Lapau Mak Kari : "Usah Rakyaik Diduto-i, Elok Didanga Kato Hati." By padangekspres, Senin, 17-Mei-2004, 03:39:59 WIB
DI HARI nan sahari nantun. Hari nan sadang tangah hari. Sadang buntak bayang-bayang. Sadang linduang saliguri. Sadang haniang-haniang buruang. Sadang sunyi urang di kampuang. Sadang rami urang di pakan. Tampaklah Labai duduak di Lapau Mak Kari, sambia badendang-dendang surang. Apo garan nan didendangkan dek Mak Labai kutiko itu, cubo danga dek sanak sakutiko, nak ambo tulihan di siko. "Kok urang iyolah ka sanang duduk di kurisi ampuak. Tampek duduak bisa baputa, kurisi nan batupang jo tonggak basi. Kuduak dihambuih dek Ase nan sajuak. Sabana lamak dibao lalok bakaluak. Baju Jas langkok jo pantalon wol impor dari Eropa. Dasi panjang babungo-bungo, kapalo basongkok jo kupiah BeKa nan basulam jo banang ameh. Sipatu lokak batumik tinggi dipasang pa-aleh kaki. Satiok bulan dapek saungguak piti nan banamo gaji ditambah honor rapek sarato reses barupo piti..." "Lamak bana dendang Mak Labai siang ko mah," solo Mak Kari nan mandanga dari tadi. "Ba-a kaindak, Jaguang maupiah, padi manjadi," sorong Pudin nan sato pulo sakaki. Labai nan digaduah dek konconyo indak paduli, tangannyo tibo di galeh kopi, tangan kidanyo manapuak langau nan hinggok di pipi. "Assalaamu'alaikum." Tibo-tibo Uwan Yulizal Yunus, urang mudo nan manjadi Dekan Fakultas Ilmu Kebudayaan (Adab) IAIN Imam Bonjol, Padang mancogok di pintu Lapau. "Wa 'alaikummussalaam..," sarantak urang di Lapau manjawek salam. Uwan Yulizal Yunus, pak Dekan tadi, mamiliah duduak di hadok-an Pudin, basisampiang duduak jo Labai nan lah baranti badendang. Indak lamo antaronyo, si Mira manatiang kopi susu, sasuai jo nan dipasan dek tamu nan baru datang. "Apo kaba nan angek kini ko Mak, lah lamo ambo indak kamari," keceknyo sambia manjangkau goreng ubi di ateh meja. "Kaba baiaknyo, dunsanak nan kito piliah kutiko PEMILU alah mulai maukua badan ka tukang jaik. Mamasan baju nan kadikanak-an kutiko dilantiak jadi anggota legislatif. Limo puluah limo urang untuak DPRD Provinsi," Mak Pudin mulai ba-barito. "Kaba buruaknyo apo kiro-kiro tu sanak," tanyo Pak Dekan panasaran. Mak Labai pantang katinggalan, inyo sato pulo manambhan, "Kaba buruaknyo, rakyaik badarai sadang arok-arok cameh. Arok ka urang nan dipiliah, kok lai takana jo rakyaik nan mamiliah. Cameh dek karano takuik ka tajadi pisang babuah duo kali, luluih di lubang nan samo. Tangiang juo ditalingo awak, alun hilang dipalupuak mato, sagalo laku parangai nan indak patuik dipabuek dek anggota dewan nan tahormaik tu. Tantu uwan alah paham tantang itu." "Tapi awak harus adia. Nan basalah saikua mancik, usah rangkiang nan di baka," semba Mak Kari. "Bana tu Mak." sambuik Pak Dekan. "Tantu kito harok jo anggota dewan nan mamakaikan adaik, sasuai Alua jo patuik nan bapakai di Minangkabau ko," sambuang Uwan Yulizal jo caro nan arih bijaksano. Maklum, Uwan awak ko dosen, Datuak Rajo Bagindo pulo di atehnyo. "Satiok adaik manganduang Estetika, Erotika, sarato Etika. Ado Budi nan baiak, Baso nan indah, sarato harago maharago-i. Bukan samato dalam urusan adaik sajo," baitu baliau manjalehan di hari nan sahari nantun. Adaik Basandi Syara', Syara' Basandi Kitabullah manjadi aleh tapak, landasan sagalo karajo nan ka dibuek. Usah rakyaik didutoi, elok didanga kato hati, supayo indak manyeso ka badan diri. Usah bangga jo pangkek sarato jabatan awak kini, kana hiduik ka mati, sabab ado akhiraik nan mananti. (viveri yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisher&op=viewarticle&artid=2675 7 ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________