Assalamu'alaikum w.w.
Lai ado ukatu sanginiang, mari kito bacarito-carito
baliak sambia minun kawa. Tapi sakali ko agak
"bagoluk"
aka di no sangenek.
Sutan Ain sadang duduak tamanuang di ateh jambatan
mancaliak aia nan lalu di bawah sambia bapikia-pikia.
Gala iyo sutan, tapi banamo ain, mungkin dari zaini
jadi zain, sudah tu ain. Digala kan urang sutan ain.
Karajo baamanuang takah iko iyo lah lamo dibuek no,
dek karano mamikiakan alam nan dijadikan dek Tuhan
Allah go.
Kadang-kadang ano manggeleang surang-surang antah dek
paniang atau dek aa, tapi nan jaleh acok maraso bukan
aia di bawah nan bajalan tapi raso-raso jambatan nan
bajalan.
Baa sababa no go, tanyo no dalam hati. Kito maliek
dunia ko lai manuruik hakekat no ?. Langik tu iyo
sabana-bana biru ndak ?. Ladang-ladang tu iyo sabana
hijau ?, madu tu iyo manih ko lah, pario tu iyo sabana
paik ?.
Aia nan bajalan ko iyo benda caia dan es tu iyo benda
padek ?. Iyo sabanano kayu tu benda padek sarupo nan
dirasokan dek indera kito ?.
Apo iyo batu-batu tu benda mati nan indak manggarik ?.
Kaco tu iyo tembus cahayo dan dindiang tembok tu indak
tabuak dek cahayo.
Apo iyo batua bahaso garih luruih adolah jarak nan
paliang pendek antaro duo titiak sarupo nan kito
pelajari dalam ilmu ukur bidang. Iyo lai batua jumlah
suduik sagitigo tu 180 derjat.
Apo iyo peristiwa alam semesta ko memang
balansuang
dalam ciek zaman ?...kajadian-kajadian takah iko ko
tajadi pado satu ukatu ?, walaupun tampekno
babeda-beda.
Kok awak bandiangkan peristiwa nan tajadi di bumi jo
peristiwa nan tajadi di Mars... di Venus, di
bintang-bintang Nebula... Lai dapek awak mangatokan
bahaso peristiwa-peristiwa tu tajadi dalam ukatu nan
samo ?... atau persitiwa-peristiwa tu tajadi dalam
ukatu nan balain-lain ?.
Cando aia nan dicaliak ko, lai dapek awak
mayakinkan
diri bahaso ado saumpamo benda manggarik samantaro nan
lain diam ?.
Manuruik khayal kito sado pertanyaan ko
dapek dijawek sacaro gamblang kecek rang jawa dan para
sarjana atau scholars lah mangiro bahaso hal-hal nan
sarupo itu indak manjadi persoalan lai ?.
Tapi kini kok barubah manjadi teka-teki ?.
Apo iyo lai kito mancaliak dunia ko manuruik
hakekat no nan sabana no ?.
Mungkin indak. Memang iyo sadono kito liek tapi bukan
hakekat. Iyo ndak ?.
Cahayo putiah nan kito liek bawarna putiah, kalau
di
lewatkan ka prisma kaco..taurai manjadi 7 warna,
merah,
jinggo, kuniang, hijau, bulau, nilo, lembayuang.
Kalau dipelajari bana warna-warna tu indak ka basuo
dek awak do apo sabananyo salain "perbedaan panjang
gelombang", "perbedaan frekwensi", indak labiah indak
kurang.
Jadi baa sabanano ?. Nan tajadi mungkin sel-sel saraf
di "selaput jala" mato kito tapangaruah dek
macam-macam getaran nan babeda manuruik jenis
getaran no. Pusat saraf mato di utak awak
menterjemahkan berita dari saraf ko dalam bantuak
warna-warna. Tapi gelombang cahayo tu bukanlah warna
nan dimukasuik. Hanyo samato-mato gelombang jo
getaran,
lalu utak jo bahaso no sorang, untuak membedakan ciek
jo nan lain, maagiah definisi barupo
tanggapan-tanggapan,...itulah warna.
Ladang-ladang nan kito caliak bawarna hijau bukanlah
hijau, nan tajadi adolah daun-daun tumbuhan tu
menyerap kasado gelobang cahayo kecuali panjang
gelombang tatantu sajo nan masuak ka mato kito,
mampangaruahi sel-sel mato. Pangaruah ko manuruik
bahaso utak berarti "hijau".
Baitu pulo warna-warna lain, sabanano bukan warna.
Indak labiah daripado berkas-berkas sinar nan
dianalisa dek utak jo bahaso no surang, utak lah nan
mangatokan itu adolah warna.
Tambah tamanuang Sutan kito mamikiakan, dek ari lah
laruik sanjo, mungkin isuak diinok diranuangi baliak
baa nan sabana no go. Allah Mahakuasa, kok indak
diagaiah ilimu ka manusia go, indak kamangarati ....
janno Sutan.
.... isuak kito sambuang...
Wabillahil hidayah wat taufiq
Wassalam
St. Sinaro
__________________________________
Do you Yahoo!?
Friends. Fun. Try the all-new Yahoo! Messenger.
http://messenger.yahoo.com/
____________________________________________________
Berhenti/mengganti konfigurasi keanggotaan anda, silahkan ke:
http://groups.or.id/mailman/options/rantau-net
____________________________________________________
