarajo. S1 sampai S3 ambo adolah dalam ilmu sosial,
khususnyo dalam ilmu pamerantahan dan ilmu administrasi negara, di UGM
Yogyakarta. Ambo luluih nomor satu dalam Sekolah Staf dan Pimpinan
Addministrasi Interdepartemental tahun 1981. Sacaro pribadi ambo paminat ilmu
sejarah, tamasuak sejarah Minangkabau, sahinggo idola ambo adolah Prof Dr
Taufik Abdullah, nan banyak sakali mambuka mato ambo tantang ilmu sejarah dan
Minangkabau. Dalam dines, saluruah karir ambo adolah dalam TNI Angkatan Darat,
pangkek ambo terakhir Brigadir Jenderal Pur, dan ambo luluih nomor duo dalam
Sekolah Staf dan Komando ABRI Bagian Darat KR XVII tahun 1980 di Banduang.
Ambo manambah ilimu soal 'modernization and development' di Princeton
University, NJ, USA tahun 1973/74 dan tantang 'international human rights law'
di Oxford University, England, tahun 1997. Kini ambo masih maaja dalam Program
S2
UGM, di Lembaga Ketahanan Nasional (Lemhannas) , dan Sesparlu Departemen Luar
Negeri tantang Etnisitas dan Integrasi Nasional. Kini ambo juo manjadi
Komisioner Hak Masyarakat Hukum Adat pado Komisi Nasional Hak Asasi Manusia
(Komnas HAM), dan manjadi 'member' dari 'Advisory Group' dari 'The United
Nations Development Programme' (UNDP), 'Regional Initiative on Indigenous
Peoples Programme' (RIPP) di Bangkok. Sudah barang tantu saluruah pandidikan
dan pangalaman ambo tu mawaranoi pancaliakan ambo tantang Minangkabau, baiak
di Ranah maupun di Rantau.
Dalam ba-'minang-minang' [iko istilah pak Fasli Jalal], ambo ikuik mandirikan
Lembaga Kerapatan Adat Alam Minangkabau (LKAAM) dan manjadi Sekretaris Umum
salamo anam tahun (1966-1972) dan ikuik pulo mandirikan Gebu Minang, dan
manjadi Sekretaris Umum salamo 11 tahun pado Lembaga Gebu Minang (1990-2001),
dan 15 tahun pado Yayasan Gebu Minang. Dan terakhir, ambo jadi Ketua Dewan
Penasehat Gebu Minang, tahun 2005-2010.
Ringkasnyo, dalam mamandang Minangkabau, ambo indak baranti pado tingkek buah
paruik, suku, kaum, atau nagari, dan indak baranti tantang soal sako dan pusako
sajo, tapi lanjuik pado tingkek kabupaten/kota (nan iko ditulih dek Dunsanak Ir
Mohammad Zulfan Tadjoeddin, M.A. dalam buku ambo [2004] 'Masih Ada Harapan:
Posisi Sebuah Etnik Minoritas dalam Kehidupan Berbangsa dan Bernegara', Yayasan
Sepuluh Agustus, Jakarta), taruih ka tingkek Sumatera Barat, dan ka tingkek
Indonesia. Ambo juo indak baranti pada dongeng, kaba, dan mitos Minangkabau,
tapi ambo sigi kanyatoannyo dalam sejarah. Sasudah ambo ranuangkan bana-bana,
ambo sabana taheran-heran mancaliak banyaknyo inkonsistensi dan inkoherensi
dalam adat Minangkabau tu, walaupun ambo sangaik kagum jo kaarifan nan
takanduang dalam budaya Minangkabau [Adat adolah sabagian sajo dari budaya
Minangkabau, umumnyo bakisa jo soal sako dan pusako]. Tantang kaarifan budaya
Minangkabau, kudian ko ambo maraso mandapek banyak dari
tulisan-tulisan Dunsanak Dr. K. Suheimi. Untuak mambantu maluruihkan sagalo
inkonesistensi dan inkoherensi dalam adat Mianngkabau ko ambo takana ka pasan
almarhum Prof Dr Bahder Djohan, nan manyarankan agar didirikan Fakultas Sastra
di Sumatera Barat, nan kalau ambo indak salah kini alah ado di Universitas
Andalas. Kalau buliah ambo mausulkan, paralu didirikan pulo Fakultas Filsafat
atau Jurusan Filsafat pado Fakultas Sastra, supayo ado kader-kader mudo
Minangkabau nan dapek mambantu maluruihkan sagalo inskonsistensi dan
inkeherensi adat Minangkabau tu.
Pancaliakan ambo tantang Minangkabau akhir-akhir ko mangarucuik pado soal ABS
SBK, nan alah kito nyatokan sabagai 'jati diri Minangkabau'. Sasudah ambo
'lemparkan' masalah ko ka palanta, dan mandapek sambutan, tanyato memang ado
masalah dalam pamahaman dan pangamalan kito taradok ABS SBK ko. Manganai
masalah ko dalamilah kaluahan Ananda Rahima nan sacaro konsisten dari sagi
agamo Islam manunjuakkan bahaso memang ado masalah dalam pamahaman dan
pangamalan ABS SBK tu, nan paralu bana diluruihkan, baiak supayo konsisten dan
koheren jo niaik dan tekad kito baagamo Islam, maupun jo status kito sabagai
bangso Indonesia. Baitulah, ambo mancaliak urang awak itu indak sabagai suku
bangso nan tagak surang dan iduik dalam abad ka 17-18, tatapi sabagai salah
satu etnik dari 1.072 etnik nan ado di Indonesia dalam abad ka 21, nan bisa
ambo bandiang-bandiangkan jo suku bangso Indonesia lainnyo. Ambo ingin
mancaliak urang awak tu labiah konsisten dan labiah koheren dalam caronyo
bapikia dan batindak, jan sarupo nan acok ambo danga: 'angguak anggak, geleang
amuah, dalam duo tangah tigo, unjuak nan indak babarikan'. Dari sagi kahidupan
sosial ekonomi, salah satu tolok ukur nan ambo gunokan kini untuak maukua
kaadaan urang awak di ranah adolah 'Human Development Index' (HDI) nan alah
ditarimo dek negara kito. Tahun 2004 daulu ambo sato mamperkenalkan konsep HDI
ko ka pajabat-pajabat Sumatera Barat di Padang.
Ambo mancubo mamanfaatkan kasulurahan latar balakang pandidikan dan
pangalaman ambo itu untuak 'sato sakaki' mambangun Minangkabau dan Sumatera
Barat dalam bidang nan bisa ambo tangani. Syukur-syukur ado hasil dan
manfaatnyo di maso datang.
Itulah ringkasnyo, Ananda Hanifa.
Wassalam,
Saafroedin Bahar (70 th kurang).
---------------------------------
Want to be your own boss? Learn how on Yahoo! Small Business.
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
