Comunicaziun a las medias
Marco Laurent surpigia a partir dal schner 2017 la falegnamaria cun richa tradiziun dad Andri Taverna a Sent. Per ün dals impressaris ün sömmi, per tschel ün cas da furtüna. Fingià da mat vulaiva Marco Laurent dvantar falegnam. Dit e fat. L’hom da 42 ons ha imprais seis manster da suotsü ed ha ramassà passa 20 ons experienza in differentas falegnamarias. A partir dal schner 2017 es el seis agen patrun – illa falegnamaria Laurent a Sent. L’impressari giuven ed ambiziunà voul, insembel cun sia squadra, „far glüschir darcheu ün diamant crü“. Managià es cun quai la falegnamaria Taverna, üna gestiun da famiglia cun richa tradiziun, manada dad Andri Taverna chi d’eira in tschercha d’ün successur per l’intrapraisa. Ils duos falegnams Laurent e Taverna s’han imprais a cugnuoscher per cas in occasiun d’üna visita pro üna cuntschainta. Els han cumanzà a baderlar davart il hobi cumünaivel – la chatscha – e davart fats professiunals. La chemia d’eira güsta da principi davent. Fiduzcha vicendaivla ed üna gronda purziun simpatia han contribui amo il rest. Ideas creativas per mobiglia Laurent voul manar inavant la gestiun suot seis nom: Falegnamaria Laurent. El bricla d’ideas ed ha gronds plans. Seis servezzans muossan che ch’el po e voul: Bella mobiglia our da lain engiadinais per chadafö, stüva e bogn sco eir accessoris originals sco p. ex. las ziplas da dschember pels sachins da dschember da Sgrafits Engiadinais – üna lingia da prodots chi vain creada da sia duonna Heidi ed es in vendita in sia Butia Schlerin Café creativ a Sent. Ultra da quai experimentscha Marco Laurent vi d’ün’aigna creaziun da mobiglia sainza scrauvs e guottas – tecnicas classicas da colliar il lain tenor las reglas veglias da l’artischanadi. Simpel e plain ideas a listess mumaint. Squadra cun experienza Andri Taverna güda a Marco Laurent cun pled e fat. L’impressari cun experienza vaiva surtut la gestiun cun seis frar da seis bap ed han manà la firma daspö l’on 1978. Ils Sentiners han fabrichà oura cun success la falegnamaria: dal 1981 es gnüda agiunta üna halla da 400 meters quadrats cun parc da maschinas; ses ons plü tard han els realisà ün edifizi da büro supplementar.Cur cha Johann Otto Taverna es i in pensiun dal 2010, ha manà Andri l’impraisa. „Per mai es Marco ün cas da furtüna“, disch Taverna chi’d ha 60 ons. „El maina nouv schlantsch ill’intrapraisa – eu til giavüsch bler success. A listess mumaint lessa ingrazchar als cliaints ed architects, culs quals eu n’ha das-chü collavurar ons a la lunga. Els saran servits bain da Marco“, da quai es Taverna persvas. Marco Laurent po eir far quint cun l’experienza d’ün collavuratur da blers ons da l’intrapraisa Taverna. Josef Plangger es daspö passa 36 ons da la partida e cugnuoscha fich bain la falegnamaria. I’s po s’allegrar da la cuntinuaziun da quist’istorgia. Cordials salüds Falegnamaria Laurent SA Marco Laurent Tuols 542 7554 Sent Tel. 081 864 01 22 www.laurentsa-sent.ch
<<attachment: Heidi.vcf>>
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
