Assalamu�alaikum wr.wb., Di jaman Suharto mamarintah ado ungkapan populer Suharto jo konco-koncono nan di ambo iyo agak taraso manggalak, ungkapan �Merongrong kewibawaan pemerintah�. Bukan sia nan merongrong atau baa carono merongrongko nan manggalak, tapi ungkapan itu sandiri nan manuruik ambo sangaik bana indak masuak diaka. Baa mangko mantun? Aa bana sabanano arati wibawa ko, itu nan indak jaleh amek di urang. Wibawa kalau manuruik pamahaman ambo adolah maruah surang urang nan manimbuaan raso sagan, raso maaragoi jo raso oromaik manjadi ciek taradok paribadi urang nantun. Bukan raso takuik, sabab kalau urang takuik, suatu ari bisa sajo ilang raso takuik cako sudahtu tibo nekaik, mako babaliak urangtu atau mancidono kaurang nan di takuikino. Baa carono managakan wibawa, supayo urang sagan, supayo urang bisa maaragoi, supayo urang oromaik? Ado tigo sifaik nan musti dipunyoi urang kalau awakno ingin nak dinilai urang bawibawa. Nan partamu sifaik amanah atau sifaik jujur. Nan kaduo sifaik batangguang jawab. Nan katigo sifaik barani diateh nan bana. Sifaik amanah aratino bisa dipicayo, luruih, adia, jadi indak cadiak buruak, indak mangguntiang dalam lipatan, indak tunjuak luruih kalingkiang bakaik. Nan iyo iyo, nan indak indak. Bajanji pantang mamungkiai, bakato salalu diateh nan bana, kok dipicayoi urang indak khianat. Adia dalam manimbang jo mamareso, tibo dimato indak bapiciangkan, tibo di paruik indak bakampihkan. Sifaik nan kaduo barani batangguang jawab. Sifaik sarupo iko adolah sifaik urang nan tangan mancancang bau mamikua. Kok nyampang tabedo apo sajo urusan karano salah di awak, awak tagak kamuko sakali maambiak aliah tangguang jawab. Indak �lempar batu, sembunyi tangan�. Nan katigo barani diateh nan bana. Kalau alah yakin awakno bahaso nan disampaikan itu bana, jaleh dalil jo hukumno, kama sin barani awakno mangecekan, kama sin barani awakno managakan. Indak awakno takuik nyampang kok kadimusuahi urang bakuaso bagai doh. Katigo sifaik di ateh adolah contoh-contoh akhlaqul karimah, akhlak nan di contohkan dek nabi SAW. Nabi kito, Rasulullah SAW sajak sabalun jadi nabi utusan Allah alah dikenal masyarakaik rami sabagai urang nan sangaik amanah dan digalai masyarakaik al amin. Apotah lai sasudah manjadi nabi, baliau sangaik bana manyuruahan balaku adia sarato basifaik adia. Dalam satu hadist baliau mangecekan: �Kok nyampang Fatimah binti Muhammad manciluik, ambo karek tanganno�. Jadi indak piliah-piliah kasiah. Baitu juo sifaik batangguang jawab Rasulullah adolah suatu partangguang jawaban total taradok saganok umaik baliau. Baliau nan mamimpin dalam parang, baliau nan jadi komando tinggi dalam pasukan. Jadi indak sakadar manyuruah-nyuruah bakacak pinggang, mangomando dari jauah. Baliau maagiah contoh dalam hiduik baliau saari-ari nan sangaik bana sadarhana sabagai raso tangguang jawab taradok umaik, jadi baliau bukan basifaik �aji mumpung�. Barani di ateh nan bana. Indak takuik malawan urang banyak kalau di ateh kabanaran. Indak takuik jo urang bakuaso kalau di ateh kabanaran. Sakalian pulo indak takuik malarang nan salah biapun nan mangarajoan itu urang tapandang. Indak ragu mangecekan salah kalau sasuatu itu jaleh salah. Wakatu Rasulullah manyampaikan parintah Tuhan supayo manusia manyambah hanyo kapado Tuhan, nan diadoki Rasulullah adolah pamuko-pamuko Quraisy, urang-urang santiang katiko itu. Diantarono bahkan paman-paman baliau, nan biasono baliau oromaiki. Baliau indak panah takuik. Dan nampak pulo di awak bara tinggi wibawa Rasulullah. Umaik, para sahabaik, musuah sakalipun sangaik sagan ka baliau, sangaik oromaik ka baliau. Iko samustino jadi conto kaawak, siapun awak. Apobilo saurang mamak mampunyoi sifat amanah, batangguang jawab, barani di ateh nan bana, mamakko insya Allah akan jadi surang urang nan bawibawa kama sin no pai. Indak sajo di mato kamanakan, di anak, di dunsanak, bahkan di urang kampuang jo urang rami dima sajo. Jadi nampaklah di awak bahaso nan wibawa ko iyo indak amuah diajan doh. Bukan dek karano awak mamak musti otomatis bawibawa diadokan kamanakan. Bukan karano awak urang bakuaso, urang pamarintah, mako langsuang sajo maraso bawibawa padohal parangai cingkahak. Bukan karano awak urang bagak bapangkaik tinggi manjadi langsuang sin awak bawibawa. Jaleh pulo bahaso wibawa ko iyo indak mungkin dibuek-buek. Urang banyak kasugiro tau apokoh iyo bana sasaurang tu lai bawibawa atau indak, dalam arati kato lai mampunyoi sifaik-sifaik nan alah awak sabuik di ateh cako. Dan sudah barang tantu wibawako iyo indak mungkin dirongrong doh. Sakitulah dulu, kapanambah nambah ota. Wallahu a�lam Wassalamu �alaikum wr.wb., Lembang Alam ------------------------------------------------------------ Free Web-email ---> http://mail.rantaunet.web.id Minangkabau WebPortal ---> http://www.rantaunet.web.id LAPAU RantauNet di http://lapau.rantaunet.web.id Isi Database ke anggotaan RantauNet: http://www.egroups.com/database/rantaunet?method=addRecord&tbl=1 ================================================= WEB-EMAIL GRATIS ... @rantaunet.web.id ---> http://mail.rantaunet.web.id ================================================= Subscribe - Mendaftar RantauNet Mailing List, kirimkan email Ke / To: [EMAIL PROTECTED] Isi email / Messages: subscribe rantau-net email_anda Unsubscribe - Berhenti menerima RantauNet Mailing List, kirimkan email Ke / To: [EMAIL PROTECTED] Isi emai / Messages: unsubscribe rantau-net email_anda ================================================= WebPage RantauNet http://www.rantaunet.web.id dan Mailing List RantauNet adalah servis dari EEBNET http://eebnet.com, Airland Groups, USA =================================================
