Charas e chars, stimadas e preziads Ils Dis da litteratura pon festivar quest onn il giebileum da 30 onns.
Il palc a Domat è daventà in lieu d’animaziun, da barat e da scuverta. Ina rolla centrala gioga la concurrenza litterara Premi Term Bel, sponsurà da la Vischnanca burgaisa da Domat. Suenter in onn pausa èsi quest onn puspè uschè lunsch: il Premi Term Bel turna als Dis da litteratura che han lieu dals 6 fin ils 8 da november 2020 en halla Tircal a Domat. Scrivai, scrivai e tramettai voss texts fin ils 16 d’avust 2020 al comité d’organisaziun. Return al vegl andament. Suenter che l’andament ha varià in pau en il 2018 è il comité d’organisaziun sa decis da turnar per l’ediziun da giubielum dals Dis da litteratura al vegl andament che s’orientescha al model da Klagenfurt: ina pregiuria selecziunescha ils texts inoltrads ed ils 5 finalists vegnan prelegids e discutads publicamain als Dis da litteratura che han lieu dals 6 fin ils 8 da november 2020 a Domat. Il nov vegl andament drizza il focus puspè dapli sin las auturas ed ils auturs che pon preleger sez lur texts en il final. Il Premi Term Bel vegn sponsurà da la Vischnanca burgaisa da Domat ed è dotà cun CHF 3’000.– per il text victur da la giuria e cun CHF 1’500.– per il favurit dal public. Cundiziuns La concurrenza sa drizza a tuttas e tuts che scrivan gugent e han gust da sa preschentar sin il palc a Domat. Ils text ston esser per rumantsch (idioms u rumantsch grischun), en prosa, nunpublitgads e d’ina lunghezza maximala da 6’000 segns (incl. vids). Scrivai, scrivai e tramettai voss texts fin ils 16 d’avust 2020 al comité d’orgnaisaziun: [email protected]. Dapli infurmaziuns davart l’ediziun da giubileum chatt’ins sin nossa pagina d’internet www.disdalitteratura.ch ni sin facebook. Chars salids, il comité d’organisaziun dals Dis da litteratura
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
