Yth. Dunsanak Rank Muaro Labuah,
Assalamualaikum wr.wb.
Ambo tagalitiak saketek jo tulisan dunsanak jo subject: Solok
Selatan....tantang 2 hal:
1. Soal duo kerajaan di Muaro Labuah yaitu : Alam Surambi Sungai Pagu di
Pasir Talang dan Astano Balun di Balun. Sapanjang sejarah nan ambo
pelajari di Pasisie ( kabatulan ambo dari Kambang ), dari monografi nagari
Kambang nan ambo baco, di Muaro Labuah hanyo ado ciek kerajaan yaitu
Kerajaan Sungai Pagu nan astanonyo di Balun tu.. Dunsanak kok manulis ado
duo kerajaan, kami di Kambang jadi binguang. Ambo alah duo kali singgah di
Astano Balun dan mambaco sapotong Tanbo jo babarapo dokumen lainnyo dalam
bahaso Balando nan mambuktikan disitulah tingga dulu Rajo Adat Kerajaan Alam
Surambi Sungai Pagu. Ambo alah bakenalan jo pamangku rajo nan kini tingga
di Jakarta banamo BustamBalunSH,mantan Hakim Tinggi Jakarta dan adiek baliau
uni Ros nan kini tingga di Astano Balun sebagai panjago astano, sarato Pak
Mujadid SH nan mangaku sebagai penanggung jawab harian Astano Balun tu.
Sadonyo mayakinkan kami urang Kambang bahaso carito di Monografi Nagari
Kambang nan barisi sejarah badirinyo kerajaan Sungai Pagu dan sejarah
asa-usue urang Kambang yo bana dari Sungai Pagu. Nan di Pasir Talang
manuruik monografi Nagari Kambang adolah tampek badirinyo Musajik sebagai
kelengkapan suatu kerajaan. Jadi disitu mungkin ado Rajo Ibadat (Syarak).
Sayangnyo ambo alun kasinan lai, kabanyo tiang -tiang musajik di Pasir
Talang tu jumlahnyo kurang aso anam puluah.atau 59 nan mangambarkan jumlah
rombongan niniek nan mandirikan kerajaan Sungai Pagu nan samulo bajumlah 60,
karano maningga surang dalam perjalanan di Bukik Sipadeh Tingga sabalun
sampai didaerah nan kini banamo Muaro Labuah tu.
2. Soal jalan ka Pasisie nan dunsanak katokan. Ambo sampai kini tamasuak
nan ikuik mapajuangkan pambangunan jalan ka Sungai Pagu dari Kambang. Jarak
Kambang -Sungai Pagu hanyo 40 km . Dari arah Sungai Aro Sungai Pagu alah
diaspal dijaman Kapalo PU Sumbar bapak Sabri Zakaria sapanjang 12 km. Dari
Pasisie sampai Koto Pulai alah diaspal sepanjang 21 km, jadi tingga 17 km
alun ado jalan, nan mambuek dunsanak kami di Muaro Labuah indak bisa
jalan-jalan kapantai mambali lauak nan murah sambie silaturahmi jo
dunsanaknyo dibalahan Kambang. Memang batue kecek dunsanak,bahaso nan
maambek pembangunan jalan iyolah kapantingan fulitik, nan indak paduli jo
kapantingan rakyat banyak. Rakyat Kambang alah batekad, namuah basumpah
dengan "cap jempol darah" indak kamarusak TNKS dan akan manjagonyo bilo
dibuek jalan. Kini tapulang jo urang fulitik nan sabagian malindungi
maliang-maliang kayu nan dibantu pulo dek aparat panagak hukum. Rakyat tak
badayo, tingga badoa supayo Allah SWT mamunculkan pamimpin nan Barasiah dan
Paduli jo kesulitan rakyat.
Sahinggo iko dulu dunsanak, ambo manunggu gayuang basambuik.
Wassalam dan maaf,
Asmardi Arbi
____________________________________________________
Berhenti/mengganti konfigurasi keanggotaan anda, silahkan ke:
http://groups.or.id/mailman/options/rantau-net
____________________________________________________
