Lamak Dek Awak, Katuju Dek Urang By padangekspres, Senin, 10-Mei-2004, 06:22:03 WIB
AIA nan taganang sakaliliang kampuang, indak manjadi halangan dek si Pudin untuak pai maota sambia minum kopi di Lapau Mak Kari. Bukannyo si Pudin indak paduli jo kampuang nan lah sarupo tabek ikan nantun, tapi banjir nan sarupo iko lah jadi langganan dek urang kampuang. Kadang lah dianggap jatah rutin nan harus ditarimo dek urang kampuang. Pado adaiknyo rakyaik ketek nan ka manangguangkan nasib sarupo itu. Kalau urang kayo, tantu indak ka namuah tingga atau mambali rumah di tampek nan acok kanai banjir, apolai pajabat, tantu ka dicarikan tampek nan saleso dek anak buahnyo. Tantu indak sarupo jo awak nan tingga di rumah nan baseo satiok bulan, atau pagawai ketek nan tingga di Perumnas SSSS, Sakik Sanang Syukuri Sajo. "Kalau acok barandam jo banjir sarupo iko, bisa tumbuah sisiak den ko mah," kecek Pudin sambia malatak-an kopiah nan malampok kapalo sulah nyo di ateh meja di Lapau Mak Kari. "Sarupo jo ikan tu Mak," solo si Mira dari dapua. "Sadiokan sajo sampan di balakang rumah ciek Mak, sakurang-kurangnyo benen oto. Sadio benen sampan sabalun hujan," sambuang si Upiak bijak sambia manatiang kopi jo goreang angek ka ateh meja. "Iyo sabana bijak kau yo piak. Den lado muncuang kau tu beko..," jawek Pudin icak-icak marabo. Mak Kari tagalak sengeang sajo, sambia malengong ka Pak Veri Yasri, nan sadang mahiruik kopi di suduik Lapau. Jo suduik mato, Mak Kari ma-agiah tahu si Pudin, bahaso ado pajabaik nan duduak di situ. Pudin jadi salah tingkah, jo cangguang disaponyo anak mudo tadi, "Eh, Pak Veri bagai di siko mah, alah lamo tibo?" sapo Pudin. Anak mudo rancak nan kini jadi Kapalo Kantua Satuan Polisi Pamong Praja di kota Bingkuang ko, ma-angguak sambia tasanyum. "Iyo Da.., alun lamo bana lai doh, samo minum awak," baso nyo sambia tasanyum ka Pudin nan dipanggianyo Uda. Mak Pudin tampak malu-malu cangok, dek karano umpek inyo tadi tadanga dek Pak Veri nan pajabaik nagari. Untuak manutuik malu, capeknyo ma-aliah hetongan. "Jadi..apo sajo karajo SatpolPe Pe tu Pak Veri?," tanyo Mak Pudin. "Satuan Polisi Pamong Praja, nan acok disabuik Satpol PePe dibantuak supayo sagalo Peraturan Daerah, dapek bajalan sasuai jo barih balabeh nan dibuek," jaweknyo mamanciang. "Tapi Mira ba-a kok pakai sipak tarajang bagai. Main daram se, bapetai-petai galeh urang dibueknyo." Pak Veri paham apo nan dikecek-an si Mira. Inyo pelok-an duduaknyo tapek-tapek untuak manjawek. "Itu nan sadang kito pelok-an basamo," jaweknyo singkek. "Kok dapek, masyarakaik harus pulo manenggang. Usah dibuek juo karajo nan indak sasuai jo aturan nan balaku," sambuang Pak Veri. "Manuruik ambo, alah patuik awak mamareso diri surang-surang. Baiak masyarakaik, baitu pulo patugeh. Usah bantuak urang mahadok-i musuah negara. Awak kan badunsanak. Sa-sakik, sa-sanang. Sakik dek awak, sakik pulo dek urang." Baitu Mak Kari ba-pituah. Hujan batambah labek. Atok rumbio Lapau Mak Kari lah raso ka taban. Aia mancoroh disuduik, dakek Pak Veri duduak. Baitu pulo nan satantang Pudin duduak, aia hujan manitiak di kapalonyo nan indak barambuik. Si Mira alah kalebuik pulo di dapua, mangamehan alaik paragaiknyo nan disiram hujan. Tibo-tibo Pak Veri tagak, aia nan mancoroh ka badannyo, "Bara kasadonyo Mak, minum uda Pudin bagai," tanyonyo ka Mak Kari. "Kopi duo, goreang duo., Duo ribu limo ratuih," jawek Mak Kari. "Sasudah mambaia, Pak Veri balari di salo hujan. Kapacak aia inyo balari, tampak dari Lapau. Mak Kari, malengong ka Pudin, inyo mangacek ka konconyo nan sadang kadinginan. "Awak sapakaik, Nan aturan harus tagak badiri. Karajo harus disalasaikan. Tapi nan adaik usah dilupokan. Lamak dek awak, katuju dek urang. Indak buliah piliah kasiah, tapi paralu mamiliah caro nan sasuai jo adaik nan dipakai. Sasuai jo aturan nan balaku." (viveri yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisher&op=viewarticle&artid=2648 2 ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
