Wa'alaikum salam ww, Kalo bak nantun janyo mamak, bia nak wak curai jo papahkan pulo asa usua namo kampuang awak.
"Batagak" Batagak adolah suatu nagari nan talatak ditangah-tangah antaro kaki Gunuang Marapi jo Gunuang Singgalang dalam daerah Kecamatan Sungai Pua nan dulunyo banamo Kacamatan Banuampu Sungai Pua (sabalun Banuampu jadi Kacamatan surang. Kanagariannyo maliputi daerah kaki Gunuang Singgalang. Nagari iko talatak diateh bukik (duo lambah) yaitu Lambah Labuah Sampik di dasar kaki Gunuang Singgalang nan disiko jalan Lintas Sumatra Padang Bukiktiggi juo ado jalan mak itam nan pakai gigi nan tadiri dari duo jinih gigi Basi jo gigi kayu) nan ciek lai di Lambah Sawah Subarang yaitu kaki Gunuang Marapi nan babateh jo Nagari Sariak - Sungai Pua. Lambah atau bagi kami lazim disabuik batang aia iko adolah marupokan satu patahan (istilah geologi)atau tanah karam nam mambantang mamutuih patamuan Gunuang Marapi jo Singgalang nan dalamnyo sakiro labiah kurang 30m, nan mangalia batang aia dibawahnyo nan lansuang dari Gunuang Marapi jo singgalang nan patamuan batang aia iko di daerah jambatan (pabatasan nagari Batagak jo Padang Laweh). Batang aia ikolah nan maaiai sawah-sawah jo tabek di nagari ko. Babaliak kito ka kaji samulo, baa mangko nagari iko dibari namo Batagak. Di nagari iko cukuik banyak batu nan memang tarajok dalam posisi tagak ado nan tingginyo 1 meter bahkan ado nan sampai 2 meter dengan kadalam rajoknyo sakiro 50 cm sajo bahkan ado nan kurang bagai. Tapi itu lah dek kuaso Allah nan batu itu lai ndak rabahnyo do. Ado ciek nan tingginyo sakiro 2 meter nan tatagak di simpang tangah lapang (lapangan bola kaki) nan tarakhir rabah sakiro awal tahun 90an. Kudian di tagakan baliak dek pamuda kampuang tapi posisinyo ndak sa mantap di posisi aslinyo. Ado ciek lai nan labiah tinggi kuaso Allah iko, ciek batu layah dengan tinggi 1.5 m leba 1 m dengan bantuah agak lonjong ka bulek itu posisinyo pas ditapi ngarai nan hanyo ditahan dek aka rumpuik saliguri. Tapi kini io awak mintak ma'af antah lai juo tagak batu nan ciek ko kini atau lah taban io ndak tau awak dek katiko katiko pulang kampuang dek sibuk manyapo urang urang kampuang jo mangana-ngana maso ketek-ketek io ndak taparatian diawak kaadaanyo batu iko sampai wak mangetik di milis iko. Jadi baitulah curito nan awak padapek wakatu ketek-ketek nan di padapek dari babarapo urang tuo nan versi caritonyo ampia samo bahasonyo asa namo nagari ko Batagak adalah barasa dari Batu Tagak. Sakitu dulu kok salah jo bananyo caritoko a io wallahu 'alam karano nan kito hanyo panyambuang carito pulo. Wassalam Batuduang Ameh (39) suku Koto -----Original Message----- From: [EMAIL PROTECTED] [mailto:[EMAIL PROTECTED] On Behalf Of syaukani yusup Sent: Wednesday, October 11, 2006 1:29 AM To: [email protected] Subject: [EMAIL PROTECTED] Asa usua namo Nagari. ...... Mintak sanak nanlainlo manyambuangnyo. Wassalam, Kani47 KL -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
