Assalamualaikum w.w.
Para dunsanak sapalanta,
Bak kato papatah, pucuak dicinto ulam tibo. Hari Rabaa tanggal 12 Oktober lalu,
ambo dapek tilpon dari Sdr Bisariyadi SH, surang staf dari Mahkamah Konstitusi,
maminta kasadioan ambo untuak sato dalam rombongan Mahkamah Konstitusi ka Tuk
Tuk di Pulau Samosir. Peran ambo sabagai nara sumber, basamo Hakim Konstitusi
Mararuar Siahaan SH dalam acara 'focus group discussion' nan maambiak tema:
'Partisipasi Masyarakat Hukum Adat Batak dalam Membantu Pembangunan Daerah
Kabupaten Samosir'.
Nan hadir 200 urang, tabagi dalam duo kalompok: Kalompok 1 mambahas Hak
Masayarakat Hukum Adat, dan Kalompok 2 mambahas Partisipasi Masayarakat Hukum
Adat Batak dalam Membantu Pembangunan Daerah Kabupaten Samosir'. Salain peserta
dari Pulau Samosir juo diundang peserta dari ampek kabupaten lain di sekitar
Danau Toba. Ambo dimintak duduak dalam Kalompok 2 basamo duo pakar hukum adat
Batak, yaitu Prof Dr Runtung Sitepu SH, dan Prof Dr. Muhammad Yamin SH, sarato
satu pakar investasi, Dr. Mahmud Siregar. Nampaknyo nan urang Minang di sinan
hanyo ambo surang.
Sudah tantu ambo sanang sakali, bukan sajo karano masalah masyarakat hukum adat
ko manjadi bidang ambo di Komnas HAM, tapi juo karano ambo ingin tahu baa mako
urang Batak ko nampaknyo jauah labiah dinamis dan labiah maju dari urang awak.
Sabalun ko ambo alah mambaco babarapo buku tantang masyarakat hukum adat Batak
ko, antaro lain dari Vergouwen, Bungaran Simanjuntak, Usman Pellly [iko untuak
Mandailiang], dan disertasi Sulistyowati Irianto [tantang perlawanan padusi
Batak taradok disikriminasi dalam adat Batak]. Sabalun iko ambo paranah
manarimo pangaduan kaduo balah pihak nan sadang bakonflik dalam Huria Kristen
Batak Protestan (HKBP). Dahulu tahun 1970an ambo alah mambaco sacaro mandalam
buku Ir Mangaraja Onggang Parlindungan nan bajudul : "Pongkinangongolan
Sinambela gelar Tuanku Rao'. Jadi ambo ado juo baka informasi tantang Batak
sabalun barangkek ka Pulau Samosir nan manuruik dongeng Batak manjadi daerah
asa saluruah urang Batak. Barikuik ko babarapo 'oleh-oleh'
singkek padek untuak para dunsanak sapalanta.
1. Partisipasi Masyarakat Hukum Adat Batak dalam Membantu Pembangunan Daerah.
Saparati juo di nagari kito, masyarakat hukum adat Batak juo indak namuah
manjua tanah ulayat mareka. Ambo satuju jo pandirian tu, dan manyampaikan saran
bahaso ado format lain nan bisa ditampuah untuak pambangunan daerah, saparati
bagi hasil, sewo manyewo, atau penyertaan modal dalam investasi. Saran ambo ko
disatujui dek tigo pakar Batak nan hadir. Saran iko juo ditanggapi positif dek
para hadirin, dan maminta agar sagalo rencana investasi dijalehkan dulu sacaro
taruih tarang ka pimpinan masyarakat adat. 'Jangan ada dusta di antara kita'
kata mereka, sasui juo bait sabuah lagu pop. Ambo jalehkan bahaso parmintaan
para tokoh adat batak tu sasuai jo asas 'free and informed consent' nan dianuik
dek hukum internasional hak asasi manusia.
2. Pambantuakan Pusat Studi Masyarakat Hukum Adat.
Kapado prof Dr. Runtung Sitepu SH nan juo manjadi Dekan Falutas Hukum USU
ambo sarankan untuak mambantuak Pusat Studi Masyarakat Hukum Adat, nan
salanjuinyo bisa bamitra jo ambo di Komnas HAM dalam manangani masalah-masalah
nan takaik jo hak masyarakat hukum adat. Saran ambo ko langsug ditarimo baliau,
dan dalam minggu ko juo akan tagak, karano pambantukan Pusat Studi cukuik jo SK
Dekan, yaitu baliau sandiri. Kapado baliau juo ambo jalehkan bahaso ambo
tatarik untuak mangadokan studi pabandiangan antara masyarakat hukum adat Batak
jo masyarakat hukum adat Minangkabau. nan salamo ko alah ambo utak-atik juo.
3. Saran ambo agar padusi dihormati dalam adat Batak dan dalam masyarakat
hukum adat Batak.
Saparati kito katahui, posisi padusi sabana randah dalam adat Batak. Mereka
tu hanyo dianggap sabagai 'komoditi' dari urang tuo atau dari suaminyo. Padusi
indak mandapek hak waris, sahinggo kadang-kadang sabana sadiah kito mambaco
nasib para jando. Namun padusi Batak indak ilang aka. Dalam disertasi Dr
Sulistyowati Irianto dijalehkan bahaso padusi Batak mamperjuangkan hak-haknyo
malalui pengadilan negeri, dan biasonyo mereka manang.
Kapado para tokoh Batak nan ado ambo jalehkan bahaso hak padusi sacaro
manyaluruah dilinduangi dek NKRI, khususnyo dalam Undang-undang Nomor 39 Tahun
1999 Tantang Hak Asasi Manusia. Karano tu ambo sarankan agar diadokan
modifikasi saparalunyo dalam norma adat Batak, supayo jan batantangan jo hukum
positif nasional. Wakatu tu alun ado nan langsuang manyatujui atau manantang.
Dari aia muko mareka nampak di ambo mareka lai bapikia, karano kan indak mudah
sajo maubah-ubah adat. Ambo mangarati, dan kapado Ibu Gulyom nan maajukan
partanyaan soal padusi ko ambo agiahkan satu copy Undang-undang Nomor 39 Tahun
1999 tu..
Rancaknyo, walaupun alun ado parubahan sacaro rasmi dalam adat Batak,
tanyato masyarakat hukum adat Batak alah maagiah tampek nan samakin tahormat
kapado kaum padusi. Prof Dr Runtung Sirepu SH banyak maagiah contoh, saparati
di daerah Karo padusi alah diagiah warisan, kalau bacarai atau ditingga mati
suami dapek samacam harato gono-gini. Kini dimuko rumah, plank namo indak sajo
mancantumkan namo suami, tapi juo namo 'boru' dari nan padusi.
Dalam hubuangan ko agar ado kapastian hjukum ambo sarankan agar hukum adat
Batak nan indak tatulih tu sugiro dikumpuakan dan ditulih. Usul ambo ko
disambuik baik dek Prof Dr Runting Sitepu, SH.
4. Tantang motivasi urang Batak.
Mungkin paralu juo ambo sampaikan baa mako urang Batak sacaro manyaluruah
labih dinamis dari urang awak. Salah satu katarangan nan ambo padapek adolah
ajaran adat urang Batak, bahaso mancari kakayaan itu wajib hukumnyo, untuak
mandirikan apo nan dinamokan 'sahala harajoan', atau 'kerajaan pribadi'. Di ma
mereka datang, tanah dahulu nan dicari, sabagai pangkalan. Di kalangan urang
Batak indak ado tradisi 'pulang basamo'. Dalam lagu Nahum Situmorang diajakan
bahaso urang Batak baru pulang kalau alah mati. Itu sababnyo di tanah Batak tu
panuah dek tugu-tugu kuburan.Di pulau Samosir hal iko juo tajadi, sahinggo
rencana mambuek palabuhan kapa tabang susah diwujudkan karano dima-dima panuah
tugu kuburan. Ado rencana Bupati Simbolon untuak mambuek samacam pakuburan
umum, supayo ado lahan laweh untuk pembangunan daerah.
5. Soal pabedaan agamo.
Tagalitik juo ambo batanyo ka tokoh-tokoh Batak tantang masalah parbedaan
agamo. sabab hampia indak paranah ambo mandanga sangketa soal beda agamo
dikalangan urang Batak, sarupo nan tajadi di Maluku atau di Sulawesi Tengah.
Nampaknyo masalah agamo ko alah salasai di kalangan urang Batak. Walaupun ado
babeda agamo di antaro mareka, indak sajo antaro ampek puak Batak, tapi juo
dalam satu keluarga atau marga nan samo, masalah tu disalasaikan sacaro adat
Batak, nan intinyo adolah sistem kakarabatan 'dalihan na tolu'.Artinyo, dalam
masalah kamasyarakatan, adat Batak 'dalihan na tolu' labiah mangamuko dari
agamo nan dipaluak surang-surang.
Iyo agak tamanuang ambo mandanga tu, tautamo dalam kaitan jo ABS SBK kito nan
nampaknyo masih dalam angan-angan dan alun jaleh baa ujuang pangkanyo. Balain
jo urang Batak nan struktur sosialnyo sabana kukuh, struktur sosial urang awak
kan bapetai-petai, sahinggo mustahil bisa bakarajo samo, bak kato pak Datul St
Parapatiah. Syukurnyo, masalah sistem kakarabatan ko dalam palanta ko alah
mulai kito bahas, dan nampak-nampaknyo alah mulai ado titiak pasamoan pandapek.
Saparati nan paranah ambo tulih dahulu, kalau karajo ambo alah agak lungga di
Komnas HAM, ambo ingin mangadokan sacamam Seminar ABS SBK ko dalam kaitan jo
Gebu Minang.
Sampai di siko lah dulu para dunsanak, lain kali kito sambuang.
Wassalam,
Saafroedin Bahar (70 th kurang).
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
