Noda la data - Save the date Traversadas litteraras ils 7 da matg 2022, 10.30 - 16.30 en la Chasa da la translaziun Looren
Bundant quatter onns suenter l'emprima gronda dieta da las «Traversadas litteraras» envidan la Lia Rumantscha e la Chasa da la translaziun Looren las acturas ed ils acturs da la scena da litteratura rumantscha e tut las persunas interessadas danovamain ad in inscunter. Ils 7 da matg 2022 vulain nus discutar cun Vus en la Chasa da la translaziun Looren davart il stadi actual da la litteratura rumantscha. Tge han ins cuntanschì ils ultims onns? Tge ideas novas datti per il scriver, translatar e publitgar en rumantsch? Co cuntanscha la litteratura rumantscha sias lecturas e ses lecturs? Tge pretensiuns vegnan fatgas a la promoziun? Co funcziuna quai en las autras «linguas pitschnas»? Tge rolla giogan il translatar e la plurilinguitad? Nus discutain tranter auter cun las auturas Flurina Badel e Jessica Zuan, cun Rico Valär, professer extraordinari per la litteratura e cultura rumantscha, cun Walter Rosselli, represchentant da l'ULR, cun Reina Gehrig, manadra da la partiziun litteratura da Pro Helvetia, e cun Karin Kohler, responsabla per ils cudeschs d'uffants e giuvenils da la Chasa Editura Rumantscha. Ultra da las debattas udin e legiain nus litteratura rumantscha. Datti dumondas u temas concrets ch'As occupan? Ans scrivai fin ils 17 da schaner 2022. Il program definitiv publitgain nus il mars 2022. Nudai per plaschair gia uss ils 7 da matg 2022 en Voss chalender! Nus ans legrain d'ans inscuntrar e d'ans barattar cun Vus. Amiaivels salids Lia Rumantscha per nossa lingua Via da la Plessur 47 | 7001 Cuira telefon +41 (0)81 258 32 22 | e-mail: [email protected]<mailto:[email protected]> www.liarumantscha.ch<http://www.liarumantscha.ch/>
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
