Preziadas damas, stimai signurs Sper las presentaziuns dall'opra Macbeth da Giuseppe Verdi, presenta opera viva era differents concerts duront questa stad.
Dumengia, ils 5 d'uost ha liug igl avonmiezdi allas 10.45 uras in concert da Matinee cun la sopranista Bettina Herrmann da Sursaissa, Katalin Gémes, mezzosopran, e cun igl orchestra Giuseppe Verdi. Sut l'egida da Gion Gieri Tuor porscha l'opera viva in bi matg da melodias. Sonda, ils 11 d'uost ha liug allas 20.30 uras in concert sinfonic. Johanna Scherer ed igl indigen Gieri Maissen da Trun ein al clavazin e sunan il concert per dus clavazins ed orchester da Francis Poulenc. Sut la bitgetta da Gion Gieri Tuor vegn gl'Orchestra Giuseppe Verdi era ad interpretar ils "Bündner Tänze op.174" (nach alten Motiven und Rezepten) per orchester dil cumponist grischun Gion Antoni Derungs sco era la sinfonia nr.9 en e-moll "Aus der neuen Welt" da Antonín Dvořák. L'opera Macbeth da Giuseppe Verdi vegn menada si dils 28 da fenadur entochen ils 14 d'uost 2012 ella tenda da "Das Zelt" a Sursaissa, per l'emprema gada a Misanenga. Cun igl coro opera viva, il qual secumpona da canturas e cantadurs indigens, ed igl Orchestra Giuseppe Verdi, vegn il menader artistic Gion Gieri Tuor a saver entusiasmar il publicum cun l'opera da Verdi. René Schnoz, igl actur oriund da Mustér, meina la reschia. Il maletg da tribuna creescha igl artist indigen Rudolf Mirer. Ulteriuras informaziuns davart ils concerts e l'opera anfleis Vus sut <http://www.operaviva.ch> www.operaviva.ch. Leu saveis Vus era reservar ils plazs giavischai. Suenter paucs dis vegnis Vus a survegnir ils tickets per posta. Vossa viseta fa plascher. Per arranschaments (tickets cun tscheina ella tenda) fagei aschi bien e contactei il biro d'informaziun da Sursaissa, numera da telefon 081 933 15 16. Nus giavischein a Vus in bi temps e selegrein sin nunemblideivlas inscenaziuns da Macbeth en Surselva. Cordials salids opera viva OBERSAXEN
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
