Ma sagalo anak kamanakan jo adidunsanak, Kapatang ambo singgah sabanta ka Bank Nagari Cabang UBH (Univ. Bung Hatta). Baru kalua dan malangkah di jalan, ado urang nan mahariak ambo: "Oooi Mak Satiiii!!!". Tantu se takanja kanjuik ambo, dek indak ado urang di UBH, tampek ambo baparak sasuduik kenek ko, nan maimbau ambo jo mS ko. Baitu ambo mamuta kapalo ka arah sorak tu, nampak kamanakan ambo, Ma'Dang Jolelo, galak gadang, kamanakan nan acok mancogok di lapau ko lk. sakiro 2 a 3 tahun ko, salamo baliau mondok nyantri di Tasmania. Kini ruponyo baliau lah sudah katam kaji, lah batambah lo doktor ciek lai di parak kami UBH ko. Baliau keceknyo lai bapailah batinggalah ka lapau ko. Namun baitu, ambo ulang juo lah baliak. Baliau kirim salam ka sagalo rang lapau, indak diatok tabilang gala, diiriangi jo permohonan maaf lahir batin, kok ado kato nan tasorong nan ka mambareki dunia akiraik salamo bakucindan di lapau ko. Mungkin untuak samantaro baliau alun bisa mancogok ka lapau lai, dek tantu sibuik mangamehi jo manyapu dangau nan lah lamo ditinggaan.
Salam, mS ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
