17avels Dis da litteratura a Domat Communicaziun a las medias
17avels Dis da litteratura: 9 – 11 da november 2007 Concurrenza Premi Term Bel: Inoltraziun da texts enfin ils 31 da fanadur Ils 17avels Dis da litteratura a Domat han lieu dals 9 als 11 da november. In dals puncts culminants è la concurrenza litterara Premi Term Bel – quest onn dentant in pau en in auter modus e cun in auter premi. Texts per la concurrenza èn d’inoltrar enfin la fin fanadur. Il cudesch stat en il center dals Dis da litteratura 2007 – il cudesch sco tal, sco object estetic e sensual. Sper discussiuns davart il cudesch vegnan er quest onn preschentadas a Domat novas publicaziuns or dal mund litterar rumantsch. Ma in dals puncts culminants è franc puspè la concurrenza litterara. Quella vegn dentant manada tras in zic auter che usità. Er quest onn pon ins inoltrar texts per la concurrenza litterara Premi Term Bel. Tut ils texts inoltrads vegnan suttamess anonimamain ad ina giuria da tschintg persunas. Quella selecziunescha maximalmain tschintg texts che vegnan nominads per Domat. Mintga text nominà sto chattar en l'emprima giuria almain in padrin – ina persuna che al defenda. L'emprima giuria decida er, sche la concurrenza vegn insumma manada tras u betg. Ils texts nominads vegnan prelegids anonimamain durant ils Dis da litteratura a Domat. Avant ch'ina segunda giuria discuta en public mintga text, vegn anc il padrin / la madritscha dal text en funcziun cun ina curta laudatio a “ses“ text. L'organisaziun dals Dis da litteratura vul quest onn surdar in premi en in'autra furma, numnadamain sco stipendi. L'auturA dal text victur retschaiva in stipendi per pudair sa deditgar durant in tschert temp pli intensivamain al scriver. Il stipendi ha ina valur da 4'000 francs e vegn purtà dal Cumin burgais da Domat. Quest onn na datti betg in premi dal public; il public obtegn dentant ina vusch en la decisiun per il Premi Term Bel. Cundiziuns: Ils texts ston esser scrits en rumantsch, en furma da prosa, nunpublitgads e d’ina lunghezza da maximalmain trais paginas (ca. 9’000 segns). Ils texts èn d’inoltrar enfin ils 31 da fanadur 2007 a: Silvana Derungs, Hauptstrasse 117, 1715 Alterswil; [EMAIL PROTECTED] _______________________________________________ Damai che POSTA RUMANTSCHA è ina rait averta per tuts, na ston las opiniuns dals auturs betg correspunder a la posiziun da la GiuRu! Per scriver a tut ils commembers da la glista scriva a: [EMAIL PROTECTED] www.posta.giuru.ch
