Dunsanak di Rantaunet dan dimano sajo barado,
Assalamualaikum, ambo iyo pandatang baru, tapi kucindan dunsanak di Rantaunet yo alah
sajak lamo ambo danga, kini taragak pulo ambo bacurito.
oh perkenalkan dulu :
Gala Ambo : Sutan Sati Batuah (42th)
Suku : Malayu
Asal : Kec. Bonjol Kab. Pasaman
Urang rumah ambo sukunyo Tanjuang
Alamat kini : Rheingau Taunus, Hessen, Jerman
Dari rantau ambo lihek perkembangan Negara Indonesia nan kebetulan,nio atau indak,
tampek awak balinduang, yo samakin kalam sajo. Sagalo masalah dipolitisir, mungkin dek
baru baraja bapolitik, sehinggo rasonyo sagalonyo akan bisa sajo disalasaikan jo
politik, Akibatnyo tu mah alah salasai negara awak. Masalah politikko manuruik ambo
indak kababeda doh, partai apo sajolah nan bakuaso, salagi para poli-tikus tu indak
mamikiakan nasib rakyat dan kepentingan urang banyak, mako akan samo sajotunyoh.
Dari pado mangaji politik, kini labiah elok awak mangkaji baa caronyo nan mungkin
untuak ma-anta-kan rang kampuang awak untuak agak lapang sasak-angoknyo seketek
menghadapi kehidupan sehari-hari. Barangkali curito amboko bagi dunsanak nan mambaco
tulisanko mungkin indak paralu banadoh, tapi mungkin akan labiah paralu untuak rang
kampuang nan indak atau alun pernah bamain di internet, bahkan mungkin mandanga kato
internet sajo mungkin alun pernah lai, dunsanak harap maklum bahaso dunsanak awak nan
tagolong ka dalam goolonganko adalah mayoritas mutlak, mungkin labiah dari 90 percent
dari urang awak.
Dari lagu-lagu dan curito-curito alah awak danga juo, bahaso kecek uang tanah awak
tanah sarugo, tungkek kayu jo batu jadi tanaman (ambo terjemah bebaskan dari sabuah
lagu lamo). Kato-kato ko indak klise bagaidoh, bana tumah sanak. Tapi manga urang awak
bisa juo kalaparan? Apo nan kurang di awak? Dikecek-an kurang wakatu, pagi jago lalok
alah maota dilapau kopi, sanjo alah bamanuang atau bagalak-galak atau main domino di
lapau, nan anak mudo yo hilia mudiak sajo bagalak-galak kaniak kamari, kok ditanyo
apokoh indak ado karajo lain nan kadikarajokan lai, di jawabnyo alah saharian den
bakarajo, tantu paralu pulo bamasyarakat, atau bagi anak mudo tantu paralu mancari
pergaulan. Tapi bermasyarakat atau pergaulan tu kadang-kadang sampai tangah malam.
Ide ambo indak muluk-muluk doh, Kalau ide-ide dari uwan Zukri, tu rancak banatu, ambo
alah agak lamo juo kenal jo uwan, dan ambo lai taruih mambaco ide-ide uwan di
Mimbarminang.
Bakkato urang tuo-tuo awak lamo hiduik banyak dirasai, jauah bajalan banyak nan
tampak, mako ambo curitokan ka dunsanak duo contoh barikuik-ko:
1.�Baru-baru ko ambo malihek acara di TV urang Bayern/Bavaria Jerman Bayerisches
Fernsehen tentang kehidupan urang di Burkina Faso, sabuah negara di Arfika, kabanyo
salah satu negara nan paliang miskin didunia, kok dibandiangkan jo kampuang awak yo
180� bedanyo, sapueh-pueh mato mamandang indak ado tampak batang kayu nan badaun doh,
samo tahu sajolah awak bara kariangnyo gurun di Afrika, Tapi ado suatu persatuan
masyarakat disuatu desa (samo jo LKMD dek awak barangkali) nan bausaho malawan
kekerasan alam dan mereka tu bagotong royong mulai mamaga tanah jo ungguak batu untuak
mangurangi erosi dek angin dan kalau ado hujan bisalah sebagai panahan aia supayo jan
kancang bana alirannyo. Untuak manampuang aia mereka buek kolam/atau ganangan aia
hujan, nan sangat jarang pulo turunnyo, dan disekitar kolamtu mereka bausaho mananam
sayua-sayua, mulai dari tomat, wortel, slada pokoknyo tanaman mudo nan untuak
kebutuhan sahari-hari, masing-masing keluarga mandapek bagian tanah sapetak so!
rang, nampaknyo petak tanahtu idak labiah gadang dari kandang jawi awak, atau kandang
oto urang sabalah rumak awakdoh. Rasonyo indak picayo ambo doh malihek hijaunyo
sayua-sayua disitu, nan jaleh untuk kehidupan mereka sehari-hari indak payah doh,
bahkan bisa pulo mereka jua ka pasa kampung disitu. Ambo jo urang rumah waktutu yo
mangucap-ngucap sambia basyukur, karano urang didesatu nampaknyo sebahagian besar lai
saagamo jo awak.
2.Ambo ambiak contoh nan sangat bertolak belakang, kehidupan masyarakat di Jerman. Lah
agak lamo juolah ambo disiko jadi agak bisalah ambo malihek dan mengamati kehidupan
masyarakat di siko. Di siko sagalo ado, kalau pai ka lapau sayua-sayua walau sabananyo
urang cuma bisa batanam dimusim paneh atau katokanlah hanyo satangah tahun, tapi nan
sayua atau bahan makanan nan dari hasil pertanian ado sapanjang tahun, sagalonyo
memang bisa didatangkan dari lua, baiak waktu musim ataupun indak musim, bahkan duo
minggu nan lalu ambo kebetulan mandanga berita di TV, bahaso bawang daun (=kucai,
bantuak bawang perai tapi labih ketek daunno) kini mereka datangkan dari Bali (iri juo
ambo mancaliaknyo), dan tibo disiko nyo jua pulo ka Perancis, Itali dan Balando,
padohal awak tahu Balando sangat maju teknik rumah kaco-nyo. Barangko sangajo
didatangkan dari Tropis karano daunnyo labiah hijau dari nan ditanam di rumah kaco di
siko (bara syukurnyo awak tu, Allah memberi awak cahayo Matohari nan !
cukuik). Memang diakui dek awak inyo bapitih dan bateknologi tinggi, tapi nan mambuek
ambo salut, kalau sommer/summer mereka usahokan juo batanam sayua-sayua agak sasuduik,
kalau ado pakarangannyo, atau nyo seo tanah saketek, sagadang tanah perumnaslah
kiro-kiro, di situ nyo bangun dangau ketek dan nyo tanam sagalo nan bisa nyo tanam,
mulai dari wortel, tomat, slada dllnyo, atau apo nan katuju dek salero-salero baliau
baliau tu lah. Kalau awak bandiangkan hasilnyo, kabara banalah, kalau nyo bali
sayua-sayua tu di lapau sabalah rumah mungkin mungkin labiah murah lai. Jadi nampaknyo
bagi merekatu hanyolah sebagai paiisi wakatu luang di musim paneh, dek siang yo labiah
panjang dari malam sahinggo kalau dek awak sambia manyalam minum aia dek urang tu
sambia bajamua manyiang sayua.
Dari duo contoh tu baliak ambo baliak kapangka curito ambo, mungkin bisa sanak
manjawek pertanyaan ambo, apokoh susah bana ko lah bagi awak batanam tomat agak duo
atau tigo batang di suduik rumah, atau di dalam pot atau batanam lado agak limo rumpun
di dakek tampek pambuangan sarok, atau sipadeh kunyik langkueh sarai di muko rumah
sebagai tanaman hias? Dan lain-lain sebagainyo. Tanaman-tanaman ko indak paralu
dipupuak, atau diseprot bagai doh, nan paralu hanyo tanah dan aia dan barang-barangko
adalah kebutuhan awak sahari-hari nan memang kabara banalah balinyo doh, tapi kalau
kalau dietong-etong, seandainyo barangko indak paralu dibalilai mungkin lah bisa pulo
batambah porsi lauak agak sakali saminggu dan nan pasti barangko bisa ditanam,
barangkali indak ado juo salahnyo doh kalau dipaliharo ayam agak sapariduak-an,
taluanyo bisa diagiahkan untuk makan pagi anak-anak, indak untuak bapak-bapakdoh,
karano anak-anak labiah paralu makanan bergizi dari pado uang gadang. Ka kamanaka!
n awak dikampuang paralu juo dipasankan labiah elok talua ayam tu di makan dari pado
dijua dan pitihnyo dibalikan untuak mambali gulo-gulo atau makanan atau babalanjo di
sikola.
Baliak ambo baliak ka pangka curito ambo, jadi apo nan indak ado dek awak? Jawablah
dek dunsanak, kalau ambo manjawab iyo agak kasa saketek, nan indak ado adolah aka.
Jadi tolonglah dunsanak sampaikan ka urang kampuang. Semoga ado mamfaatnyo curito
amboko.�
Itulah curito ambo saketek
Wassalam
Sutan Sati Batuah
------------------------------------------------------------
Bergabunglah dengan Free Email @mimbarminang.com
Klik berita terbaru ranah minang di http://www.mimbarminang.com
RantauNet http://www.rantaunet.com
=================================================
Mendaftar atau berhenti menerima RantauNet Mailing List di
http://www.rantaunet.com/subscribe.php3
ATAU Kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
Ket: [email_anda] = isikan alamat email anda tanpa tanda kurung
=================================================
WebPage RantauNet dan Mailing List RantauNet adalah
servis dari EEBNET http://eebnet.com, Airland Groups, USA
=================================================
