Mak Ban sarato Rang Lapau nan Basamo,
Dek ado nan batanyo tantang Mandeh Rubyah, takana dek ambo Angku Masdar nan
Anggota Lapau kito nan lah lamo indak ka Lapau. Di Lapau ko Angku Masdar
bagala Tan Gala Mainda. Tan Gala Mainda banyak manulih nan rancak-rancak
untuak kito basamo. Di maa lah Angku Masdar kini, ambo indak dapek bajalua
paribadi bagai lah lamo bana.
Iko postiang Tan Gala mainda salapan tahun nan lalu di Lapau.
Salam,
-- MakNgah
Date: Tue, 5 Aug 1997 19:23:36 -0500 (CDT)
From: Masdar <[EMAIL PROTECTED]>
To: [EMAIL PROTECTED]
Subject: bakuliliang nagari bundo
SERIAL BAKULILIANG NAGARI BUNDO
MAKAM MANDEH RUBIYAH
ado ratok pasisia nan labiah kurang kalimaiknyo coiko ha;
apolah guno tumik
tumik sipak bulakang
iyo sabana karumik
awak kasawah inyo kaladang
apolah guno abuak
abuak rajo diateh
baa indak kamabuak
masak nasinyo sabana kareheheheh
sahinggo ambo buek pulo pantun nan kalamak diambo surang'
apolah guno paruik
hala jo haram ditampuangnyo
kalau sanak nak kasilauik
singgah sabanta di indropuro
mak sati manjua maco
saganggam limo rupiah
manga ka indropuro
mancaliak makam mandeh rubiyah
bapantun kabapantun juo,
ndak kakanyang bagai wak deknyo doh...
Makam mandeh rubiyah ko talataknyo di daerah Indropuro
(kalau sanak jo biyai alun tau, kito barangkek dari Padang
menuju arah ka Tapan, kabupaten Pasisia Selatan, kiro-kiro
saratuih ampek puluahan kilo dari Padang, kalau ndak salah...
Kok labiahnyo labiah satampok, kok kurangnyo kurang
satampok pulo)
Dek rute sakaliko lumayan jauah,....tapaso mbo tanyo bana
salero siUjang dulu, apo karengkangnyo masih malawan...?
"Jang,....den ari akaik muko nak ka Indropuro, pai ang?"
cek mbo
"jo pesawat jet awak ko?" nyo todong mbo
nan nyo mungkasuik "pesawat jet" tu adolah onda tuo kami tu,
tuan....,
"ciek ko kudo awak nyoh Jang, baa?"
"Indak baa doh, cuma bara jaraknyo dari Padang?" tanyo Ujang
"sekitar tangah duo ratuih kilo...." jawek mbo
"lai indak ka tagarajai-garajai kudo wak beko?"
manyanggah Ujang mungkin
"baa mungkasuik wang Jang?"
"Ado nan mbo cameh-an,...kok tagalece sarawa kudoko dijalan....
Tangga bauiknyo ciek-ciek, kan bagarebeh tebeh jadinyo
onda wak...!"
mamprotes Ujangko nampaknyo
"jadi, baa nan katuju dek ang?" cek mbo
"kok naiak oto wak baa nyoh?" mausul nyo
"usulan waang diarsipkan dulu untuak dipertimbangkan
manjalang ari akaik ko..."
Pakai gaya bahasa antah dari maaa pulo dapek dek ambo.......
"caro awak se lah-eh....!" mancimeeh nyo
"bahaso langik den tadanga dek waang?" takareh suaro mbo,
sirah muko mbo mungkin, wakatu mangecek-an kalaimaik tadi
Heptah!
Ari akaik lah tibo, dan ambo mamutuih-an untuak
pai ka Indropuro naiak oto sajo
dari pado tangga roda onda ciek-ciek dijalan.....
Labiah elok duduak batonggok alias batenggek diateh oto,
kok untuang lai kamujua, nan katuju diawak bana
nan duduak disampiang awak (dima tau...) titik titik,
Nan jaleh awak bisa lalok diateh oto, manjalang
tampek mandeh rubiah dimakamkan
Bagageh kito saketek,...
Awak barangkek dari Padang
Oto lah bajalan, bunguih lah balampaui
alah mandaki oto babelok-belok
lah tibo disibingkeh
sibingkeh jalan mandaki
simpang ampek dimuaro
usah cameh adiak mananti
uda nan jauah kapulang juo
(malagu pulo awak baliak....!)
Lewaik sibingkeh saketek, ruponyo ambo talalok,
samantaro oto bajalan taruih,
lah lewaik sajo di siguntua tuo, siguntua mudo,
babelok-belok sampai ka pasa Tarusan
Pasa Tarusan balewaik-i sajo,
jalan bakelok-kelok juo,
dendang pasisia majadi buah mimpi,
bacampua jo bunyi karuah,
salido tabao rendong...
oto lah sampai di Painan
Ngomong-ngomong satantangan kota Painan,
ikolah kota nan dikuruang bukik
kalau kota nak dipalaweh, tapaso mamanjek bukik
atau malantai lauik, ....
Bukik nan manguliliangi Painan ko bantuak cincin,
bagian kota nan indak babukik, cuma arah katapi lauik,
Salido nan jaraknyo cuma sakilo duo kilo dari Painan
dibateh pulo dek bukik
(Priit, ngomong-ngomong tantang Painan lah cukuik...)
Oto nan kami tumpangi, baranti sabanta di terminal Painan
sasudah tu perjalanan dulanjuik-an pulo
(supayo indak banyak gorema....) Curito dipasingkek,...
carocok tinggalah dulu,
kelok labi jo gigi duo
oto malenggok ditapi pantai
lah sampai awak di Indropuro
lah lewaik awak jambatan panjang Indropuro,
sasudah tu lah sampai pulo awak di Simpang Tigo,
ijan taruih sajo.....sampai wak ka Tapan beko,
tapi awak belok kanan,
dek kami manumpang oto umum, tapaso turun
disimpang tigo sasudah jambatan Indropuro ko,
"litak bana mbo da...." kecek Ujang
Nasi nan takana dek adiak mbo....
lah jaleh nak mintak makan nyo tu....
(mungkasuiknyo "litak" tu "lapa"....)
"yo,... makan wak lai,
cuma, sabalun awak makan,
layangkanlah pandangan waang maikuik-i jalan kakanan ko,....
Ikonyo jalan ka makam mandek rubiah tu...!" kecek mbo
"iiiyyyo,...beko lah bacurito tu!, makan wak lai...!"
Jariah se ambo bacurito nyoh ncu,
bacurito kek urang lapa,
siUjang palitak,
kambuik nasi.....
Kami taruih bajalan kaki pai ka rumah makan
disabalah kida kami, indak jauah doh
dari simpang tigo tampek kami turun oto ko
(indak mambao nasi bungkuih kami doh biyai,....
disiko kito bisa makan jo gulai ikan, segar...
bajariang bagai,...)
Sasudah makan, ambo jo Ujang malanjuik-an
jalan kaki ka tampek makam mandeh rubiyah
dek untuang kamujua bana....
kabatulan ado pulo urang lain nan saniaik jo kami
nak mancaliak makam mandeh rubiyah pulo,
mako kito dapek kawan maota...
maota sambia bajalan kaki manuju makam nantun,
dek lamak ota dijalan, indak taraso
lah panjang jalan ditampuah
lah sampai awak dimakam mandeh rubiyah
"ikonyo makam mandeh rubiyah tu da?" tanyo ujang,
"baa gak ti?"
"gak ti mbo, iyo...hehehe"
lah pandai si Ujang galak,
dek paruiknyo lah barisi....
dek awak lah sampai katujuan,
tapaso bantiang itam putiah kutiak
ari ujan tanah babiak,
kok dicuritokan sia sabananyo mandeh rubiyah,
kok dibaco pulo tambo lamo pusako usang,
basejarah pulo kito jadinyo,
panjang amek curito kito,
jadilah sakadar iko lah daulu,
camuaklah sia nak bacurito....
Samantaro sagitu sajolah daulu,
kok umua lai samo panjang,
insya Allah basuo kito baliak,
di daerah pariwisata nan lain pulo.
tantu sajo......... tanpa kacobong kamera
--Sjamsir Sjarif
X___________________________________________Sjamsir Sjarif
Indonesian Translator, Interpreter, and Cultural Consultant
335 Gault St. #1, Santa Cruz, CA 95062, USA
Email: [EMAIL PROTECTED] Tel. (831)-426-1333 Fax (831)426-8907
http://www.usindo.net/hambo
Member of:
ATA, American Translators Association http://www.atanet.org/
NCTA, Northern California Translators Association http://www.ncta.org/
IPA, Indonesian Professional Association http://www.ipanet.org/
=======================================================
No virus found in this outgoing message.
Checked by AVG Free Edition.
Version: 7.1.408 / Virus Database: 268.13.9/490 - Release Date: 10/20/2006
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK SELALU DIPERHATIKAN:
- Hapus footer dan bagian yang tidak perlu, jika melakukan reply.
- Posting email, DITOLAK atau DIMODERASI oleh system, jika:
1. Email ukuran besar dari >100KB.
2. Email dengan attachment.
3. Email dikirim untuk banyak penerima.
================================================
