Assalamu'alaikum WW
Dari carito kawan dari kampuang dan lah ambo cubo tanyo ka urang gaek di
Maninjau, iyo sadiah ambo nyo..dek karano aia danau kini karuah bana.
Ambo cubo saketek mambuek sebab akibat tanpa riset, dan hanyo dari apo nan
diliek jo dirasokan dan ambo minta follow-up dari adidunsanak barupo saran
dan buah pikiran
Titik tolak :
Sampai pado tahun 1990-an awal kondisi aia danau relatif masih janiah dan
lumayan rancak untuak di pakai baranang dan masih memungkinkan untuak
dijadikan nelayan tradisional untuak mancari iduik, dan ikan-ikan spesifik
danau masih banyak dan dapek bakambang biak sacaro alami.
Untuak kondisi alam, pada musim angin , disaat aia danau diputa dek angin
akan tajadi "tubo" dima "belerang" nan biasonyo di dasar danau akan naiak
dan bacampua jo aia danau , sahinggo mambuek aia danau sampai bawarno hijau
ke kekuniangan dan pado saaik iko lauak akan pusiang "nonoy" dan mudah di
tangkok . Dan dalam kondisi normalnyo tubo iko hanyo sakali dalam sataun
dan paliang lamo wakatunyo sabulan.
Dari segi pariwisata dimulai pada Tahun kunjungan Indonesia "Visit
Indonesian Year tahun 1990 " Pemda menetapkan Danau Maninjau sebagai salah
satu daerah tujuan wisata sahinggo mamaralukan danau untuak menarik
wisatawan, dan kondisi aia danau nan barasiah marupokan hal nan pokok dima
para wisatawan dapek baranang dan bawisata danau lainnyo..
Dilain pihak , mulai tahun 1992-1993 babarapo urang mulai mancubo
mambudidayakan ikan jo caro jala terapung, dan berhasil. Dan sarupo biasonyo
ditiru dek urang nan lain dan memang hal iko menghasilkan banyak income ,
tetapi pihak yang berkepentingan sepertinya lalai dalam beberapa hal
misalnya masalah lingkungan dan masalah pengaturan (izin, dima siapo sajo
nan ingin punyo karanba silakan buek dan bara sajo makanan ikan ka diagiah
asa ikannyo lai gadang dipabiakan sajo.
Babaliak kak kondisi aia danau,
dimulai sekitar tahun 1996 aia danau alah relatif karuah dan hanyo bisa
rancak diliek dari jauah tapi kalau lah sampai di tapi danau niaik untuak
baranang ilang jadinyo.
Dan nan labiah parahnyo nan namunyo tubo itu bisa duo-tigo kali dalam sataun
dan juo agak lamo bisa sampai duo bulan, sahinggo urang nan bakaramba jadi
banyak nan rugi kok kalai tubo , dek modal sakian juta bisa hanyo jadi
sakian ribu....
Karuahnyo aia danau iko, dari nan ambo danga sababnyo ado babarapo versi:
Nan partamo, dek karano Bendungan PLTA Maninjau di hulu Batang Antokan, nan
mamindahkan hulu sungai ka corong intake-nyo PLTA Maninjau, kok dulu sabalun
di pakok katonyo lunau danau itu taruih tabuang ka Batang Antokan sacara
alami, tapi kini dek hulu Batang Antokan pindah lunau iko indak bisa lai
taruih ka Batang Antokan...
Tapi manuruik ambo iko ketek kamungkinannyo sababnyo saluran intake PLTA itu
labiah dibawah dibandiangkan jo hulu dai batang Antokan nan di bendung.
Nan kaduo, dek karano tambah kurang-nyo aia Danau. Hal iko jaleh dek
bakurangnyo sumber aia danau sabagai akibat panabangan kayu liar di bukik
sakaliliang danau Maninjau, dan juo dek parubahan iklim (la Nina dan El nino
)
Nan katigo - mamuruik ambo paliang gadang kontribusinyo - indak takandalinyo
jumlah karamba dan pemakaian makanan ikan untuak karamba. Hal iko taliek
dari banyaknyo sisa makanan ikan di dasar danau. Dan pencemaran (kalau
buliah di katokan) iko, alah jauah di ateh kamampuan danau untuak
manetralisirnyo.
Dan dari sampel aia danau nan sempat di pareso di Lab oleh Alumni ATIP
Padang, di aia itu kandungan Natrium nyo alah diateh ambang batas....
dan pasti ado efek negatifnyo sacaro biologis.
Nah dari saketek panglihatan ambo diateh... rasonyo dari mulai kini dan yang
akan datang bisa dilakukan hal dibawah iko.
Untuak mambuek karamba itu harus ado izin, dalam arti mambuek karamba itu
indak buliah, hanyo ka urang nan diizinkan dibuliahkan dengan syarat manjago
lingkungan...dan dengan itu bisa di parituangkan kemampuan danau sabananyo.
Paralu diadokan studi kelayakan dulu bara banyak danau mampu manampuang
karamba dan di daerah ma sajo, sahinggo kito masih bisa manjadikan Maninjau
sebagai daerah wisata.
Dan ambo batanyo ka adidunsanak sadonyo apo kiro-kiro real efek negatif dari
tingginyo Natrium untuak kesehatan urang atau ekosistem.
Dan minta tolong ka nan bisa maagiah jalan atau manyampaikan ka nan
berkepentingan....
Dan concern ambo nan paliang pantiang adolah... baa ambo kalau rinuak jo
bada indak bisa iduik lai di Danau Maninjau... ka ma ka dicari lai...
Wassalam
Z Chaniago - Palai Rinuak
________________________________________________________________________
Get Your Private, Free E-mail from MSN Hotmail at http://www.hotmail.com
Mailing List RantauNet http://lapau.rantaunet.web.id
Database keanggotaan RantauNet:
http://www.egroups.com/database/rantaunet?method=addRecord&tbl=1
=================================================
Mendaftar atau berhenti menerima dari RantauNet Mailing List, kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
[email_anda] = isikan alamat email anda tanpa tanda kurung
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
-------------------------------------------------------------------------------------------------
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
