Preziads abunents da la posta rumantscha
Gugent fetscha attent en il num da la suprastanza sin trais occurenzas da la GiuRu questa primavaira. Has gia survegnì il fegliet cun tut ils events dal 2020 <https://www.flipsnack.com/giuru/giuru-yen-events-2020.html>? Interessads per in ulteriur project intercultural pon gugent scriver a nus e dar part che els avessan tschaffen: *GiuRu: Radunanza e lavuratori, 21 da mars 2020 * La suprastanza envida cordialmain a la 29avla radunanza generala da la GiuRu. Quella ha lieu sonda saira, ils *21 da mars 2020* en il Surmir en las localitads da la scrinaria Uffer SA en vischinanza da la fermada *Savognin, posta*. La radunanza cumenza a las 15:30 e cuzza in’ura. Ils custs da viadi surpiglia la GiuRu. Nus preparain questa radunanza en collavuraziun cun la SRG.R che offrescha in apero ed organisescha in lavuratori che suonda la radunanza da la GiuRu. Per savair co ins recepescha il service public, tge ch’ins spetga da la SRG e co quella po meglierar sia purschida ha la SRG.R l’incumbensa d'approfundar set temas ch’èn sa resultads da retschertgas fatgas online. Tranter auter vul la SRG savair, co els pon en il futur cuntanscher ed involver meglier giuvenils. L'invit as chatta qua <https://www.giuru.ch/wp-content/uploads/2016/07/invit_rg_giuru.pdf> per telechargiar. Sin nossa pagina as chatta era il protocol dal on 2019 <https://www.giuru.ch/wp-content/uploads/2016/07/protocol_radunanza_generela_2019.pdf>. Per in intermezzo cultural procura RTR cun perlas ord l'archiv. *YEN: Clom per participant*s emna culturala, 3 - 9 d'avrigl 2020* T'annunzia ussa tar nus sche ti has veglia da visitar la minoritad tudestga en Dinamarca questa primavaira! La registraziun per l'emna culturala es averta <http://www.yeni.org/2020/02/27/its-time-to-register-for-the-easter-seminar-2020-you-have-until-the-15th-of-march/> fin ils *15 da mars 2020*. Da la partida es era la chantadura Fiona Cavegn che sa participescha al LIET International 2020 festival che ha lieu quest onn tar els. Ils participants visitan il final sonda saira. Trais rumantschas èn gia da la partida a Apenrade cunquai che ellas han posts tar la YEN. La delegaziun da la GiuRu po dentant anc trametter *dus fin trais giuvenils*, cunzunt era per represchentar la Rumantschia a l'*assamblea generala*. Faschess grond plaschair. Ils custs da l'entira emna èn cun mo 100 francs ed insatge regalins fitg bass cunquai che la YEN e la GiuRu surpiglian ils custs da viadi. *GiuRu: Scuntradas cumadaivlas 2020* Il mument èn las scuntradas cumadaivlas a *Turitg ed a Berna* pausadas. Sa radunar en las citads na para betg ideal en questa situaziun. Nus envidain dentant gugent interessads da vegnir a la radunanza a Savognin, averta per il public interessà. Las scuntradas vegnan ad avair lieu uschè spert che la situaziun sa calma. La sentupada cumadaivla è in inscunter patgific avert *per tut la giuventetgna rumantscha* che ha lieu ina giada per stagiun a Turitg ed a Berna en in café central. La GiuRu organisescha l'entupada in lavurdi vers las sis e paja a tuts l'emprima runda. La proxima data vegn communitgada via ils meds socials. Cordial invit Uolf Candrian -- President da la GiuRu Giuventetgna Rumantscha Hohenbühlweg 4 7000 Cuira www.giuru.ch [email protected] <[email protected]> <[email protected]>
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
