Ils 24avels Dis da litteratura èn RETRO!
Sut il motto „Retro-Rumantsch“ porschan ils Dis da litteratura a Domat discussiuns spiertusas, vernissaschas multimedialas e musica armoniusa – in divertiment per giuven e vegl.
Ils 24avels Dis da litteratura preschentan litteratura dad oz e dad ier en il discurs davart «nostalgia ed actualitad». Els han lieu da venderdi, ils 7.11, fin dumengia, ils 9.11. en la halla polivalenta Tircal a Domat.
Il venderdi saira envidan Michel Decurtins e Sabrina Bundi a la vernissascha da l'emprim e-comic rumantsch «Il Crestomat».
La sonda e la dumengia datti prelecziuns da cudeschs actuals e vernissaschas da novas publicaziuns cun discussiuns interessantas davart il «retro» en la litteratura rumantscha, tranter auter cun Esther Krättli e ses giasts dal tavulin litterar, Mevina Puorger ed auters.
Quest onn è danovamain l'onn da la concurrenza da scriver «Premi Term Bel». Sonda suentermezdi tranter las 14 e las 16 uras preschentan il 5 nominads lur texts. Silsuenter vegnan quels analisads e discutads publicamain da la giuria e premiads la dumengia. Sco finiziun dal suentermezdi envida Otmar Seiler al studio litterar da la Televisiun rumantscha.
La sonda saira stat ina dumonda en il center: tge capita, sche musica, litteratura e clowneria s'inscuntran? L'autur Daniel Mezger, l'actur Roberto Chiriatti ed il trio da jazz Rosset Meyer Geiger vegnan a sclerir cun in concert litterar-clownesc.
La dumengia cumenza cun il purtret d'ina generaziun en Surselva da Cornelia Vinzens. Suenter la prelecziun dad Attilio Bivetti e la preschentaziun da la Chasa Paterna 132 cun Annalea Stuppan surdà Theo Haas il Premi Term Bel. La premiaziun vegn enramada dal chor d'affons Surselva sut la batgetta da Rilana Cadruvi.
Al Retro-Brunch dal suentermezdi èn tuts cordialmain bainvegnids!
Ils 24avels Dis da litteratura, dals 7 als 9 da november 2014 en la halla polivalenta Tircal a Domat. Detagls e program sin www.litteraturarumantscha.ch.
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
