Acabo de poñer en http://trasno.net/mozilla/ a traducción ao galego de
Mozilla 1.4 RC1.

 Mozilla, como xa debiades saber todos a estas alturas é o mellor navegador
do mundo. É gratis; tamén libre (o código fonte está dispoñible para quen o
queira, e pódese empregar, modificar e distribuir libremente), pódese baixar
de http://www.mozilla.org/, haino para Linux, Windows e MacOS, os virus non
lle afectan [1] e incorpora mecanismos para bloquea-las cookies, os
web-bugs, as fiestras emerxentes e outros mecanismos cos que certa xente,
aos navegantes, lles da polo clwijefñ. Vaia, esvaroume a man polo teclado.
Ah, e pódese poñer en moitos idiomas, que é do que trata isto.

 Por favor, instalade esta traducción e probádea, a ver que reventa. Acabo
de rematala, e non tiven tempo de a probar (aquí non podo instalar Mozilla
1.4RC1). É bastante posible que algo revente, así que quedades avisados;
nembargantes, preciso da vosa axuda para atopar o antes posible os fallos
que poida haber, para, cando saia Mozilla 1.4, poder sacar canto antes unha
traducción correcta. Haberá grandes premios [3] para os que atopen máis
fallos.

 Para instalala tedes que seguir estes pasos:

1 - Arrincade Mozilla identificados co usuario que empregastes para o
    instalar (administrador, en moitos casos).
2 - Se xa estabades a usa-la traducción galega de Mozilla, cambiade ao
    idioma inglés [2] para que Mozilla non tente cambiar uns ficheiros que
    está a usar ;-)
3 - Entrade en http://trasno.net/mozilla/ e premede na ligazón "Instalar"
    correspondente á versión de Mozilla que tedes instalada. Havos dicir que
    é perigoso executar cousas procedentes de Internet, que hai moitos
    malvados, etc. Dádelle a "Aceptar", que eu son boíño O:-)
4 - Cando estea rematada a instalación, pechade o Mozilla e abrídeo co voso
    usuario habitual
5 - Se non me fixestes caso no paso 2, ou se o voso usuario de "instalación"
    é distinto do voso usuario habitual, cambiade ao idioma inglés [2] e
    reiniciade Mozilla.
6 - Cambiade ao idioma galego e reiniciade Mozilla.
7 - ¡Tachán!

 Hala, hala, a probalo. E, lembrade, a próxima vez que vos sobren uns euros
na libreta de aforro, botádelle un ollo á miña wishlist de Amazon, e logo
mercádeos para vos, claro.

[1] O significado de "non" pode variar.
[2] Ai si, como cambiar de idioma. É doado. Ide ao menú Edición (Edit en
inglés), e escollede Preferencias (Preferences, en inglés). Na caixa de
diálogo seleccionade Aparencia (Appearance) e, alí, Idiomas (Languages).
Seleccionade o idioma que queredes seleccionar. Dádelle a Aceptar.
[3] O significado de "premios" pode variar.

-- 
main(){char*a="  Jacobo Tarrio  ",*b=" jtar...@gpul.org",*c=strdup(b),e
,*d;while(e-=e,d=c){while(*d=*a+(*d-*a+((*(d-c+a)-*d)&&++e))%(3[a]-2),*
++d);printf("%s\n\e[A",c);usleep(2000);if(!e){d=a;a=b;b=d;sleep(!0);}}}
--
Para sair desta lista, manda un mail a trasno-requ...@ceu.fi.udc.es
poñendo "unsubscribe" na mensaxe

Responderlle a